ITINEKWAGH I TAMEN | MBAAIE MBA KA VE NA I LU INJA ER IOR DOO AÔNDO ISHIMA GA LA
Aie u A Ne I Lu Inja Er Aôndo Wa Tswam La
AKAA A IOR KPISHI VE NE JIGHJIGH A MI YÔ
‘Aluer or a kpe a kwaghbo u vesen ken uma u nan yô, nana yem ken zegeusu, ibyeen ia lu ga.’ (Katekism u Nongo u Kristu u Katoliko) Mbahemenev mbaaduav mbagen kaa ér igyamusu ka mlu u ka a pav or a Aôndo yô.
MIMI U BIBILO I TESE YÔ
‘Or u nan eren isholibo yô, ka nan nana kpe ye.’ (Esekiel 18:4) Mbakpenev “fa ma kwagh ga.” (Orpasenkwagh 9:5) Aluer mbakpenev fa ma kwagh ga yô, vea lu za hian ken “zegeusu” shin igyamusu, gayô vea lu za yan ican gbem sha won sha ci u kera mba ikyua a Aôndo ga nena?
Ken Bibilo yô, ishember i ken zwa Heberu man i zwa Grika i ashighe kpishi ka i gema ér “hel” la, inja na yô ka uwar u iin mbakpenev. Ikyav i tesen yô, shighe u Yobu ya ican a angev mbu nyoon kpishi la er msen kaa ér, “Ma u yerem shin uwar [“shin hel,” Bibilo i Douay-Rheims Version].” (Yobu 14:13, Bibilo i Holy Bible—Easy-to-Read Version la) Yobu yange soo u memen, kpa lu hen ijiir i a eren un ican ga, shin ape una lu ica a Aôndo ga, kpa lu shin uwar.
ER I HII VE I LU KWAGH U VESEN YÔ
Aluer Aôndo wa tswam yô, una doo se ishima ga, se gba ica a na. Kwase ugen ken tar u Mexico u i yer iti na ér Rocío yô, kaa ér: “Yange i tesem kwagh u igyamusu hii iyev je. Yange cier mo iyol kpishi, m hen mer Aôndo ngu a ieren i dedoo i môm ga. Yange m hen mer a vihi tu kpishi shi lumun ibumegh ga.”
Kpa er Bibilo i pase kwagh u ijir i Aôndo una va ôr la wang shi i pase mlu u mbakpenev yô, Rocío gema gbenda u nengen Aôndo la. A kaa ér: “Yange ishima gbam shimi, pever mo iyol. M hii u lun a vangertiôr mer Aôndo soo ér i kpe se iyol, shi se doo un ishima, shi mo kpa me fatyô u soon un. Ngu er ka Ter u ka nan kôr mbayev mba nan uwegh shi nan soo ér i kpe ve iyol nahan.”—Yesaia 41:13.
Ior kpishi ka ve cia igyamusu, nahan ve nôngon kpoghuloo ér vea lu perapera; kpa Aôndo soo ér u civir un sha ci u u ngu cian un yum ga. Ka nahan ve Yesu kaa ér: “Yehova Aôndo wou a̱ doo u ishima kpee je” ye. (Marku 12:29, 30) Ka sea mase kaven ser nyian kpa, Aôndo eren kwagh a vese dang ga yô, se lu a vangertiôr ser ken hemen kpa una va ôr ijir sha mimi. Se kpa se fatyô u lun a vangertiôr er Elihu, ijende i Yobu la nahan. Yange kaa ér: “Aôndo Una er iferkwagh mayange ga, Uhembanagee kpaa Una er kpe ga.”—Yobu 34:10.