JOÃO nia aman hetan batizmu hodi sai Testemuña ba Jeová antes atu tama ba tinan 1960, iha knua kiʼik ida naran Gujarat, rai-Índia. Maibé João ho ninia biin no alin naʼin-lima no mós ninia inan iha fiar metin ba relijiaun katólika. Tan neʼe sira kontra sira-nia aman nia fiar.

Loron ida João nia aman husu nia atu lori envelope ida ba irmaun ida. Maibé iha dadeer neʼe João loke hela bidón no bidón koʼa ninia liman-fuan. Maski nuneʼe, tanba nia rona ninia aman, nia uza deʼit hena ida hodi falun ninia liman neʼebé raan hela no lori envelope neʼe bá.

Bainhira João toʼo iha neʼebá, irmaun neʼe nia feen neʼebé Testemuña ba Jeová mak simu envelope neʼe. Nia haree João nia liman kanek no nia husu atu ajuda João. Nia hamoos tiha kanek neʼe, depois falun João nia liman ho ligadura. Tuirmai nia halo xá ba João atu hemu. Bainhira nia halo hela buat sira-neʼe, nia mós koʼalia ho respeitu ba João kona-ba Bíblia.

Ninia laran-diʼak neʼe book João troka ninia hanoin kona-ba Testemuña ba Jeová. João husu pergunta rua ba nia kona-ba Testemuña ba Jeová nia fiar neʼebé la hanesan ho igreja katólika. João husu kona-ba Jesus mak Maromak no ema kristaun tenkesér reza ba Maria. Irmán neʼe hatene koʼalia João nia lian, tan neʼe nia hatán João nia pergunta sira iha João nia língua. Nia uza Bíblia hodi hatán João nia pergunta sira no fó livru kiʼik ida ba nia kona-ba Bíblia, “This Good News of the Kingdom”.

Iha tempu João lee livru neʼe, nia rekoñese katak neʼe mak lia-loos. Nia bá buka padre hodi husu pergunta rua neʼebé hanesan. Padre neʼe sai hirus tebes no nia foti Bíblia tuda João no hakilar: “Ó sai ona Satanás! Hatudu mai haʼu, iha neʼebé mak Bíblia hatete katak Jesus laʼós Maromak. Hatudu mai haʼu, iha neʼebé mak Bíblia hatete katak Ita labele adora Maria. Hatudu toʼok mai haʼu!” João hakfodak tanba padre nia hahalok neʼe. Nia hatete ba padre neʼe katak nia sei nunka sama tan igreja. João para duni husi tempu neʼebá!

João hahú estuda ho Testemuña, simu lia-loos, no komesa serbí Jeová. Tempu balu liutiha, ema balu husi ninia família mós simu lia-loos. Maizumenus tinan 60 liu ona, maibé fitar iha João nia liman-fuan fó-hanoin nafatin ba nia katak, ho ema kristaun nia hahalok laran-diʼak mak book nia atu uza ninia moris hodi serbí Jeová.—2 Korinto 6:4, 6.