Ema barak husi suku, língua, no rai oioin hela iha ai-laran Amazonas iha Amérika Súl, no dook husi sidade sira. Iha Jullu 2017, Testemuña ba Jeová naʼin-13 halo viajen ba Mota Maroni no mota kiʼik sira iha ninia sorin leste iha rai-Guiana Franseza. Sira-nia objetivu mak saida? Neʼe mak atu fahe esperansa husi Bíblia ba ema neʼebé hela besik mota neʼe.

 Viajen neʼe sei laʼo ba loron 12. Fulan ida antes komesa viajen neʼe, irmaun-irmán sira hotu tuir enkontru atu halo planu. Irmaun Winsley hatete: “Ami aprende kona-ba área neʼe nia istória, no ami mós koʼalia kona-ba oinsá atu prepara ami-nia an ba viajen neʼe.” Haklaken-naʼin ida-idak tau toba-fatin no moskiteiru iha fatin ida neʼebé proteje sasán husi bee. Iha viajen neʼe, irmaun sira sei saʼe aviaun ba dala rua no oras barak iha bero leten.

 Irmaun-irmán sira sente oinsá bainhira hetan konvite atu tuir viajen neʼe? Claude no Lisette neʼebé maizumenus tinan 65 ona, simu kedas konvite neʼe. Claude hatete: “Haʼu kontente tebes, maibé mós hanoin barak uitoan. Haʼu rona istória barak kona-ba mota neʼe perigu tanba suli makaʼas.” Lisette hanoin barak kona-ba buat seluk. Nia hatete: “Haʼu hanoin kona-ba oinsá mak haʼu bele haklaken ba ema neʼebé koʼalia língua seluk.”

 Irmaun Mickaël mós sente hanesan. Nia hatete: “Ami ladún hatene kona-ba ema Wayana, entaun haʼu buka-hatene informasaun iha internét atu aprende liafuan balu hodi haʼu bele kumprimenta sira ho sira-nia língua.”

 Irman Shirely, neʼebé halo viajen neʼe hamutuk ho ninia laʼen, Johann, halo lista kona-ba língua sira neʼebé ema koʼalia iha área sira besik mota neʼe. Nia dehan: “Ami download vídeo oioin husi língua sira-neʼe iha jw.org no ami hetan livru neʼebé esplika liafuan báziku sira husi língua Wayana.”

 Iha loron-tersa, 4 Jullu, irmaun-irmán sira saʼe aviaun husi Saint-Laurent du Maroni hodi bá Maripasoula, neʼe mak sidade kiʼik ida iha área izoladu iha rai-Guiana Franseza.

 Durante loron haat, irmaun-irmán sira saʼe bero neʼebé uza mákina atu vizita ema neʼebé hela iha knua sira besik mota Maroni nia leten. Irmaun Roland neʼebé mós tuir viajen neʼe hatete: “Ema iha fatin neʼe interese tebes ba Bíblia. Sira husu pergunta barak no hakarak estuda Bíblia ho ami.”

 Iha knua ida, Johann no Shirley hasoru kaben-naʼin ida neʼebé sei joven. Kaben-naʼin neʼe nia família ida foin oho an. Johann dehan: “Ami hatudu ba sira vídeo Penduduk Asli Amerika yang Menemukan Pencipta. a Vídeo neʼe kona tebes sira-nia laran. Sira fó sira-nia email atu ami bele nafatin kontaktu malu.”

 Knua neʼebé dook liu iha mota nia parte leten mak Antécume Pata. Xefe ba knua neʼe fó lisensa ba irmaun-irmán sira atu monta sira-nia toba-fatin hodi bele deskansa. Sira mós hariis iha mota, hanesan komunidade iha knua neʼe.

 Depois, irmaun-irmán sira bá knua Twenké. Ema sira neʼebé hela iha neʼebá laran-triste tanba ema ida foin mate. Irmaun Éric, neʼebé mós ajuda halo planu ba viajen neʼe, dehan: “Xefe suku fó lisensa ba ami atu fó konsola ba ema sira neʼebé triste hela. Xefe suku no ninia família gosta tebes eskritura sira neʼebé ami lee ba sira husi Bíblia Wayana. Ami mós hatudu vídeo sira neʼebé koʼalia kona-ba moris-hias neʼebé Bíblia promete.”

 Tuirmai, irmaun-irmán sira saʼe aviaun ba minutu 30 husi Maripasoula ba sidade kiʼik naran Grand-Santi. Iha loron-tersa no loron-kuarta, irmaun-irmán sira fahe lia-loos husi Bíblia ba ema iha fatin neʼe. Iha loron-kinta, irmaun-irmán sira kontinua sira-nia viajen iha Mota Maroni ba oras lima ho balu atu vizita knua Apatou.

 Loron rua ikus iha sira-nia viajen, irmaun-irmán sira vizita ema Maroon, neʼebé hela iha knua sira iha ai-laran. Ema Maroon mak jerasaun husi ema Áfrika neʼebé bá Amerika Súl nuʼudar atan durante tempu neʼebé rai-Suriname mak parte husi kolónia. Testemuña sira harii tenda boot iha ai-laran no konvida ema hotu atu tuir reuniaun iha neʼebá. Claude hatete: “Ami sente kontente tebes tanba ema barak tuir reuniaun neʼe maski ami foin konvida sira iha dadeer-saan!” Karsten neʼebé foin primeiravés tuir haklaken ba fatin izoladu sira, hatoʼo diskursu públiku iha lian Aukan ho títulu “Ita-nia moris hanesan neʼe deʼit ka lae?” Ema naʼín-91 husi knua balu mai tuir reuniaun neʼe.

 Ikusmai, irmaun-irmán sira fila ba Saint-Laurent du Maroni. Sira hotu kontente tebes tanba ema barak husi fatin neʼe simu publikasaun no haree vídeo barak husi jw.org.

 Lisette hatete: “Haʼu kontente tebes tanba haʼu tuir viajen neʼe.” Cindy mós sente hanesan no dehan: “Se iha oportunidade atu halo fali viajen neʼe, haʼu sei tuir tan. Viajen neʼe kapás loos. Ita foin bele komprende ksolok neʼe se ita rasik koko halo ida-neʼe!”

 Viajen neʼe halo irmaun-irmán balu hakarak bá fali. Mickaël dehan: “Ami prontu atu halo fali viajen hanesan neʼe!” Ikusmai, Winsley muda ba Saint-Laurent du Maroni. Claude no Lisette neʼebé maizumenus tinan 65 ona, foti desizaun atu muda ba Apatou.