Dada Barbara Osmyk-Urban, mama ambaye hana mwenzi anayeishi Rzeszów, Poland, alitumia kipindi cha Ibada ya Familia ya kila juma kuwafundisha watoto wake, Jakub mwenye umri wa miaka kumi, na Nina mwenye umri wa miaka minane, umuhimu wa kuwakaribisha wageni na kuwa na hisia-mwenzi. Familia hiyo ilianza kutumia mambo hayo waliyojifunza. Tangu vita vilipoanza nchini Ukrainia Februari 24, 2022, wamewapa makao zaidi ya ndugu na dada 20.

Akina ndugu na dada wanapokimbia kutoka nchini Ukrainia na kwenda kwenye maeneo salama zaidi, Mashahidi nchini Poland na katika nchi nyingine wanawakaribisha nyumbani kwao au wanajitolea kusaidia katika njia nyingine. Kufikia leo, angalau Mashahidi 11,000 kutoka nchini Ukrainia wamekimbilia Poland. Wakati wa vita hivyo, wanaume wa Ukrainia walio na umri wa kati ya miaka 18 na 60 hawajaruhusiwa kuondoka nchini. Hata hivyo, wanaume walio na angalau watoto watatu wadogo wanaruhusiwa kuondoka.

Barbara anasema hivi: “Wakimbizi hao kutoka nchini Ukrainia ni familia yetu ya kiroho.” Watoto wake pia wanaonyesha kwamba wanawapenda akina ndugu. Jakub na Nina walikuwa tayari kutoka katika vyumba vyao ili kuwaruhusu akina ndugu walale humo. Ingawa hawajui lugha yao, wamekuwa wakiwasiliana kwa kutabasamu, kukumbatiana, na kutoa machozi. Wakimbizi walipoondoka, Jakub alisema kwamba nyumba imenyamaza sana na akamuuliza mama yake ikiwa wanaweza kuwaalika ndugu na dada wengine.

Ndugu Łukasz Cholewiński na Rafał Jankowski wanajitolea kusafirisha msaada nchini Ukrainia. Ndugu hao wanasema kwamba wao huwaona wanawake wengi walio na watoto wakilia huku wakisubiri kuvuka mpaka ili kupata usalama. Łukasz anasema hivi: “Inashangaza kwamba tunapokutana na ndugu na dada zetu, wao huwa na shangwe.”

Safari ya kwenda na kurudi kutoka Ukrainia inaweza kuchukua saa nne hivi. Mara tu msaada huo unapofika, akina ndugu nchini Ukrainia huusambaza nchini kote. Kuna wajitoleaji wengi sana ambao wako tayari kusafirisha msaada huo licha ya hatari zilizopo. Rafał anasema hivi: “Ni heshima na pendeleo kubwa kusaidia.”

Dada Elżbieta Ustrzycka, anayeishi Rzeszów, anafafanua jinsi anavyowakaribisha Mashahidi wa Ukrainia nyumbani kwake: “Niliguswa moyo sana na wazee wa kutaniko langu ambao walileta familia hizo kwangu, kuwaona wakiingia wakiwa wamewabeba watoto wadogo waliolala mikononi mwao saa sita usiku. Picha hiyo haitaondoka akilini mwangu kwa muda mrefu sana.”

Ndugu Bartłomiej Figura ni mmoja kati ya wazee wanaofanya kazi kwa bidii. Yeye na mke wake, Estera, husafiri kwenda mpakani au kwenye vituo vya gari-moshi ili kuwasafirisha Mashahidi wenzao hadi kwenye maeneo salama. Pindi nyingine, wenzi hao wa ndoa hutafuta mahali pengine pa kulala ili ndugu zao walale nyumbani kwao. Pia wao huwasaidia kimwili ndugu zao wanapoweza kufanya hivyo.

Bartłomiej anasema hivi: “Sisi ni familia moja ya kiroho. Tunajihisi tukiwa karibu sana na ndugu na dada hao. Kwa kujitoa, mara nyingi tunajionea jinsi Yehova anavyotimiza uhitaji hususa wa waabudu wenzetu.”

Kufikia leo, ndugu zetu nchini Poland wametayarisha vifurushi 23,000 hivi vinavyotia ndani chakula, bidhaa za usafi, na vitu vingine.

Tuna uhakika kwamba Yehova ataendelea kushughulikia mahitaji ya ndugu na dada zetu nchini Ukrainia huku waabudu wenzetu wakiendelea kutoa kwa ukarimu.​—Methali 11:24; Waroma 12:13.