SHIGHE u Saulu eren aferakaa la, doo ana?— Lu Satan Diabolo. Shi lu sha ishima i mbahemenev mba kwaghaôndo u Mbayuda kpaa. Nahan kpa, Saulu va hingir orhenen u Ortesen Uhemban, shi mba gem yilan un ér Paulu yô, mbahemenev mbara maa hii u kôron un ihyom. Nahan ú nenge er i hii ve i taver u orhenen u Yesu nana er kwagh u doon ior kpa?

Shighe ugen la, zegepristi u i yilan ér Anania la ôr a ior mbagen ér ve̱ ta Paulu sambe sha zwa. Anania shi nôngo ér una wa Paulu ken gaadi kpaa. Paulu yange hingir orhenen u Yesu yô, a ya ican kpen kpen. U tesen ikyav yô, aferaior yange ve gbidye Paulu shi ve ta un awen ér vea wua un.—Aerenakaa 23:1, 2; 2 Mbakorinte 11:24, 25.

Ior kpishi vea nôngo u meen se ér se̱ er akaa a aa vihi Aôndo ishima yô. Nahan doo u se pine ser, Kwagh u dedoo doo ú ishima kpishi kpa? Kwagh u dedoo doo ú  ishima kpishi je kuma u, aluer ior mbagenev vea kôr ú ihyom sha ci u erdoo wou kpa, ú za hemen u eren kwagh u dedoo her kpa? Saa ú taver ishima tsung ve ú er kwagh u dedoo ye, shin ka nahan ga?

Alaghga ú pine wer, ‘A er nan ve ior vea kôr se ihyom sha ci u se mba eren kwagh u dedoo yumu? Ma i saan ve a saan iyol gaa?’ Kape i doo u kwagh ma á lu je la. Ior yange ve soo Yesu sha ci u akaa a dedoo a yange eren la. Shighe ugen la ior mba ken gar ugen va kumba sha hunda u iyou i lu her la. Ve va hen Yesu sha ci u lu been ior angev.—Marku 1:33.

Kpa ashighe agen ityesen i Yesu la yange i doo ior ga. Shin er yange  tesen kwagh u vough nahan kpa, ior mbagenev kôr un ihyom kpishi sha ci u kwagh u mimi u yange ôron la. Iyange igen kwagh er ken Nasareti, gar u Yesu vese her la. Yesu za ken shinagoge, ape Mbayuda kohol sha u civir Aôndo la.

Yesu bugh Ruamabera pase kwagh ker doo doo. Sha hiihii la, ior ungwa doo ve kpishi. Kpiligh ve iyol sha akaaôron a dedoo a a due ken zwa na la. Taver ve u nan jighjigh ér ka wanyekwaor u a vese ken gar ve ne je á lu ôron kwagh nahan ye.

Kpa Yesu gema ôr kwagh ugen. A ôr ve kwagh u ashighe a ior mbagen lu Mbayuda ga kpa Aôndo zungwe ve mhôônom, lumun ve sha gbenda u kpilighyol yô. Yesu er kwagh ne yô, ishima maa gba vihin ior mba ve lu ken shinagoge la ker. Ú fa ityôkyaa kpa?— Yange ve hen ér ka ve tseegh Aôndo a zungu ve mhôônom a lumun a ve sha gbenda u kpilighyol nahan ye. Ve hen ér ior mbagenev cii kuma sha ave ga. Nahan ve kôr Yesu ihyom sha kwagh u a ôr la. Nahan ú fa kwagh u yange ve nôngo ér vea er a na kpa?

Bibilo kaa ér: ‘Ve kôr Yesu, ve due a Na ken akôngo a gar, ve za a Na sha kur u uwoogh henpe i maa gar ve la, sha u vea gbihi Un shin ijem yô. Kpa A kar hen atô ve kera.’—Luka 4:16-30.

Aluer ka we i er imba kwagh la a we nahan, ú hide shi ú za pase ior mbara kwaghaôndo kpa?— Saa ú taver ishima tsung ve ú er kwagh la ye, shin ka nahan ga?— Nahan kpa, inyom i karen i môm yô, Yesu hide shi za ken Nasareti. Bibilo kaa er: “A tese ve ken shinagoge ve.” Yesu cia de u ôron kwagh u mimi sha ci u ior mba ve kôr Aôndo ihyom la ga.—Mateu 13:54.

Shighe ugen la, Yesu lu hen ijiir igen sha iyange i memen, or u uman uwegh kpa lu her. Aôndo na Yesu tahav mbu been or la angev. Kpa ior mbagen hen ijiir la lu keren u van Yesu a mzeyol. Nahan Ortesen Uhemban gema er nena?— Hiihii yô, á pine ve er: ‘Ka  hanmô wen nana lu a waniyôngo, una gba shin ihungwa i vesen sha iyange i memen ve, nana dugh un shin ihungwa la sha ga?’

Sha mimi yô, aluer waniyôngo gba shin ihungwa sha Iyange i Memen, i̱ í gbe u vea er ma tom ga la je kpa, vea dugh un kpee. Nahan Yesu kaa ér: ‘Or hemba ngun a inja a waniyôngo ca je, nahan i̱ eren kwagh u doon sha iyange i memen kpaa!’ Nenge er Yesu yange wase oruange la, bee un angev nahan lu sha inja sha wono!

Yesu kaa a or la ér a̱ nalegh uwegh nagh. Nalegh ku yô, uwegh nagh maa bee her ave ave la je. Kwagh la doo or la kpen kpen! Kpa ior mbagen mbara di ye? Doo ve kpa?— Ei. Ve seer kôron a kôr Yesu ihyom. Ve due ve gba za keren igbenda i vea wua un yô!—Mateu 12:9-14.

Sha ayange ne kpaa kape i lu je la. Aluer se er akaa a dedoo nan nan kpa, ka hanma or a doo nan ga. Nahan ka se se tsua or u se soo ser se er ishima i nan la ye. Aluer se soo u eren ishima i Yehova Aôndo man Wan na Yesu Kristu yô, saa se dondon kwagh u ve tese la hanma shighe cii. Kpa aluer se mba eren nahan yô, ka an nana gema a kôr se ihyomo? Ka an nana na ve a taver se u eren kwagh u dedoo?

Ka Satan Diabolo. Shi ka an ugen kpa nana er kwagh nahana?— Ka ior mba Diabolo a tsugh ve, ve lumun a akaabo la. Yesu kaa a mbahemenev mba kwaghaôndo mba sha ayange na la ér: “Ka ken ter wen diabolo je ne dugh ye, man ka ne ka eren asaren a ter wen.”—Yohane 8:44.

Ior mba Diabolo a soo ve mba kpishi. Yesu yila ve ér “tar.” Ú hen wer tar u Yesu a ôr kwagh u ú la kanyi?— Yô, ungwa ase kwagh u Yohane 15, ivur i sha 19 la i̱ ôr la. Se ôr mkaanem ma Yesu a ôr la heen, i kaa ér: “Aluer nea lu ior i tar ne yô, ma ne lu kwagh u tar jim, ma ne doo tar ishima; kpa er ne lu ior i tar ne ga, Mo M gem M tsough ne shin tar ne kera yô, ka nahan man tar u ker ne ihom ye.”

 Nahan ka ior mba ve lu mbadondon Yesu ga la cii ve lu tar shon u ú ker mbahenen mba Yesu ihyom la ye. Er nan ve tar ú ker ­mbahenen mba Yesu ihyomo?— Hen sha kwagh ne yôô. Ka an nan lu tor u tar nee?— Bibilo kaa ér: “Tar cii ngu sha ikev i Orbo.” Orbo la ka Satan Diabolo.—1 Yohane 5:19.

Hegen ú nenge er i hii ve i taver kpishi u eren kwagh u dedoo ve ga?— Ka Satan man tar na la ú ne ve, i lu kwagh u taver ye. Kpa ityôkyaa igen shi ngi. Ú umbur ityôkyaa shon kpa?— I ôr ken Ityough 23 ki takerada ne ér, se cii i mar se ken isholibo. Isholibo man Diabolo man tar na cii vea va kera lu ga nahan, a lu kwagh u kpilighyol gaa?

Bibilo er ityendezwa ér: “Tar yô, ngu karen kera.” Kwagh ne tese ér ior mba ve lu mbadondon Ortesen Uhemban la ga cii vea va kera lu ga. A lumun ér ve̱ lu sha tar gbem sha won ga. Ú fa or u nana lu gbem sha won kpa?— Bibilo za hemen kaa ér: “Kpa u nan eren ishima i Aôndo yô, nan ngu lun gbem sha won.” (1 Yohane 2:17) Een, ka ior mba ve eren akaa a dedoo, ve “eren ishima i Aôndo” la tseegh, vea lu ken tar u Aôndo u he la gbem sha won ye. Nahan aluer a taver u eren kwagh u dedoo kpaa, se soo u eren kwagh u dedoo, shin ka nahan ga?