“Tsy Agnisa ty Tontolo Toy”

“Heje ty tontolo toy iareo, satria tsy agnisa ty tontolo toy.”​—JAONA 17:14.

Ino ty Dika Izay? Tsy mialy ndra mizilike amy ty politike manahake i Jesosy avao ka ty Kristiana satria tsy agnisa ty tontolo toy. Hoe ty Jesosy: “Tsy agnisa ty tontolo toy ty fanjakàko. Fa naho tagnisa ty tontolo toy, le ho nialy o ndatikò tsy mone ho nasese amo o Jiosio eo raho. Faie tsy izay ty niboaha ty fanjakàko.” (Jaona 18:36) Nandrisike ze mpanonjohy ty lia’e ka ty Jesosy mba tsy hitovy amy ty fomba fireha ty tontolo toy ndra hanagne ty toe-tsai’e naho hanagne ty findesam-bata’e rarà ty Baiboly.​—Matio 20:25-27.

Nanao Izay vao i Kristiana Voaloha’e Rey? Hoe ty Jonathan Dymond mpanoratse: ‘Tsy nimete nandeha nialy o Kristiana voaloha’eo ndra inogn’ino ty voka’e, ndra afahan-baraka reke ndra ho gadraegne ndra ho vonoegne.’ Ndra aleo iareo ampijalegne ta tie hagneke hialy. Niambake ka iareo satria nisoa findesam-batagne. Hoe ty Petera tamy iareo: “Satria tsy miarake milay amy iareo sasa ho amy ze honahona ty filibagne zay nareo, le veren-draha iareo hafara’e manimbotimbo anareo tsy misy fara’e.” (1 Petera 4:4) Nirehake ty Will Dirant mpahay tantara fa ‘tea fivavahagne naho nisoa findesam-batagne o Kristianao, le nahaboseke o mpanompo sampy tea fahafinaretagne loatseo ze raha zay.’

Ia ty Magnorike ty Reha i Jesosy ty amy Hinane Zao? Maro ty fivavahagne mihevetse fa toko’e handrambe anjara amo o alio ty Kristiana. Izao ohatse ty nirehafe ty Fangalan-kilala Katolika Vaovao (angilé): “Tena diso ty ndaty raike naho tsy mandeha mialy satria hoe tsy eké ty eretsere’e ze raha zay.” Nisy tatetse ka natao ty fikambanagne raike miomba ty zo o ndatio. Nirehafe tao fa nisy famonovonoagne foko ty ta Roandà tagne tamy 1994. Nandrambe anjara tamy izay ze kila fivavahagne “naho tsy ty Vavolombelo i Jehovah avao.”

Hoe ka ty ramosé raike, miomba i famonovonoagne ndaty maro indray mandeha tan’Azia agney: “Aia le tsy mba nisy fikambanagne nahavany nampibaribary ty vande fanoe iareo ndra nanohetse i haratiagney naho i famonoagne ndaty nanoe’ey!” Faie fale iareo naho fa boake nitilike Tragno Fagnajariagne raike. Nitrea iareo tao, fa tsy nilefetse tamy ty raha ninoa’e o Vavolombelo i Jehovah-o ndra tie nampijalé o Naziao aza.

Ia areke ty soa findesam-batagne amy hinane zao? Hoe ty gazete katolika Amerikana: “Tsy magnorike ty fampianara i Eglizỳ, ty ankamaroa ty tanora katolika. Hafara’e manambaly faie tsy vita mariaze sady fa mifampila avao aloha ty fanambaliagne.” Nirehafegne ao ka ty reha ty diakona raike toy: “Ty antsasa’e mahery amy ty ndaty atao mariaze, ro fa niharo tragno.” Mirehake ka ty Fangalan-kilala Britanika Vaovao (angilé) fa ‘tena lahibey amy ty Vavolombelo i Jehovah ty fitsipy ty Baiboly miomba ty findesam-batagne, le orihe’e soa zay.’