AISISIAET 5
Anyoin Bo Alosikinet Naka Edeke Kanuka Akwap?
1. Kanukinyo asubia Edeke akwap?
Abu Yawe koinak itunga akwap. Nesi ere wok. Kanukangun ekale lo etunganan losodit, Adam ka Keba, mam asubitai kanu aijar nako kuju. Asubit Edeke imalaikan kanu aijar nako kuju. (Yob 38:4, 7) Abu Edeke koyanga etunganan losodit kosodi aibuaikin nges paradais naebus na enyaritai emanikor loka Eden. (Ageun 2:15-17) Abu Yawe kijaik kesi ka ikec idwe arereng nailel aijar namam edaun kotoma akwap.—Kosiom Isabulin 37:29; 115:16.
Kageunet, emanikor loka Eden bon arai paradais. Abeit ekale losodit aileleb akwap ka idwe kec. Kotoma pak, abeit kesi aileleb akwap kere ka aitaraun paradais. (Ageun 1:28) Mam akwap emudiaro cut. Eraun duc ere loka itunga.—Kosiom Isabulin 104:5.
Kosesen ebidio Kanukinyo asubia Edeke akwap?
2. Kanukinyo mam akwap eraar paradais kwana?
Kipalikisi Adam ka Keba Edeke, kirengia Yawe kesi kinga kemanikor. Kowolio paradais, Ido emamei etunganan lo apedori ainyakakin. Ebala Ebibuli: “Einakinitai akwap akan naka ikaronon.”—Yob 9:24.—Kosiom Ageun 3:23, 24.
Enyeik Yawe alosikinete ke kanuka itunga? Mam! Erai nges loka apedori kere. Mam ikaruni. (Isaia 45:18) Inyakakini nges atekerin kere epone lo akotor nges kolosek.—Kosiom Isabulin 37:11, 34.
3. Epone bo ani kinyakunere Paradais?
Inyakuno Paradais egeu Yesu aipuga kwape Ekabaka loka Ajakanut naka Edeke. Ojie loinyaritai Arumagedon ebuni Yesu aingarenikin imalaikan luka Edeke kosodete amudiar ngul kere luitepegete Edeke. Kibuaikini Yesu Satan aenis adaun ikur 1000. Epote ijanakinak luka Edeke aiku amudiaro narai ebuni Yesu aingarenikin ka aidar kesi. Elelete do kesi aijar ikar kere akwap nakitete.—Kosiom Apukokinio 20:1-3; 21:3, 4.
4. Iwori bo enangia aiticanitoi?
Iwori bo itanangia Edeke nukarokok kakwap? Abu Yesu koinak ‘anyunet’ naitoduni ebe eyapiei awasia. Nuitukurianete aijar naka itunga kwana itodunitos ebe ijai oni “osange loka akwapin.”—Kosiom Matayo 24:3, 7-14, 21, 22.
Kotoma apugan ka Yesu naikar 1000 ko kuju, ebuni nges alemar aiticanitoi kere kakwap. (Isaia 9:6, 7; 11:9) Kaiyatakin aipugake kwape Ekabaka, ebuni bobo Yesu aijanakin kwape Esaserodoti Lopeti ido kisionei ngesi adiakanareta angul lueminasi Edeke. Kido, kitorite nejai Yesu elemari Edeke adeka, amojong ka atwanare.—Kosiom Isaia 25:8; 33:24.
5. Ingai bo ebuni aiboi kotoma paradais nakoingaren?
Ko Kingdom Hall, idumuni ijo itunga lueminasi Edeke ido okotosi aisisiaun epone loisialamikinet Edeke
Itunga luerimarete Edeke nges epote aiboi paradais. (1 Yokana 2:17) Kijuka Yesu iketupitok aimo ngul luitasonos ka aisisianakin kesi epone loisialamikinet Edeke. Lolo, Isisianakini Edeke imilionin luka itunga anu adumun aijar na paradais kakwap koingaren. (Sepania 2:3) Ko Kingdom Halls Ajenak Luka Yawe, Kisisiaete itunga epone loka araun ikiliok, luapapa, ka angor ka luatoto luejokuka. Emaete idwe ka iuriak kec nepepe kisisiaete epone lo imedaunet akiro nukajokak.—Kosiom Mika 4:1-4.
