Kulandzisa KwaMatewu 28:1-20
28 Ngemuva kweliSabatha, kusesekuseni ngeluvivi ngelilanga lekucala evikini,* Mariya waseMagdala nalolomunye Mariya beta batobuka lelithuna.+
2 Kwaba khona kutamatama kwemhlaba lokukhulu, ngobe ingilosi yaJehova* beyehle ezulwini yafike yagicita lelitje, yase ihlala etikwalo.+
3 Lengilosi beyikhanya njengembane, netimphahla tayo betimhlophe njengesitfwatfwa.+
4 Ngenca yekwesaba, labogadzi betfuka kakhulu baze bangasanyakati.
5 Kodvwa lengilosi yatsi kulabafati: “Ningesabi, ngiyati kutsi nifuna Jesu lobekabulawelwe elugodvweni.+
6 Akekho lapha, ngobe uvusiwe njengobe asho.+ Wotani nitobona lapho bebambeke khona.
7 Nibobese niyahamba masinyane, niyobikela bafundzi bakhe nitsi: ‘Jesu uvusiwe ekufeni, futsi nyalo usendleleni uya eGalile;+ nitamkhandza khona.’ Nguloku-ke lebengitonitjela kona.”+
8 Ngako besuka ngekushesha kulelithuna. Bebesaba kepha bajabule kakhulu, futsi bagijima bayobikela bafundzi baJesu.+
9 Jesu wahlangana nabo, watsi: “Sanibonani!” Basondzela kuye bafike batsintsa tinyawo takhe base bakhotsama embikwakhe.
10 Jesu watsi kubo: “Ningesabi! Hambani niyobikela bafundzi bami kuze baye eGalile lapho batangikhandza khona.”
11 Labafati batsi nabasesendleleni, labanye balabogadzi+ baya edolobheni bafike babikela baphristi labakhulu konkhe lobekwentekile.
12 Ngemuva kwekutsi labaphristi labakhulu nemadvodza lamadzala sebakhe lisu, banika labogadzi imali lenyenti,
13 base batsi: “Nibotsi: ‘Bafundzi bakhe bafike ebusuku silele bameba.’+
14 Nangabe umbusi eva ngalendzaba, tsine sitawukhuluma naye,* kute sidzingo sekutsi nine nikhatsateke.”
15 Ngako labogadzi bayitsatsa lemali futsi benta njengobe batjeliwe. Kuze kube ngulamuhla, emaJuda solo awabamba lamanga.
16 Bafundzi labangu-11 baya kulentsaba yaseGalile+ lapho Jesu abetsite batawuhlangana khona.+
17 Batsi nabambona bamkhotsamela, kodvwa labanye abakholwanga kutsi nguye.
18 Jesu wasondzela kubo, watsi: “Nginikwe lonkhe ligunya ezulwini nasemhlabeni.+
19 Ngako-ke hambani nente bantfu bato tonkhe tive babe bafundzi bami,+ nibabhabhatise+ egameni laBabe, neleNdvodzana, nelemoya longcwele,
20 nibafundzise kugcina konkhe lenginitjele kona.+ Nibowati kutsi mine nginani onkhe emalanga kuze kube sekupheleni kwalelive.”*+
Imibhalo lengentansi
^ Leli lilanga lamuhla lesilibita ngekutsi Lisontfo, futsi kumaJuda kwakungilo lilanga lekucala evikini.
^ Fundza Sandzisanchazo A5.
^ NgesiGriki kutsi, “sitamenta ayikholwe.”
^ Nobe “kwetikhatsi.” Fundza Tinchazelo Temagama.