Kuba ngcwele kusho kungabi mdzibi munye nanobe nguyiphi intfo lengcolile. Ligama lesiHebheru lelihunyushwe ngekutsi “ngcwele” livela esentweni lesitsi “hlukanisa.” Ngako, intfo lengcwele ihlukanisiwe etintfweni letivame kusetjentiswa, nome letibekelwe bungcwele, ikakhulukati nakubukwa kuhlanteka kwato kanye nebumsulwa bato.

 Nkulunkulu ungcwele ngelizinga leliphakeme kakhulu. LiBhayibheli litsi: “Kute longcwele njengaJehova.” a (1 Samuweli 2:2) Ngako ke, Nkulunkulu unelilungelo lekuncuma kutsi ngukuphi lokungcwele.

 Leligama lelitsi “ngcwele” lingasho nobe yini lecondzene naNkulunkulu ngalokucondzile, ikakhulukati tintfo letibekwe ngalokukhetsekile kutsi tisetjentiswe ekumkhonteni. Nati tibonelo liBhayibheli lelikhuluma ngato:

•   Tindzawo letingcwele: Nkulunkulu watjela Mosi lobekeme eceleni kwesihlahla lesivutsako, watsi: “Lendzawo lome kuyo ingumhlabatsi longcwele.”—Eksodusi 3:2-5.

•   Imibutsano lengcwele: Ema-Israyeli asendvulo bekakhonta Jehova emikhosini yaminyaka yonkhe lebeyibitwa ngekutsi ‘yimihlangano lengcwele.’—Levithikhusi 23:37.

•   Tintfo letingcwele: Tintfo lebetisetjentiswa ekukhonteni Nkulunkulu ethempelini lasendvulo eJerusalema betibitwa ngekutsi “tintfo letingcwele.” (1 Emakhosi 8:4) Letintfo letingcwele bekufanele tiphatfwe ngenhlonipho lenkhulu, futsi loku akusho kutsi take takhontwa. b

 Yebo, angaba ngcwele. Nkulunkulu uyala emaKhristu utsi: “Kufanele nibe ngcwele, njengobe nami ngingcwele.” (1 Phetro 1:16) Kuyavunywa, bantfu labanesono ngeke babengcwele ngelizinga laNkulunkulu. Nobe kunjalo, bantfu labalalela imitsetfo yaNkulunkulu lelungile kungashiwo kutsi ‘bangcwele futsi bayamukeleka kuNkulunkulu.’ (Roma 12:1) Umuntfu lolwela kuba ngcwele ukuveta kulakukhulumako kuphindze kubonakale nasetentweni takhe. Nasi sibonelo, lomuntfu angalalela seluleko lesiseBhayibhelini sekutsi ‘abe ngcwele futsi abalekele budlundlulu’ nangekutsi ‘abe ngcwele kuko konkhe kutiphatsa kwakhe.’—1 Thesalonika 4:3; 1 Phetro 1:15.

 Yebo kungenteka. Nangabe umuntfu ashiya indlela yaNkulunkulu yekutiphatsa, Nkulunkulu ngeke asambuka njengemuntfu longcwele. Nasi sibonelo saloko, incwadzi yeliBhayibheli yemaHebheru ibita labanye ngekutsi “bazalwane labangcwele,” kodvwa iphindze ibecwayise ngekutsi bangase babe ‘nenhlitiyo lembi nalete kukholwa ngekutsi bakhweshe kuNkulunkulu lophilako.’—Hebheru 3:1, 12.

 Lokungesilo liciniso: Kungashadi kwenta umuntfu abe ngcwele.

 Lokuliciniso: UmKhristu angase akhetse kungashadi, kodvwa akumenti abengcwele kuNkulunkulu. Kuyavunywa kutsi labo labakhetsa kungashadi bamkhonta kahle Nkulunkulu ngobe bete tintfo letibaphatamisako. (1 Khorinte 7:32-34) Nome kunjalo, liBhayibheli liphindze litsi nalabo labashadile bangaba ngcwele. Liciniso laloko, kutsi lomunye webaphostoli baJesu, Phetro, abeshadile.—Matewu 8:14; 1 Khorinte 9:5.