Josué 1:1-18
1 Bainhira Jeová nia atan Moisés mate tiha ona, Jeová hatete ba Nun nia oan-mane Josué,*+ Moisés nia atan,+ hodi dehan:
2 “Haʼu-nia atan Moisés mate ona.+ Agora, ó no povu sira-neʼe hotu hamriik bá, hakur Mota Jordaun neʼe, no tama ba rai neʼebé haʼu sei fó ba povu Izraél.+
3 Haʼu sei fó ba imi fatin hotu neʼebé imi-nia ain sama bá, hanesan haʼu promete ona ba Moisés.+
4 Imi-nia rai komesa husi rai-fuik toʼo Líbanu no toʼo mota boot, Mota Eufrates, katak ema Hetes nia rai tomak,+ no toʼo Tasi Boot* neʼebé iha parte oeste.*+
5 La iha ema ida mak sei manán ó durante ó-nia moris tomak.+ Haʼu sei hamutuk ho ó+ hanesan uluk haʼu hamutuk ho Moisés. Haʼu sei la hadook an no la husik ó.+
6 Sai aten-brani no sai forte bá,+ tanba ó mak sei lori povu neʼe atu hela iha rai neʼebé haʼu jura ona ba sira-nia beiʼala atu fó ba sira nuʼudar liman-rohan.+
7 “Ó tenke sai aten-brani no sai forte tebes, no halo tuir ho didiʼak Ukun-Fuan hotu neʼebé haʼu-nia atan Moisés fó sai ona ba ó. Keta laʼo sees ba liman-loos ka liman-karuk,+ atu nuneʼe ó bele hatudu matenek iha buat hotu neʼebé ó halo.+
8 Livru Ukun-Fuan nian neʼe tenke nafatin iha ó-nia ibun,+ no ó tenke lee no medita* loron no kalan, atu nuneʼe ó bele halo tuir ho didiʼak liafuan hotu neʼebé hakerek iha laran;+ hodi halo nuneʼe mak ó sei hetan susesu iha ó-nia dalan sira no ó sei hatudu hahalok neʼebé matenek.+
9 Haʼu fó ona mandamentu ba ó, loos ka lae? Sai aten-brani no sai forte bá. Keta nakdedar ka taʼuk, tanba Jeová, ó-nia Maromak, mak hamutuk ho ó iha fatin hotu neʼebé ó sei bá.”+
10 Tuirmai Josué haruka povu nia ulun-naʼin sira, hodi dehan:
11 “Laʼo liu povu nia hela-fatin no fó sai mandamentu neʼe ba povu, hodi dehan: ‘Prepara imi-nia ai-han, tanba iha loron tolu tan ita sei hakur Mota Jordaun hodi tama no foti rai neʼebé Jeová, ita-nia Maromak, sei fó ba ita nuʼudar ita-nian.’”+
12 Josué mós dehan ba suku Ruben, suku Gad, no suku Manasés nia sorin balu:
13 “Hanoin-hetan buat neʼebé uluk Jeová nia atan Moisés hatete ba imi:+ ‘Jeová, imi-nia Maromak, sei halo imi moris hakmatek no fó ona rai neʼe ba imi.
14 Imi-nia feen, imi-nia oan sira no imi-nia animál-hakiak sira sei hela iha rai neʼebé Moisés fó ona ba imi iha Mota Jordaun nia sorin neʼe,*+ maibé imi funu-naʼin hotu neʼebé kbiit boot+ tenke hakur uluk mota neʼe iha imi-nia maun-alin sira-nia oin hanesan tropa.+ Imi tenke ajuda sira
15 toʼo Jeová halo ona imi-nia maun-alin sira moris hakmatek hanesan nia halo ba imi, no toʼo sira mós foti ona rai neʼebé Jeová, imi-nia Maromak, sei fó ba sira. Depois neʼe mak imi bele fila fali ba rai neʼebé Maromak fó ona ba imi atu hela no imi bele foti rai neʼe nuʼudar imi-nian, katak rai neʼebé Jeová nia atan Moisés fó ba imi iha Mota Jordaun nia sorin parte leste.’”+
16 Sira hatán ba Josué: “Ami sei halo tuir buat hotu neʼebé Ita-Boot hatete, no ami sei laʼo ba fatin hotu neʼebé Ita haruka ami atu bá.+
17 Ami sei rona ba Ita hanesan mós uluk ami rona ba buat hotu neʼebé Moisés hatete. Ami hein katak Jeová, Ita-Boot nia Maromak, sei hamutuk ho Ita hanesan uluk nia hamutuk ho Moisés.+
18 Ema neʼebé kontra hasoru Ita-nia mandamentu no la halo tuir liafuan hotu neʼebé Ita fó sai, ema neʼe tenke mate.+ Maibé Ita-Boot tenke sai aten-brani no sai forte bá.”+
Nota-rodapé
^ Ka “Jeosué”, naran neʼe katak “Jeová mak fó salvasaun”.
^ Neʼe katak Tasi Mediterráneu.
^ Ka “fatin neʼebé loro-matan monu”.
^ Ka “lee ho lian neineik”.
^ Neʼe katak sorin parte leste.
