Segundu Korinto 5:1-21
5 Ita hatene katak ita-nia uma iha mundu neʼe,* katak tenda neʼe, sei harahun* tiha,+ no Maromak sei fó uma ida ba ita, uma neʼebé hela ba nafatin iha lalehan, neʼebé laʼós ema nia liman mak halo.+
2 Tanba iha ita-nia uma* agora nian ita halerik, no ita hakarak namanas atu simu fali uma* neʼebé prepara ona ba ita iha lalehan,+
3 atu nuneʼe, kuandu ita uza ona ida-neʼe, ita la sai isin-tanan tan.
4 Tuir loloos, ita neʼebé sei hela iha tenda neʼe halerik no sente todan tebes. Neʼe laʼós tanba ita hakarak hasai tenda neʼe, maibé tanba ita hakarak tau fali ida seluk,+ hodi nuneʼe moris bele tolan tiha buat neʼebé sei mohu.+
5 Maromak mak prepara ona ida-neʼe ba ita.+ Nia fó ona ninia espíritu ba ita nuʼudar garantia* kona-ba buat neʼebé atu mai.+
6 Entaun, ita sempre aten-brani no hatene katak bainhira ita sei hela iha isin neʼe,* ita dook husi Naʼi,+
7 tanba ita laʼo tuir fiar, laʼós tuir buat neʼebé ita haree.
8 Maibé ita aten-brani no hakarak liu atu husik isin neʼe no halo ita-nia uma ho Naʼi.+
9 Tan neʼe, maski ita hela ho nia ka dook husi nia, ita-nia hakarak mak atu nia simu ita.
10 Tanba ita hotu tenke hamriik iha Kristu nia kadeira tesi-lia nia oin, atu nuneʼe ema ida-idak simu kolen tuir buat neʼebé nia halo kuandu nia moris iha isin neʼe, maski nia halo buat neʼebé diʼak ka aat.+
11 Tanba ami hatene atu hamtaʼuk Naʼi, ami kontinua book ema seluk atu fiar, no Maromak hatene didiʼak ami. Maibé, haʼu iha esperansa katak imi-nia konxiénsia ajuda imi atu hatene didiʼak kona-ba ami.
12 Ami lakohi tan atu gaba an ba imi, maibé ami koʼalia buat sira-neʼe ba imi hodi imi bele koʼalia ho orgullu kona-ba ami, atu nuneʼe imi bele hatán ba sira neʼebé gaba deʼit buat neʼebé iha liʼur+ maibé la gaba kona-ba buat neʼebé iha laran.
13 Tanba se ami bulak ona karik,+ ida-neʼe ba Maromak. Se ami-nia neon moos, ida-neʼe ba imi.
14 Tanba Kristu nia domin book ami makaʼas, tanba razaun neʼe mak ami hatene katak mane ida mate ba ema hotu;+ entaun neʼe katak ema hotu mate ona.
15 Nia mate ba ema hotu atu nuneʼe sira neʼebé moris la moris tan ba sira-nia an rasik,+ maibé moris ba ida neʼebé mate ba sira no moris hiʼas ona.
16 Entaun, husi ohin ba oin ami la haree tan ema husi liʼur deʼit.+ Maski uluk ami hatene Kristu nuʼudar ema, maibé agora ami labele hatene tan nia iha dalan hanesan neʼe.+
17 Tan neʼe, se ema ruma sai ida deʼit ho Kristu, nia mak kriasaun foun ida;+ buat tuan sira liu tiha ona, no buat foun sira mosu ona.
18 Maibé buat hotu husi Maromak, neʼebé halo ami hadame malu fali ho nia liuhusi Kristu+ no fó ami serbisu hadame malu nian,+
19 katak Maromak halo mundu hadame malu ho nia liuhusi Kristu,+ hodi la sura sira-nia sala.+ Nia fó fiar ba ami hodi ami haklaken mensajen hadame malu nian.+
20 Tan neʼe ami mak embaixadór+ neʼebé reprezenta Kristu,+ neʼe hanesan Maromak bolu ema liuhusi ami. Nuʼudar embaixadór neʼebé reprezenta Kristu, ami husu hodi dehan: “Hadame malu ho Maromak bá.”
21 Ida neʼebé la hatene sala,+ Maromak halo nia sai nuʼudar sakrifísiu* ba ita-nia sala, atu nuneʼe liuhusi nia ita bele sai ema laran-loos iha Maromak nia oin.+
Nota-rodapé
^ Ka “sobu; dodok”.
^ Liafuan “uma” ka “hela-fatin”, neʼe uza atu reprezenta isin nuʼudar ema ka isin espíritu nian.
^ Ka “hela-fatin”.
^ Ka “hela-fatin”.
^ Ka “fó ona ninia espíritu hanesan osan balu neʼebé selu ona nuʼudar garantia”.
^ Orj., “bainhira ita sei iha ita-nia uma neʼe”.
^ Ka “sakrifísiu sala nian”.
