Mane ida husi rai-Eritreia tama rai-Noruega nuʼudar refujiadu iha tinan 2011. Bainhira Testemuña ba Jeová hasoru nia, mane neʼe fó-hatene ba sira katak uluk nia hasoru Testemuña ba Jeová iha rai-Eritreia. Nia dehan katak uluk nia serbisu ho militár iha neʼebá, no durante tempu neʼe, nia haree irmaun sira neʼebé tama komarka tanba sira-nia fiar no maski ema trata aat sira, maibé sira la husik ema obriga sira atu halo serbisu ho militár.

 Maibé derrepente mane neʼe mós tama komarka. Iha komarka laran nia hamutuk ho Testemuña naʼin-tolu, neʼe mak Paulos Eyasu, Negede Teklemariam, no Isaac Mogos. Irmaun naʼin-tolu neʼe iha komarka laran husi tinan 1994 tanba sira-nia fiar.

 Durante tempu neʼebé nia iha komarka laran, nia haree duni katak Testemuña ba Jeová halo tuir Bíblia nia matadalan neʼebé sira hanorin ba ema seluk. Nia haree katak irmaun sira laran-moos no fahe mós sira-nia ai-han ba ema seluk iha komarka. Nia mós haree katak irmaun sira estuda Bíblia hamutuk loroloron no konvida ema seluk atu tuir sira. Kuandu irmaun sira iha oportunidade atu sai livre hodi asina dokumentu neʼebé dehan katak sira nega ona sira-nia fiar, irmaun sira lakohi.

 Esperiénsia neʼe kona duni mane neʼe nia laran, no kuandu nia muda ba rai-Noruega nia hakarak hatene tanbasá Testemuña ba Jeová iha fiar neʼebé metin tebes. Tan neʼe, kuandu nia hasoru Testemuña sira iha rai-Noruega, nia komesa kedas estuda Bíblia no tuir reuniaun sira.

 Iha fulan-Setembru tinan 2018, nia hetan batizmu nuʼudar Testemuña ba Jeová. Agora nia uza oportunidade hotu neʼebé iha atu koʼalia ho ema husi rai-Eritreia no rai-Sudaun hodi ajuda sira estuda Bíblia no haburas sira-nia fiar.