Yange anyom kar udubu imôngo je kpa, or môm lu a zua a mlumun sha mpin la ga. Sha ayange la, ubombauangev mba tsaren wua ior umiliôn imôngo. Ken masejime yô, mbasainsi va zua a mfe u mimi sha kwagh shon. Ve kav er i lu ankaam mba umav mba i nengen a ve sha ashe noon ga, i yer ve ér bacteria shin viruses la, ve ne iangev yô. Kwagh môm u ve zua a mfe u mimi sha mi ne wase ior u yangen shi sôron iangev kpishi, nahan ior ubiliôn imôngo hingir u tsan ayange kpishi shi hemban lun gbong gbong.

Hide sha mbampin mba sha akaa a hange hange agen di ye? U hen wer aluer u zua a mfe u mimi sha mbampin mba ve dondo ne nahan, kwagh la una bende a we nena?

• Ka an nan lu Aôndo?

• Ka an nan lu Yesu Kristu?

• Ka nyi i lu Tartor u Aôndo?

• Uma a va lu nena ken hemene?

Ior umiliôn imôngo zua a mbamlumun sha mbampin mbara, nahan kwagh la na mlu ve hemba doon cii. We kpa mbamlumun mbara vea fatyô u wasen we.

Alaghga u pine wer, ‘Or a fatyô u zuan a mfe u mimi sha ma kwagh je kpa?’ Kera ga je kpa, ikyav tese ér akaa kpishi mba kera fantyô u zuan a iwanger sha mi ga. Sha ci u nyi?

Ior kpishi mba ne jighjigh a akaa a ugomoti shin ikyômpeni shin mbatôôn abaver ve ôron ve la ga. Ka i taver ve u fan mkposo u akaa a a lu a mimi jim jim man a a lu mbamhen mba iorov, man a a we lun a mimi ker man a a lu mbaaie purututu, a ka i ôron inja er ka mimi la. Ken mlu u ior ve kera ne mbagenev jighjigh ga shi i ôron ior kwagh u mimi ga ne, ior mba gbe anyiman ka sha gbenda u i pase ve akaa a mimi la tseegh ga, akaa a mimi jim jim, a i pase ve kpa ka ve gba anyiman sha mi.

Er mbamtaver mban ve lu nahan kpa, u fatyô u zuan a mbamlumun mba mimi sha mbampin mba sha akaa a a hembe lun hange hange ken uma yô. U er nan ve u zua mini? U er er ka u er ve u zua a mbamlumun sha mbampin mba sha akaa a a lu hange hange keng ga la.

Hanma iyange yô, ka u nôngo u keren mfe u mimi sha kwagh. Nenge ikyav sha kwagh u kwase ugen, iti na ér Jessica. A kaa ér: “Wan wam u kwase ka una ya abun i vihi un iyol dedoo, je yô ka a̱ wa ishange abun i môm tseegh sha kwaghyan kpa, i lu kwaghbo.” Ka i gba u Jessica una fa ér kwaghyan u un lu yamen sha ci u wan na u kwase la cii yô, i kar a ivurugh ki abun sha mi ga. A kaa wener: “Kwagh u ka m hii eren yô, ka m ver ishima m ôr ngeren u a ter akaa a i er kwaghyan shon a mi la sha u me fa ilyôghonov mbi i we sha mi yô. Maa m tôv sha mi, je m pine orvesen u kômpeni la sha u me fa, aluer anmkure u abun nôndo sha kwaghyan shon abu, zum u i lu eren un la yô. Shi m seer tôvon hen pe a pasem gbenda u kômpeni shon u eren kwaghyan la sha mimi, sha er me na jighjigh yô.”

Alaghga mbampin mba u keren mbamlumun sha mi ayange ayange la, a lu mba sha akaa a hange hange er kwagh u Jessica la nahan ga, kpa u fatyô u eren akaa a a dondo ne, nahan zuan a mbamlumun sha mbampin ou:

• Ungwa hanma kwagh.

• Seer tôvon sha mi.

• Tôv hen pe a ôr u kwagh u mimi yô.

Gbenda ne môm shi ua wase u u zuan a mbamlumun mba mimi sha mbampin mba sha akaa a hange hange ken uma. Er nan se kaa nahana?

Zum u Jessica lu keren mbamlumun sha mbampin mba sha akaa a hange hange ken uma yô, a er imba kwagh u ka a er shighe u a lu keren u fan akaa a wan na u kwase ka una ya ve, a gba angev la. A kaa ér, “Yange m ver ishima m ôr Bibilo shi m tôv sha akaa a m ôr la vighe vighe, nahan kwagh la wasem u zuan a mbamlumun mba mimi.” Ior umiliôn imôngo fa kwagh u Bibilo i ôr sha mbampin mban yô, er Jessica nahan:

• Ityôkyaa i se lu uma jim yô ka nyi?

• Ka nyi ka i̱ er or zum u nan kpe kera laa?

• Hii nan ve se lu yan icana?

• Ka nyi Aôndo a lu eren sha u karen a ican i yan cii kera?

• Se er nan ve msaanyol a lu hen tsombor wasa?

U fatyô u zuan a mbamlumun mba mimi sha mbampin mban kua mbagenev sha u ôron Bibilo shi seer tôvon sha mi sha Intanet hen ijiir i www.ps8318.com/tiv la.