UUMACE

Kwagh u Bibilo i kaa yô: Aôndo “gba [tar] ér u̱ lu gbilin dang ga, A maa u sha er ior ve̱ tema sha u” yô.—YESAIA 45:18.

TAR

Kwagh u Bibilo i kaa yô: “Kov ugen ka u kar, ugen shi u va, kpa tar yô, ngu [lun] gbem sha won.”—ORPASENKWAGH 1:4.

INJA I KWAGH NE ÉR NYI? Bibilo tese ér mayange a nande tar kera ga, shi ior vea za hemen u lun sha u gbem sha won. Nahan mkurtar ka nyi?

HEN SHA KWAGH NE: Bibilo tôô mkurtar u a lu van ne kar sha kwagh u ngise er sha ayange a Noa la. Sha ayange la, tar “iv a [ipila].” (Genese 6:13) Kpa Noa yô lu orperapera. Nahan Aôndo kura Noa kua tsombor na. Kpa mbaaferev cii yô, a tim ve sha mngerem ma deemee. Bibilo ôr kwagh u ngise er la ér: “I tim ior mba sha ayange la, shighe u mngerem va sha tar deemee la.” (2 Peteru 3:6) Lu mkurtar u sha ayange la je la. Nahan kpa, lu nyi i tim kera? Lu tar ga, kpa lu mbaaferev mba ve lu sha tar la. Nahan Bibilo ka ia ôron kwagh u mkur u tar ne yô, i lu tar u se tem sha u ne ga. Kpa ka i lu mbaaferev mba ve lu sha tar la, kua akaa a tar u eren la cii, i ôron ye.

MBAMZEYOL MAN AFERAKAA

Kwagh u Bibilo i kaa yô: “Shi côhin tsô iferor á kera lu ga; mimi je, ú nenge sha ijiir i nan, nan nan kpaa, kpa nana lu ga. Kpa mbaasemaleghlegh yô, vea ya dyako u tar, á saan ve iyol sha mngee u bem.”—PASALMI 37:10, 11.

INJA I KWAGH NE ÉR NYI? Mngerem ma Deemee ma sha ayange a Noa la yange ma kar a iferkwagh kera vindi vindi ga. Shighe u Mngerem ma Deemee la yange karen kera yô, ior mba wan afer shi hide lu sha tar. Kwagh ne na yô, hanma or ngu yan ican kpishi hegen. Nahan kpa, ica ia kera gba ga tsô Aôndo una bee a iferkwagh vindi vindi, er orpasalmi kaa nahan, ér: “Iferor á kera lu ga.” Aôndo una kar a iferkwagh cii kera sha ikyev i Tartor na. Tartor la ka gomoti u sha u una hemen uumace mba eren ishima i Aôndo mba vea lu shin tar yô.

HEN SHA KWAGH NE: A doo mbahemenev mba tar ne u suen Tartor u Aôndo je kpa? Bibilo tese ér vea sue Tartor la ga. Vea er kwagh sha ibume, vea hendan a Tartor u Aôndo. (Pasalmi 2:2) Nahan nyi ia ere? Tartor u Aôndo ua kar a ugomoti mba uumace cii kera, kpa “u yô, ua lu gbem sha won.” (Daniel 2:44) Gba u a kar a ugomoti mba uumace cii kera sha ci u nyi?

Kwagh u Bibilo i kaa yô: “Or u zenden la, mvershigh u iaven i angahar a nan ngu sha ikyev i nan ga.”—YEREMIA 10:23.

INJA I KWAGH NE ÉR NYI? I gba uumace ér mbagen ve hemen mbagenev ga. Ve fa u hemen ior ga, shi ugomoti vev mba fetyô u sôron mbamzeyol mba iorov kpaa ga.

HEN SHA KWAGH NE: Takeda ugen (Britannica Academic) kaa ér, ikyav tese wang ér gomoti môm sha tar una fatyô u “been a mbamzeyol mba ve tser tar cii ne, ken tar u a hemen u la ga, er ibanave shin ijen shin angev shin mtenger u tar nahan, shin ijeverahumbe i vihin akaa shin mngerem ma saren avenge, shin ityav shin igbenda igen i ior ve eren tswam la.” Takeda shon shi kaa ér: “Mbagenev . . . na jighjigh ér saa tar cii ua lu sha ikyev i gomoti môm ve, gomoti la una fatyô u been a mbamzeyol mban cii gbindigh gbindigh ye.” Nahan kpa, aluer ugomoti mba tar ne cii zua hingir gomoti môm je kpa, a lu uumace mbaasorabo, mba ve fetyô u sôron mbamzeyol mba se ter sha heen ne ga la di tsô shi vea lu hemen ye. Ka gomoti u Tartor u Aôndo la tseegh a lu a tahav mbu sôron mbamzeyol mba tar ne cii, been a mi vindi vindi ye.

Sha nahan yô, Bibilo kaa ér mkurtar, ka mkur u tar u ifer u se lu ker ne je la, ka kwagh u ior mba ve eren kwagh u doon Aôndo la vea cia ga. Kpa ka kwagh u dedoo u veren ashe a mi, sha ci u Aôndo una va kar a tar u tse u u vihi jiva jiva ne kera, una gema u ua hingir tar u he, u doonashe tsung!

Ka hanma shighe kwagh ne una ere? Ngeren u a dondo ne una pase mlumun u Bibilo i ne yô.