Агар одатҳо ва шахсияти ҳамсарон аз ҳамдигар фарқ кунад ва онҳо ба чизҳои гуногун шавқ дошта бошанд, ин дар оилаашон душвориҳоро ба миён оварда метавонад. Лекин махсусан дар мавридҳои зерин ба як хулоса омадан душвор аст:

•   Чӣ қадар гузаронидани вақт бо хешу табор

•   Пулро чӣ тавр дуруст истифода бурдан

•   Кӯдакдор шудан ё нашудан

 Агар ақидаҳои шумо ва ҳамсаратон гуногун бошанд, шумо чӣ кор карда метавонед?

•  Шумо бояд чиро донед

•  Шумо чӣ кор карда метавонед

 Ба якдигар мувофиқ будан маънои як ақида доштанро надорад. Ҳатто зан ва шавҳаре, ки ба якдигар хеле мувофиқанд, ҳамеша як ақида надоранд ва дар масъалаҳои ҷиддӣ низ фикрашон аз ҳам фарқ дошта метавонад.

 «Ман дар оилае калон шудам, ки ба ҳамдигар хеле наздик буданд. Ҳар рӯзҳои истироҳат мо бо бибию бобо, тағою амак, холаю амма ва фарзандонашон вақт мегузарондем. Лекин дар оилаи ҳамсарам бошад, ин хел набуд. Барои ҳамин ману шавҳарам нисбати чӣ қадар бо оила вақт гузарондан ё бо хешу таборе, ки дар дурӣ зиндагӣ мекунанд, чӣ қадар муошират кардан ақидаҳои гуногун дорем» (Тамара).

 «Азбаски ману занам дар муҳити гуногун калон шудем, нисбати чӣ тавр сарф кардани пул нуқтаи назари гуногун дорем. Аз ин сабаб якчанд моҳи аввали оиладориамон мо дар ин бора баҳс мекардем. Барои ҳал кардани ин душворӣ якчанд бор сӯҳбат кардан лозим омад» (Тайлер).

 Баъзе душвориҳо танҳо бо гузашт кардан ҳал намешаванд. Масалан, агар хусуру хушдоманатон касал шуда ба нигоҳубин мӯҳтоҷ шаванд, он гоҳ чӣ кор мекунед? Агар ҳамсаратон фарзанддор шудан хоҳаду шумо не, он гоҳ-чӣ? *

 «Ману занам дар бораи фарзанддор шудан якчанд бор гап зада будем. Занам дар ин бора бештару бештар фикр мекунад ва нуқтаи назари мо торафт фарқ карда истодааст. Ман бошам, гузашт карда наметавонам» (Алекс).

 Ақидаи гуногун доштан маънои онро надорад, ки оилаи шумо хушбахт шуда наметавонад. Баъзе мутахассисон мегӯянд, ки агар шумо ва ҳамсаратон дар масъалаҳои ҷиддӣ ба як хулоса омада натавонед, бояд як илоҷ карда хости дилатонро кунед, ҳатто агар барои ин ҷудо шудан лозим ояд. Лекин чунин «ҳалли душворӣ» маънои онро медошт, ки шумо ҳиссиёти худро аз ваъдае, ки ҳангоми издивоҷ дода будед, болотар мемонед, зеро шумо ваъда дода будед, ки ба пастиву баландии зиндагӣ нигоҳ накарда бо ҳамсаратон якҷоя мемонед.

 Ба ваъдае, ки ҳангоми издивоҷ дода будед, вафо кунед. Агар чунин кунед, шумо масъалаҳои душворро на чун рақиб, балки чун як даста ҳал мекунед.

 Принсипи Китоби Муқаддас: «Он чӣ Худо бо ҳам пайвастааст, одам набояд ҷудо кунад» (Матто 19:6).

 Хароҷотро ҳисоб кунед. Масалан фарз кардем, ки яке аз ҳамсарон фарзанддор шудан мехоҳад, дигараш бошад, не. Дар ин маврид якчанд масъалаҳоро дида баромадан лозим аст:

•   То чӣ андоза пайванди издивоҷатон мустаҳкам аст.

   Оё пайванди издивоҷатон фишори иловагиеро, ки калон кардани фарзанд меорад, бардошта метавонад?

•   Масъулиятҳое, ки фарзанддорӣ меорад.

   Ба ин на танҳо хӯрондан, пӯшондан ва бо ҷойи зист таъмин кардани фарзанд дохил мешавад, балки чизҳои бештар низ.

•   Вазъияти иқтисодиатон.

   Оё шумо яку якбора аз ӯҳдаи кор, оила ва дигар масъулиятҳо мебароед?

 Принсипи Китоби Муқаддас: «Кадоме аз шумо бурҷе сохтанӣ шуда, аввал нишаста, харҷи онро ҳисоб намекунад?» (Луқо 14:28).

 Масъаларо ҳаматарафа дида бароед. Шояд ҳамин тавр шумо ба як хулоса омада тавонед. Барои мисол агар гап дар бораи кӯдакдор шудан равад, ҳамсаре, ки зид аст, аз худ пурсида метавонад:

•   Ман умуман фарзанддор шудан намехоҳам, ё фақат ҳозир?

•   Оё ман шубҳа дорам, ки волиди хуб мешавам?

•   Оё ман аз он метарсам, ки ҳамсарам ба ман беаҳамият мешавад?

 Аз дигар тараф ҳамсаре, ки фарзанддор шудан мехоҳад, ба худаш саволҳои зеринро дода метавонад:

•   Оё мо масъулиятҳое, ки волидон доранд, ба дӯш гирифта метавонем?

•   Оё барои калон кардани фарзанд зӯрамон мерасад?

 Принсипи Китоби Муқаддас: «Хираде, ки аз болост... бомулоҳиза» аст (Яъқуб 3:17).

 Бо ҷиҳатҳои хуби ақидаи ҳамсаратон розӣ шавед. Ду одам ба як манзара ҳар хел нигоҳ мекунад. Ба ин монанд, ҳамсарон ба як масъала нигоҳи гуногун дошта метавонанд. Масалан нисбати чӣ тавр сарф кардани пул ҳар як ҳамсар ақидаи худро дорад. Ҳангоми ҳал кардани масъалаи баҳснок аввал ҷиҳатҳоеро муҳокима кунед, ки ҳардуятон розиед.

•   Кадом мақсадҳои шумо якхелаанд?

•   Ҷиҳатҳои хуби ҳар як ақида кадом аст?

•   Оё шумо ё ҳамсаратон тайёред, ки барои нигоҳ доштани оила бо ақидаи якдигар розӣ шавед?

 Принсипи Китоби Муқаддас: «Бигзор ҳар кас фоидаи худро неву фоидаи каси дигарро ҷӯё бошад» (1 Қӯринтиён 10:24).