ALUER ma ikyurior kua tor ve dondo Yehova ér ngu Orhemen ve u Hemban Cii, shi mba kuran atindi a Na kpaa nahan, á lu ikyurior la nena? Tor Solomon yange hemen Mbaiserael anyom 40. Mtemtor na ne wase se u zuan a mlumun sha mpin ne.

Cii man Davidi kpe yô, Davidi tsua Solomon ér a̱ tema tor sha ityough nagh. Aôndo kaa a Solomon ken mnyam ér a̱ sôn kwagh u a sar un cii. Tsô Solomon sôn Aôndo kwaghfan man mfe sha er una ôron ior ijir sha mimi man sha kwaghfan kpaa yô. Kwagh ne doo Yehova, nahan Yehova na Solomon ishima i fan kwagh man i kaven kwagh kpaa. Yehova shi tôndo zwa a na ér aluer á zende sha igbenda na yô, una na un inyaregh man icivir shi una seer un ayange kpaa.

Solomon yange za gwa sha ajiraôron a na a sha kwaghfan la. Sha shighe ugen la, kasev uhar va a ijir hen a na; ve lu kpelan anikyundan u nomso. Tsô Solomon kaa ér i pav wan la ker avegher ahar, i na kwase u môm la vegher môm, ugen la di vegher môm. Kwase u hiihii la, lumun ér i̱ er nahan, kpa u wan lu u na kpôô kpôô la, zamber ér i gba nan kwase ugen la wan la tsô. Nahan Solomon mase fan er wan la i lu u kwase u mhôônom kôr un a na la yô, tsô a kaa ér i̱ na un wan la. Iserael cii ungwa er tor kure ijir la yô, nahan ior kav er kwaghfan u Aôndo a lu ken Solomon yô.

Môm ken akaa a vesen a Solomon er yô, lu tempel u Yehova u a maa la. Lu imagh ki vesen ki a maa ken Yerusalem sha u ki lu ijiir i tamen i a civir Aôndo ken Iserael yô. Zum u i lu tseghan tempel shon la, Solomon er msen ér: “Nenge, Sha man Sha u a hembe gban ca la je kpaa fatyô u ngohol We ga, man hide iyou i m maa [nee]?”—1 Utor 8:27.

Agwa u Solomon ar ken ityar igen kpaa, zan zan yô i ungwa kwagh na ken tar u Sekeba ken Arabia je kpaa. Torkwase u Sekeba yange mough va sha u va nengen icivir i Solomon man inyaregh nagh man sha u va karen kwaghfan na kpaa. Kwaghfan u Solomon man inyaregh ki Iserael lu a mi la kpiligh torkwase ne iyol, nahan a wuese Yehova sha er a ver tor u fan kwagh ne sha ikyônough ki torough yô. Sha kpôô yô, ken tar u Iserael cii lu mtemtor u Solomon hemba zan ikyura shi ior hemba teman ken mkpeyol sha ci u iveren i Yehova ye.

Kpa kwagh ka a er i vihi yô, Solomon za hemen u dondon kwaghfan u Yehova ga. Solomon hemba Aôndo ato, er kasev uderi uderi, kua kasev mba ken atôatyev agen kpaa. Tegh tegh tsô kasev nav mban gema ishima na hen Yehova kera, nahan a gba icivir akombo. Tsô Yehova kaa a Solomon ér una pav tartor na ker, una na tsombor na vegher môm sha ci u ter na Davidi. Shin er Solomon de u civir Yehova sha mimi nahan kpa, Yehova undu ikyuryan i a ya vea Davidi la ga.

—I zua a kwagh u i nger heen ne ken 1 Utor ityough 1 zan zan 11 man 2 Kroniku ityough 1 zan zan 9 kua Duteronomi 17:17.