KHAOLO EA 15
Jesu ke Mang?
Jesu ke e mong oa batho ba tsebahalang ka ho fetisisa historing. Le hoja batho ba bangata ba tseba lebitso la hae, ha ba tsebe hakaalo ka eena ebile ba na le maikutlo a fapaneng ka hore na ha e le hantle ke mang. Bibele e re’ng ka Jesu?
1. Jesu ke mang?
Jesu ke lengeloi le matla ’me o phela leholimong. Jehova Molimo o mo bopile pele a ka bopa lintho tsohle. Ka lebaka leo, o bitsoa “letsibolo la popo eohle.” (Bakolose 1:15) Bibele e re Jesu ke mora “ea tsoetsoeng a ’notši” oa Molimo hobane ke eena feela eo Jehova a mo bopileng ka ho toba. (Johanne 3:16) Jesu o sebelitse haufi le Ntate oa hae Jehova a mo thusa ho bopa lintho tsohle. (Bala Liproverbia 8:30.) Jesu o ntse a e-na le kamano e ikhethang le Jehova. O sebetsa ka botšepehi e le ’muelli oa Molimo, e le “Lentsoe,” ho fetisa melaetsa le litaelo tsa Hae.—Johanne 1:14.
2. Ke hobane’ng ha Jesu a ile a tla lefatšeng?
Lilemo tse ka holimonyana ho 2 000 tse fetileng, Jehova o ile a etsa mohlolo a sebelisa moea o halalelang. O ile a tlosa bophelo ba Jesu leholimong a bo kenya popelong ea moroetsana ea bitsoang Maria. Kahoo, Jesu o ile a tsoaloa e le motho. (Bala Luka 1:34, 35.) Jehova o rometse Jesu lefatšeng hore e tl’o ba Mesia ea tšepisitsoeng kapa Kreste le hore a tl’o pholosa batho. a Boprofeta bohle bo buang ka Mesia bo ile ba phethahala ka Jesu ’me sena se ile sa thusa batho ho tseba hore ke “Kreste, Mora oa Molimo ea phelang.”—Matheu 16:16.
3. Jesu o hokae hona joale?
Ka mor’a hore Jesu a shoe e le motho oa nama, Molimo o ile a mo tsosa e se e le lengeloi ’me a khutlela leholimong. Ha a fihla, “Molimo . . . o ile a mo phahamisetsa boemong bo phahameng.” (Bafilipi 2:9) Hona joale, Jesu ke lengeloi le matla haholo ’me ke Jehova feela ea matla ho mo feta.
ITHUTE LINTLHA TSE LING
Ithute haholoanyane hore na ha e le hantle Jesu ke mang le hore na ke hobane’ng ha ho le bohlokoa ho ithuta ka eena.
4. Jesu ha se Molimo ea Matla ’Ohle
Bibele e ruta hore le hoja Jesu e le lengeloi le matla leholimong, o mamela ntate oa hae Jehova Molimo. Ke hobane’ng ha re cho joalo? Bapala VIDEO ho bona hore na Bibele e re Jesu o fapana joang le Molimo ea Matla ’Ohle.
Mangolo a latelang a re thusa ho utloisisa hore na Jehova le Jesu ba amana joang. Bala mangolo ana ebe le buisana ka lipotso tse latelang:
Bala Luka 1:30-32.
-
Lengeloi le ile la re Jesu o amana joang le Jehova Molimo “Ea Phahameng ka ho Fetisisa”?
Bala Matheu 3:16, 17.
-
Ha Jesu a kolobetsoa, lentsoe le ileng la hlaha leholimong le ile la re’ng?
-
U nahana lentsoe leo e ne e le la mang?
Bala Johanne 14:28.
-
Ke mang e moholo ho e mong le ea nang le matla a fetang a e mong? Na ke mora kapa ke ntate?
-
Jesu o ile a re Jehova ke Ntate oa hae. See se re ruta’ng?
Bala Johanne 12:49.
-
Na Jesu o nahana hore eena le Ntate oa hae ke motho a le mong? Uena u nahana’ng ka bona?
5. Bopaki bo bontšitseng hore Jesu ke Mesia
Ho na le boprofeta bo bongata ba Bibele bo buang ka Mesia, e leng ea khethiloeng ke Molimo ho pholosa batho. Boprofeta bona bo thusitse batho ho tseba Mesia. Bapala VIDEO e le hore u ithute ka bo bong ba boprofeta ba Bibele boo Jesu a ileng a bo phethahatsa ha a ne a le lefatšeng.
Bala boprofeta bona ba Bibele ebe le buisana ka lipotso tse latelang:
Bala Mikea 5:2 e le hore u bone hore na Mesia o ne a lokela ho hlahela hokae. b
-
Na ha Jesu a tsoaloa boprofeta boo bo ile ba phethahala?—Matheu 2:1.
Bala Pesaleme ea 34:20 le Zakaria 12:10 ho bona lintlha tse profetiloeng ka lefu la Mesia.
-
Na boprofeta boo bo ile ba phethahala? —Johanne 19:33-37.
-
Na u nahana hore Jesu o ne a ka khona ho etsa hore boprofeta boo bo phethahale?
-
See se u tiisetsa eng ka Jesu?
6. Re fumana molemo ha re ithuta ka Jesu
Bibele e re ho bohlokoa ho ithuta ka Jesu le hore na Molimo o batla hore a etse’ng. Bala Johanne 14:6 le 17:3 ebe le buisana ka potso ena:
-
Ke hobane’ng ha ho le bohlokoa ho ithuta ka Jesu?
Jesu o re buletse tsela ea hore re be metsoalle ea Molimo. O re rutile ’nete ka Jehova ’me ka eena re ka khona ho fumana bophelo bo sa feleng.
BATHO BA BANG BA RE: “Lipaki Tsa Jehova ha li lumele ho Jesu.”
-
U ka ba araba joang?
KAKARETSO
Jesu ke lengeloi le matla. Ke mora oa Molimo ebile ke Mesia.
Re Ithutile’ng?
-
Ke hobane’ng ha Jesu a bitsoa “letsibolo la popo eohle”?
-
Jesu o ne a etsa’ng pele a tla lefatšeng?
-
Re tseba joang hore Jesu ke Mesia?
BATLA
Ithute haholoanyane ka hore na re tseba joang hore Jesu ke Mesia.
“Na Boprofeta bo Buang ka Mesia bo Paka Hore Jesu e ne e le Mesia?” (Sehlooho se websaeteng)
Ithute hore na ehlile Bibele e re Molimo o bile le Jesu ka tsela eo batho ba tsoalang bana ka eona.
“Ke Hobane’ng ha Jesu a Bitsoa Mora oa Molimo?” (Sehlooho se websaeteng)
Ithute hore na ke hobane’ng ha thuto ea boraro-bo-teroneng e sa tsoe ka Bibeleng.
Bala hore na bophelo ba ’mè e mong bo ile ba fetoha joang ka mor’a hore a ithute hore na Bibele e ruta eng ka Jesu.
a Likhaolo tsa 26 le 27 li tla bua ka hore na ke hobane’ng ha batho ba hloka ho pholosoa le hore na Jesu o re pholosa joang.
b Sheba Tlhaloso ea bobeli e buang ka boprofeta ba hore na Jesu o ne a tla hlahella neng lefatšeng.
Mohlomong u ka Rata le
LIPOTSO TSE BOTSOANG HANGATA
Lenaneo la ho Ithuta Bibele le Lipaki Tsa Jehova
Ha u ithuta bukana ena ea U ka Thaba ka ho sa Feleng! u ka sebelisa Bibele e ’ngoe le e ’ngoe eo u nang le eona. U ka mema ba lelapa le metsoalle.
