Fa nisy fotoagne ka vao rehe nahatsapa manahake o ndaty amboneo rehoe, le lava mangatake andro avao naho fa hamaky Baiboly? Maro ty ndaty tsy mazoto mamaky Baiboly. Faie hai’o vao tie afake magnampe azo ho sambatse ty famakiagne Baiboly sady misy raha azo atao mba hahavy azo ho tea mamaky Baiboly? Tsy mandrisike azo hamaky Baiboly vao ty fahafantara’o izay?

Mareho amy ty reha ty ndaty ila’e retoa tie ino ty soa nirambese iareo naho fa nanomboke namaky Baiboly iareo:

Hoe ty Ezekiel, 20 taogne eo ho eo: “Taloha raho le nanahake o ndaty mirererere tsy fantatse tie hombaiao. Faie naho fa nanomboke namaky Baiboly raho, le nanjare nanagne tanjogne sady nanjare nisy dika’e ty fiaignako. Ahatreavagne torohevetse azo ampiharegne amy ty fiaignagne andavanandro ty ao.”

Hoe ka ty Frieda, 20 taogne eo ho eo: “Tsiela boseke raho tie taloha. Faie nanjare nahay nifehe tegna raho naho fa nanomboke namaky Baiboly. Nanjare mora tamo o ndatio ka ty nifandrambe tamako. Ty voka’e, nanjare nahazo ragnetse maro raho.”

Hoe ka ty Eunice, 50 taogne eo ho eo: “Magnampe ahy hagnasoa ty toetseko naho hiala amy ty fahazaran-draty o Baibolio.”

Trea amy ty raha rehafe o ndaty rehoe naho ty raha nirehafe ty ndaty hafa an-tapetrisa’e, fa ho soa ty fiaigna’o naho mamaky Baiboly rehe. (Isaia 48:17, 18) Afake magnampe azo hahay hanapa-kevetse, hahazo namagne naho hiatreke olagne ty famakiagne Baiboly. Fa ty tena lahibey le tihoe hanjare hahafantatse ty maregne miomba an’Andrianagnahare rehe. Boake ama’e o Baibolio, le azo antoke fa tsy hanoro vilagne azo. Tsy hamitake azo ty raha rehafegne ao.

Trea boake amy ireo fa tena ilaegne ty mamaky Baiboly. Nagnino areke rehe naho manomboke mamaky Baiboly amy izay? Faie akore ty hanombohagne aze? Le akore ty hatao mba hahavy aze hahafinaritse?