Obrigadu tanba Ita-Boot interese atu halo reportajen kona-ba Testemuña ba Jeová nia atividade sira. Ami prepara informasaun tuirmai atu ajuda Ita-Boot hatene ortografia no signifikadu husi liafuan sira neʼebé ami uza iha ami-nia organizasaun. Se Ita-Boot iha pergunta ruma kona-ba liafuan neʼebé seidauk temi iha neʼe, bele kontaktu sukursál husi Testemuña ba Jeová.

asembleia. Neʼe mak reuniaun neʼebé halaʼo tinan ida dala rua ho objetivu atu ajuda ema hakbesik liután ba Maromak, no ema hotu bele asiste. Reuniaun neʼe halaʼo durante loron ida no kongregasaun balu husi Testemuña ba Jeová halibur hamutuk atu tuir reuniaun neʼe. Informasaun neʼebé fó sai iha asembleia neʼe bele ajuda ema ho idade oioin atu hetan benefísiu husi Bíblia nia matadalan. Iha mós drama kiʼik sira neʼebé hatudu oinsá atu halo tuir Bíblia nia prinsípiu sira iha moris loroloron nian. Baibain Testemuña ba Jeová aluga fatin ruma ka uza Reuniaun-Fatin atu halaʼo asembleia sira-neʼe. Iha rai balu, halaʼo iha Salaun ba Asembleia husi Testemuña ba Jeová. Programa neʼe mós bele haree online. Asembleia sira-neʼe baibain halaʼo iha findesemana. Ema la presiza selu atu asiste reuniaun neʼe no ami mós la husu ezmola.

atan ba kongregasaun. Neʼe mak mane Testemuña ida neʼebé maduru iha dalan espirituál no iha knaar atu ajuda katuas sira tau matan ba kongregasaun. Atu serbí nuʼudar atan ba kongregasaun, nia tenke kumpre kritériu neʼebé temi iha 1 Timóteo 3:8-10, 12, 13 no Tito 2:6-8. Atan ba kongregasaun halaʼo knaar sira atu buat hotu iha kongregasaun bele laʼo ho diʼak. Sira la simu saláriu no sira laʼós serbisu-naʼin ba sira-nia kongregasaun ka ba asosiasaun ruma neʼebé liga ho Testemuña ba Jeová. Atan ba kongregasaun barak tenke serbisu atu bele sustenta sira-nia an no sira-nia família. Irmaun sira-neʼe dala ruma ikusmai bele kumpre kritériu atu serbí nuʼudar katuas ba kongregasaun. Liafuan neʼe la uza nuʼudar títulu espesiál atu fó hahiʼi ba ema.

Betel, ema Betel, família Betel. “Betel” mak liafuan Ebraiku ida neʼebé signifika “Maromak nia uma”. Neʼe mak naran ba fasilidade sira neʼebé Testemuña ba Jeová uza atu organiza atividade espirituál sira iha rai ka área ida-idak. Sira neʼebé serbí iha fatin sira-neʼe mak parte ba orden relijiozu husi Testemuña ba Jeová no bolu nuʼudar “ema Betel”. Sira la simu saláriu. Nuʼudar grupu, bolu sira nuʼudar “família Betel”, tanba hanesan família ida, sira adora Maromak hamutuk, no mós serbisu no hela hamutuk. Liafuan “ema Betel” la uza nuʼudar títulu espesiál atu fó hahiʼi ba ema.

Bíblia Sagrada Tradusaun Mundu Foun. Neʼe mak títulu kompletu ba Eskritura Lian Ebraiku (“Testamentu Tuan”) no mós Eskritura Lian Gregu (“Testamentu Foun”) neʼebé Testemuña ba Jeová mak tradús no publika. Neʼe bele mós temi nuʼudar Tradusaun Mundu Foun.

Gilead, Eskola Gilead. Neʼe refere ba eskola Watchtower Bible School of Gilead, neʼebé hahú iha tinan 1943. Foufoun eskola neʼe nia objetivu mak atu fó treinu ba misionáriu sira. Agora daudaun, Testemuña ba Jeová neʼebé simu konvite atu tuir eskola Gilead, sei simu kursu espesiál kona-ba Bíblia ba fulan lima. Se liafuan “eskola” la hakerek hamutuk ho liafuan “Gilead”, entaun letra primeiru tenke kiʼik.

Grupu Administradór husi Testemuña ba Jeová. Neʼe mak grupu kiʼik ida ho katuas sira neʼebé iha knaar atu tau matan Testemuña ba Jeová nia presiza espirituál iha mundu tomak. Dala barak habadak sai “Grupu Administradór”.Sira tau matan ba serbisu atu prepara publikasaun sira neʼebé bazeia ba Bíblia. Maski Grupu Administradór mak dirije Testemuña ba Jeová nia atividade sira iha mundu tomak, maibé sira rekoñese katak só Jesus Kristu mak ulun-naʼin ba Testemuña ba Jeová. Grupu Administradór nia eskritóriu sira mak iha sede-jerál husi Testemuña ba Jeová iha Warwick, Novaiorke, EUA.

haklaken-naʼin. Ema neʼebé hola parte iha haklaken públiku hamutuk ho Testemuña ba Jeová nia kongregasaun ida. Atu ema ida sai haklaken-naʼin, nia tenke komprende no fiar Bíblia nia hanorin báziku no moris tuir Maromak nia prinsípiu sira. Haklaken-naʼin sira la simu saláriu atu haklaken no sira laʼós serbisu-naʼin ba sira-nia kongregasaun ka ba asosiasaun ruma neʼebé liga ho Testemuña ba Jeová. Pioneiru barak tenke serbisu atu bele sustenta sira-nia an. Liafuan neʼe la uza nuʼudar títulu espesiál atu fó hahiʼi ba ema.

irmán. Feto ida neʼebé hetan ona batizmu nuʼudar Testemuña ba Jeová. Liafuan neʼe mós uza iha dalan formál hamutuk ho ema nia naran (porezemplu, irmán Maria). Kuandu koʼalia ba mane neʼebé Testemuña, uza liafuan neʼebé atu hanesan (porezemplu, irmaun João). Liafuan neʼe la uza nuʼudar títulu espesiál atu fó hahiʼi ba ema.

irmaun. Neʼe mak mane ida neʼebé hetan ona batizmu nuʼudar Testemuña ba Jeová. Liafuan neʼe mós uza iha dalan formál hamutuk ho ema nia naran (porezemplu, irmaun João). Kuandu koʼalia ba feto neʼebé Testemuña, uza liafuan neʼebé atu hanesan (porezemplu, irmán Maria). Liafuan neʼe la uza nuʼudar títulu espesiál atu fó hahiʼi ba ema.

Jeová. Neʼe mak naran ba Maromak kbiit boot liu hotu no Kriadór hanesan fó sai iha Eskritura sira. (Salmo 83:18) Naran “Jeová” la uza atu refere ba Testemuña ba Jeová ida, porezemplu, labele dehan “Jeová ida”.

Jesus Kristu. Maromak nia Oan-Mane mesak. (João 3:16) Testemuña ba Jeová haree Jesus Kristu nuʼudar sira-nia Ulun-Naʼin. Ami hakaʼas an atu halo tuir ninia ezemplu no aplika ninia hanorin iha moris loroloron nian. Ami haree Jesus Kristu nuʼudar ema neʼebé importante liu iha mundu neʼe, Jeová nia Testemuña neʼebé boot liu, no ida neʼebé Maromak Jeová sei uza atu salva ema.—Isaias 9:6, 7; Apokalipse 1:5.

katuas área. Neʼe mak katuas kongregasaun ho esperiénsia barak neʼebé vizita kongregasaun hotu iha área ida hamutuk ho ninia feen (se nia kaben ona), baibain tinan ida dala rua. Katuas área simu sira-nia knaar no matadalan husi sukursál. Sira anima irmaun-irmán sira iha kongregasaun ida-idak no mós fó anima no matadalan sira ba katuas no atan ba kongregasaun. Katuas área prepara programa espesífiku atu hanorin kongregasaun ida-idak. Liafuan neʼe la uza nuʼudar títulu espesiál atu fó hahiʼi ba ema.

katuas kongregasaun. Neʼe mak mane Testemuña ida neʼebé maduru iha dalan espirituál no iha knaar atu hanorin no tau matan ba ema iha kongregasaun. Katuas ida tenke kontinua kumpre kritériu sira neʼebé temi iha 1 Timóteo 3:1-7; Tito 1:5-9; Tiago 3:17, 18; no 1 Pedro 5:2. Katuas sira la simu saláriu no sira laʼós serbisu-naʼin ba sira-nia kongregasaun ka asosiasaun ruma neʼebé liga ho Testemuña ba Jeová. Katuas barak tenke serbisu atu bele sustenta sira-nia an no sira-nia família. Testemuña sira la iha pozisaun iha kongregasaun no katuas sira la boot liu fali ema seluk iha kongregasaun. Liafuan neʼe la uza nuʼudar títulu espesiál atu fó hahiʼi ba ema.

Komisaun ba Sukursál. Iha sukursál ida-idak, iha katuas kongregasaun naʼin-tolu ka liu neʼebé hetan knaar atu sai membru ba komisaun neʼe. Sira dirije atividade iha rai sira neʼebé sukursál neʼe tau matan.

kongregasaun. Neʼe mak grupu Testemuña sira neʼebé organizadu no halibur hamutuk beibeik atu adora Maromak. Grupu katuas mak iha responsabilidade atu dirije programa oioin hodi hanorin no fó matadalan husi Bíblia ba kongregasaun tomak no mós ba ema ida-idak. Ema hotu bele asiste reuniaun neʼebé halaʼo iha kongregasaun ida-idak. Ema la presiza selu atu asiste reuniaun sira-neʼe no ami mós la husu ezmola.

Livru Haklaken Fó Sai Maromak nia Ukun. Neʼe mak títulu kompletu ba revista prinsipál neʼebé Testemuña ba Jeová publika no fahe. Mós bele temi deʼit nuʼudar Livru Haklaken. Revista neʼe ajuda ema atu matan-moris nafatin kona-ba oinsá Maromak nia hakarak sira sai loos. (Mateus 24:42) Livru Haklaken edisaun públiku fahe gratuitu ba ema neʼebé interese. Livru Haklaken edisaun estudu nian uza atu halaʼo diskusaun pergunta ho resposta semana-semana iha kongregasaun sira. Livru Haklaken iha lian Inglés publika husi tinan 1879 no kontinua toʼo agora. Neʼe mak revista ida neʼebé fahe ba ema barak tebes iha mundu tomak.

Matan-moris bá! Neʼe mak revista ida neʼebé Testemuña ba Jeová mak publika no fahe. Revista neʼe foufoun iha naran The Golden Age no hahú publika iha tinan 1919. Iha tinan 1937 títulu troka ba Consolation. Iha loron 22 Agostu 1946, naran troka fali ba Awake! (Matan-moris bá!) atu énfaze ba lee-naʼin sira katak agora ita moris daudaun iha tempu neʼebé mak importante tebes. Neʼe mak revista ida neʼebé fahe ba ema barak tebes iha mundu tomak.

Memoriál kona-ba Kristu nia mate. Neʼe mak komemorasaun neʼebé halaʼo tinan-tinan atu hanoin-hetan Jesus Kristu nia mate. Neʼe mós bolu nuʼudar Naʼi nia Han-Kalan, Naʼi nia Han-Kalan ikus, Memoriál, ka Memoriál ba Jesus nia mate. Testemuña ba Jeová haree komemorasaun neʼe nuʼudar ida neʼebé importante liu iha tinan ida nia laran no neʼe mak serimónia ida deʼit neʼebé Kristu haruka ninia dixípulu sira atu komemora.—Lucas 22:19, 20.

misionáriu. Haklaken-naʼin neʼebé batizmu ona neʼebé hetan knaar husi Grupu Administradór husi Testemuña ba Jeová atu bá área oioin iha mundu tomak. Misionáriu sira prontu atu husik sira-nia uma no dala ruma muda ba rai seluk atu fahe liafuan diʼak kona-ba Maromak nia Ukun.—Mateus 24:14.

pioneiru. Neʼe mak Testemuña ida neʼebé deside atu uza oras ho kuantidade neʼebé determina ona iha serbisu haklaken. Baibain liafuan neʼe refere ba “pioneiru regulár”, sira neʼebé fó oras 600 tinan-tinan (neʼe katak fulan-fulan oras 50) ba serbisu haklaken. Dala ruma liafuan neʼe refere ba “pioneiru estra”, neʼe mak ema neʼebé fó oras 15 ka 30 ba fulan ida ka liu tuituir malu. Pioneiru sira la simu saláriu ba sira-nia haklaken no sira laʼós serbisu-naʼin ba sira-nia kongregasaun ka ba asosiasaun ruma neʼebé liga ho Testemuña ba Jeová. Pioneiru barak tenke serbisu atu bele sustenta sira-nia an. Liafuan neʼe la uza nuʼudar títulu espesiál ruma atu fó hahiʼi ba ema.

reuniaun boot sira. Haree: reuniaun boot, reuniaun boot internasionál no asembleia.

reuniaun boot. Neʼe mak reuniaun neʼebé halaʼo tinan ida dala ida no ho objetivu atu ajuda ema hakbesik liután ba Maromak. Kongregasaun balu husi Testemuña ba Jeová sei halibur hamutuk atu tuir reuniaun neʼe, neʼebé laʼo durante loron tolu. Ema husi públiku benvindu atu asiste. Programa neʼe inklui sujestaun sira oinsá ema ho idade oioin bele hetan benefísiu husi Bíblia nia matadalan. Iha drama sira kona-ba situasaun loroloron nian no kona-ba Bíblia nia tempu neʼebé hatudu oinsá atu halo tuir Bíblia nia prinsípiu sira. Baibain reuniaun boot sira halaʼo iha fatin neʼebé aluga hanesan salaun, estádiu ka sentru konvensaun sira. Reuniaun boot balu mós bele halaʼo iha Salaun ba Asembleia husi Testemuña ba Jeová. Baibain, reuniaun boot sira-neʼe halaʼo husi loron-sesta toʼo domingu. Foin daudauk, bele mós hetan gravasaun online. Hanesan Testemuña ba Jeová nia reuniaun sira seluk, ema la presiza selu atu asiste reuniaun neʼe no ami mós la husu ezmola.

reuniaun boot internasionál. Neʼe mak reuniaun neʼebé halaʼo durante loron tolu husi Testemuña ba Jeová hodi adora Maromak no simu hanorin husi Bíblia. Reuniaun boot internasionál halaʼo kada tinan balu. Testemuña sira husi rai oioin hetan konvite atu asiste nuʼudar delegadu. Reuniaun sira-neʼe ho objetivu atu ajuda ema sai besik ba Maromak, no mós atu hametin Testemuña ba Jeová nia unidade. Baibain Testemuña ba Jeová halaʼo reuniaun sira-neʼe iha fatin neʼebé sira aluga husi loron-sesta toʼo domingu, no ema hotu bele asiste reuniaun sira-neʼe. Ema la presiza selu atu asiste reuniaun neʼe no ami mós la husu ezmola.

Reuniaun-Fatin husi Testemuña ba Jeová. Neʼe mak fatin adorasaun neʼebé kongregasaun ida ka liu mak uza. Baibain temi deʼit nuʼudar “Reuniaun-Fatin”. Favór labele uza liafuan “igreja”.

reuniaun loron baileet. Neʼe mak reuniaun iha loron baileet neʼebé halaʼo semana-semana, no baibain iha lokraik. Reuniaun neʼe fahe ba parte tolu no hanaran Moris Kristaun no Haklaken. Objetivu mak atu ajuda Testemuña sira haklaken Maromak nia Liafuan ho diʼak liután. Hanesan Testemuña ba Jeová nia reuniaun sira hotu, tuir reuniaun neʼe oin ba oin ka liuhusi vídeo konferénsia mak gratuitu deʼit no ami la husu ezmola.

reuniaun públiku. Reuniaun neʼebé halaʼo iha kongregasaun semana-semana, baibain iha loron-sábadu ka domingu. Reuniaun neʼe inklui diskursu kona-ba Bíblia neʼebé laʼo ba minutu 30 no hatoʼo liuliu ba públiku. Tuirmai, baibain iha Estudu Livru Haklaken, neʼe mak diskusaun ba oras ida neʼebé halaʼo ho pergunta no resposta neʼebé bazeia ba tópiku husi Bíblia, hodi uza lisaun husi Livru Haklaken edisaun estudu nian. Hanesan Testemuña ba Jeová nia reuniaun sira hotu, atu tuir reuniaun neʼe ka tuir liuhusi konferénsia vídeo mak gratuitu deʼit no la husu ezmola.

Salaun ba Asembleia husi Testemuña ba Jeová. Neʼe mak fatin boot ida husi Testemuña ba Jeová neʼebé uza atu halaʼo adorasaun. Kongregasaun sira husi área espesífiku ruma sei uza salaun neʼe tuir tempu. Fatin neʼe mós bele refere nuʼudar “Salaun ba Asembleia”.

serbisu haklaken. Neʼe mak atividade neʼebé Testemuña ba Jeová halo hodi tuir Jesus nia mandamentu atu “haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu.”—Mateus 24:14; 28:19.

sukursál. Neʼe mak sentru administrativu neʼebé Komisaun ba Sukursál uza atu apoia no dirije atividade espirituál husi Testemuña ba Jeová iha rai ida ka liu.

Testemuña ba Jeová. Neʼe mak grupu Kristaun ida neʼebé adora Maromak Jeová no uza tempu atu apoia edukasaun kona-ba Bíblia liuhusi dalan oioin. Objetivu husi ami-nia haklaken mak atu fahe liafuan diʼak kona-ba Maromak nia Ukun ka governu. (Mateus 24:14) Naran neʼe halo ami diferente husi relijiaun sira seluk. Naran neʼe refere ba Maromak neʼebé ami reprezenta, no mós serbisu voluntáriu neʼebé ami halo iha Maromak nia naran. Ema ida haree nuʼudar Testemuña ba Jeová se nia iha komprensaun neʼebé natoon kona-ba Bíblia nia hanorin sira, kumpre kritériu atu hola parte iha serbisu haklaken hamutuk ho kongregasaun, no hetan ona batizmu neʼebé hatudu katak nia dedika an ona ba Maromak Jeová. Kuandu atu temi ba dala primeiru iha artigu ruma, favór uza naran kompletu “Testemuña ba Jeová”. Bele mós uza liafuan “Testemuña sira”. Kuandu koʼalia kona-ba ema ida deʼit, uza “Testemuña ida”, ka “ema ida husi Testemuña ba Jeová”. Favór labele uza “Jeová sira”.—Isaias 43:10.

ATENSAUN: Kuandu temi Testemuña ba Jeová ba dala primeiru, favór uza naran kompletu. Atu hetan informasaun liután, haree: Testemuña ba Jeová.