Ema barak hetan anima kuandu lee informasaun husi Notísias JW kona-ba oinsá irmaun-irmán sira iha rai-Rúsia laran-metin nafatin maski ema kontra sira. Iha Timor-Leste, iha deʼit informasaun tolu neʼebé tradús ona ba lian Tetun Dili. Informasaun ida mak irmaun Andrey Suvorkov nia esperiénsia. Loron balu depois informasaun neʼe fó sai iha lian Tetun Dili, joven naʼin-lima neʼebé batizmu ona hasoru situasaun susar neʼebé koko sira-nia fiar. Sira esplika katak hodi medita kona-ba irmaun Andrey Suvorkov nia esperiénsia, neʼe hametin sira-nia fiar.

Durante serimónia hasaʼe bandeira iha eskola, mestre sira haruka joven Testemuña naʼin-lima neʼe atu kontinénsia bandeira. Bainhira joven sira-neʼe lakohi, mestre sira lori sira ba hasoru diretór. Diretór husu pergunta barak ba joven sira-neʼe iha mestre sira-nia oin. Ho aten-brani no respeitu joven sira esplika sira-nia razaun neʼebé bazeia ba Bíblia kona-ba tanbasá sira lakohi kontinénsia bandeira.

Tuirmai, mestre sira bolu polísia no polísia lori kedas joven sira-neʼe ba sede-polísia, no la kontaktu uluk joven sira-neʼe nia inan-aman. Tuirmai, polísia telefone baze militár no husu tropa ida mai atu koʼalia ho joven sira-neʼe. Polísia no tropa neʼe koko atu halo taʼuk joven sira-neʼe hodi hatama sira ba sela maizumenus ba minutu 30. Polísia ida mós halo interrogasaun ba sira durante oras rua liu no tau pistola iha meza leten neʼebé iha sira-nia oin. Ikusmai, joven sira-neʼe bele fila ba uma.

Bainhira joven sira-neʼe nia inan-aman rona buat neʼebé akontese, sira koʼalia ho mestre sira no mós polísia. Maibé ema nafatin fó-terus ba sira. Tan neʼe, sira mós fó-hatene ba ofisiál governu lokál sira kona-ba situasaun neʼe. Ikusmai, joven sira-neʼe tenke muda ba eskola seluk.

Joven sira-neʼe kontente tebes tanba sira lee irmaun Andrey Suvorkov nia esperiénsia no neʼe ajuda tebes sira bainhira kolega eskola, mestre sira no autoridade sira kontra sira.

Noviana Jose do Carmo hatete: “Ami-nia mestre sira fó-terus ba ami no eskola hasai ami. Maibé irmaun Andrey Suvorkov nia esperiénsia ajuda haʼu atu sente kalma no kontente.” Noviana nia biin naran Cejiana mós hatete: “Irmaun Andrey Suvorkov nia esperiénsia ajuda haʼu atu sente kalma nafatin bainhira ami hetan koko.” Irmán Rute Ximenes hatete katak irmaun neʼe nia esperiénsia ajuda nia atu “laran-metin nafatin”.

Irmán Ananda Maria Delavega hatete: “Irmaun Andrey Suvorkov nia ezemplu kona-ba tau fiar ba Jeová book haʼu atu sadere ba Jeová hodi halo orasaun liuliu bainhira ema kontra haʼu.”

Irmaun Roni da Cruz hatete: “Hodi hatene katak Jeová apoia irmaun-irmán sira iha mundu tomak, neʼe fó konfiansa mai haʼu katak Jeová hamutuk ho haʼu no haʼu la presiza taʼuk.”

Joven sira-neʼe nia inan-aman mós fó sai katak sira agradese ba esperiénsia sira iha Notísias JW.

Irmán Anita Ximenes haboot ninia oan-feto Rute no oan-feto rua seluk mesak deʼit. Irmán Anita hanoin barak no taʼuk bainhira ninia viziñu sira hatete: “Mai ita baku traidór sira-neʼe!” Maibé irmán Anita hatete: “Hodi hatene katak irmaun-irmán sira iha rai-Rúsia brani atu hamriik iha autoridade sira-nia oin iha tribunál, ida-neʼe mós fó aten-brani mai haʼu. Haʼu bele uza esperiénsia husi irmaun-irmán sira iha rai-Rúsia atu hanorin haʼu-nia oan sira. Ami hatene katak Jeová mak ami-nia Aman no nia sempre hamutuk ho ami.”

Hanesan irmaun-irmán joven sira-neʼe no sira-nia inan-aman iha Timor-Leste, ita-nia fiar bele sai metin liután bainhira ita medita kona-ba irmaun-irmán sira neʼebé ho aten-brani “manán” maski ema kontra sira.—Roma 8:37.