ITYOUGH 11
Er u Ôr Bibilo Ve U Hemba Zuan a Kwagh u Wasen We Yô
I lu nahan u soo u eren ma kwagh u vesen, kpa u nenge wer u fatyô ga sha ci u kwagh shon taver yum vee? Alaghga u nenge wer guda u hii u eren kwagh shon kpuaa kpuaa, sha er a kera lu u ican ga yô. Kape Bibilo i ôron kpa i lu je la. Kpa alaghga u pine wer, ‘Me hii hana?’ Ken ityough kin, se lu nengen sha akaa a taver ga, a u er ve a maa u iyol u ôron Bibilo shi henen i yô.
1. Gba u se ôron Bibilo hanma shighe sha ci u nyi?
Or u nan ôron Bibilo shin “atindi a TER” hanma shighe yô, a saan nan iyol shi kwagh u nan eren cii nana kure un doo doo. (Ôr Pasalmi 1:1-3.) Kwagh u u hii eren yô, nôngo tôôn miniti kpuaa ôron Bibilo hanma iyange. Er u lu fan Mkaanem ma Aôndo seer la, a lu hemban maan we iyol u ôron Bibilo cii.
2. U ôr Bibilo nena ve ia wase u we?
Gbenda u se ôr Bibilo ve ia hemba wasen se yô, ka u ôron i shi tamber hiden henen sha kwagh u se lu ôron la. Gba u se ôron Bibilo shi se “timen kimi.” (Yosua 1:8) Er u lu ôron Bibilo la, pine iyol you wer: ‘Kwagh ne tesem nyi sha kwagh u Yehova Aôndo? Me dondo kwagh u m hen ne ken uma wam nena? Me wase mbagenev a kwagh u m hen ken avur ne la nena?’
3. U er nan ve u zua a shighe u ôron Bibilo?
U zuan a shighe u ôron Bibilo gaa? Se mbagenev kpishi kape ka i lu je la. Nahan nôngo ‘eren kwagh a shighe wou sha inja.’ (Mbaefese 5:16) Kwagh u u er yô, ver shighe jighilii u u ôron Bibilo hanma iyange yô. Mbagenev ka ve tsua u ôron Bibilo pepe. Mbagenev di shighe ve ka i lu atetan, er shighe u i due ahumbe nahan. Mbagenev di yô, ka ve ôr Bibilo tugh, cii man ve mase yaven ye. Ka hanma shighe nahan we a hemba doon we u ôron Bibilo?
HEN KWAGH I ZA SHIMI
Hen kwagh u u er ve Bibilo i ôron ia hemba maan we iyol yô. Nenge er u wa ago iyol tsembelee sha er u hen Bibilo sha gbenda u u hemba zuan a kwagh u wasen we yô.
Er ka sea hen u yan akaayan atô kposo kposo ve a va hingir u doon se nahan, kape Bibilo kpa aluer se mba henen u ôron i ve, ia va doo se u ôron je la
4. Hen kwagh u u er ve Bibilo i ôron ia maa u iyol yô
Alaghga a lu taver we u hiin Bibilo i ôron. Kpa u hiin je, Bibilo i ôron ia hingir u ‘saren we tsung,’ er or ka nana hen u yan kwaghyan u nan lu a vande yan ga, maa kwaghyan shon a hingir u doon nan nahan. Ôr 1 Peteru 2:2, maa lam nen sha mpin ne:
-
U hen wer, aluer u ngu ôron Bibilo hanma iyange yô, a gema maan we iyol u ôron i hanma shighee?
Nenge VIDIO i i lu heen ne nahan nenge kwagh u ior mbagenev yange ve er ve, Bibilo i ôron gema maan ve iyol yô. Maa lam nen sha mbampin mba ve dondo ne.
-
Ken vidio la, ka akaa a nyi yange taver agumaior la u eren, kpa ve nôngo ve ere?
-
Ka nyi yange i wase ve, ve gema ôron Bibilo hanma shighe?
-
Yange ve er nena ve Bibilo i ôron seer doon ve?
Akaa a aa wase u u hii u ôron Bibilo yô:
-
Ker Bibilo i i gem i vough, sha asember a i lamen a mi ainge yô. Kar u ôron Icighan Bibilo i Tar u He la aluer ngi ken zwa wou, shin ken ma zwa ugen u u fe tsembelee yô.
-
Hii u ôron Bibilo hen vegher u u nenge wer una hemba doon we u ôron la. Wea soo u fan akaa agen a u er ve a wase u yô, nenge caate i i lu a itinekwagh ér “Hii Bibilo i Ôron” la.
-
Ver ikyav hen ijiir i u ôr u kighir la. Nenge caate i ken takeda ne, i i lu a itinekwagh ér “Ver Ikyav Ape U Ôr Bibilo u Kighir La.”
-
Er tom a JW Library®app. Aluer u ngu a app ne sha hanseeti shin sha ambaakaa la nahan yô, u fatyô u ôron Bibilo shin ungwan i ape u lu cii.
-
Er tom a ngeren u seer u ken Icighan Bibilo i Tar u He la. Ngeren la ngu a akaa a aa na a maa u iyol u ôron Bibilo yô, er umaape man ucaate man ngeren mba pasen asember nahan.
5. Wa iyol keghen a kegh or u nan henen Bibilo a we la
Ôr Pasalmi 119:34, maa lam nen sha mpin ne:
-
Er nan i doo u u er msen cii ve u ôr Bibilo, shin u er msen cii ve u hii u wan iyol sha kwagh u i gbe u a va hen vea we ken Bibilo laa?
U er nan ve hanma kwa u u hen Bibilo cii u hemba zuan a kwagh u wasen we? Shighe u u lu wan iyol u henen kwagh ken ma ityough ki takeda ne yô, er akaa ne:
-
Ôr akumaihiange a hiihii a ken ityough kira, a a lu cii man vegher u “Hen Kwagh i Za Shimi” la.
-
Bugh avur a Bibilo a i tese la ôr, shi nôngo u kaven er a zough sha kwagh u i lu lamen sha mi la.
-
Hanma mpin u i lu lamen sha mi yô, ta hwange ape ikyar na i lu la; kwagh ne una wase u u va lamen sha kwagh u u lu henen la vea or u nan henen Bibilo a we la.
U fa kpa?
Se Mbashiada mba Yehova se er tom a Ubibilo kposo kposo. Kpa se hemba soon Bibilo i i yer ér, Icighan Bibilo i Tar u He la, sha ci u i gema Bibilo ne vough, shi i taver u kaven ga, shi i nger iti i Aôndo sha ajiir a i gbe u a nger la vough vough.—Nenge ngeren u sha Intanet u a lu a itinekwagh ér, “Mbashiada mba Yehova mba a Bibilo Ve Kposo?” la.
IOR MBAGENEV KA VE KAA ÉR: “Bibilo i henen kam tom. M ngu a shighe shin agee ga.”
-
We u kaa wer nyi?
KA NYI U HENE?
Kwagh u u er ve u ôr Bibilo shi ia hemba wasen we yô, ver shighe u ôron i hanma iyange, shi vande eren msen sha er Aôndo una wase u u kaven yô, shi waan iyol sha kwagh u i gbe u a va hen vea we ken Bibilo la.
Mbampin mba umbur kwagh u i hen yô
-
U er nan ve u ôr Bibilo u hemba zuan a kwagh u wasen we?
-
Ka hanma shighe nahan una doo u u ôron Bibilo shin henen i?
-
Er nan i doo u u vanden wan iyol sha kwagh u i gbe u a va hen a we ken Bibilo laa?
SEER HENEN KWAGH
Hide umbur akaa a i kaa ér u er ve, u ôr Bibilo u hemba zuan a kwagh u wasen we la.
“Er U Seer Zuan a Mtsera ken Bibilo i Ôron Yô” (Iyoukura Namba 1 2017)
Hen igbenda itiar i ôron Bibilo.
“Bibilo ia Wasem Nena?—Vegher u sha 1: Seer Henen Kwagh ken Bibilo You” (Ngeren u sha Intanet)
Nenge kwagh u u er ve Bibilo i ôron ia maa u iyol yô.
Hen akaa a aa wase u u henen Bibilo yô, hen ior mba ve ôr Bibilo ica i gbe la.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
