IPILA I NOM A KWASE MAN I YAVEN A KASEV: Mzough u Ityar Cii kaa ér: “Hanma ijiir i kasev ve lu i kom utar yô, kwase môm ker ka i lu u yange nom u nan kighir nan shin yav a nan sha igyosor yô.” Kwagh u vihin cii je yô, mzough ne shi “ker ahaba ér aluer kasev mba hen ijiir kuma ityov itian yô, ka u ken hemen mô ken ve nana va tagher a or u nana yav a nan, shin nana soo u yaven a nan sha igyosor yô.”

AFER A SHA GODOBI: I kaa ér ikwe i upilambaiorov i hemban 30,000 nahan ngi eren afer ken tar u Amerika. Ken veghertar u Latin America la di, hanma ijiir i u zough a iorov 3 cii yô, or 1 ken ve ka i lu or u yange nan tagher a ipila yô.

IKYU I IPILAGH: I ker ahaba ér, ken inyom i 2012 la tseegh yange ior kpe ikyu ipilagh je zurum dubu deri utaan. Ingyegh kin hemba ki ior mba yange i wua ken uitya ken inyom shon yô. Mba hembe wuan ior faa faa ken ityar i i lu ken Imbusutariyan i Afrika man Central America la. Ken inyom i môm tseegh, ingyegh ki ior mba ka i wua sha ajiir ne la ka ki hemba ki ior mba i woo sha tar jimin cii kwa nyiin. U tesen ikyav yô, ken inyom i môm tseegh, yange i wua iorov mba hemban 100,000 ken Latin man Central Amerika. Ken inyom shon la i wua ior ken tar u Brazil tseegh hemba 50,000. A fatyô u been a ipila elegh elegh je kpa?

Er nan ipila i ngee yum nahana? I fa atôakyaa kpishi. Agen yô, ka a je ne: Ior ka ve nengen ér mbagenev hemba ve shin ve mba a kwagh ga yum. Shi ior mba man mcimbim ma bom shin mba man msôrom karen ikyaa inya, shi ior kpishi wa uma u mbagenev ikyô ga, shi mbayev ka ve nengen aeren a pilagh hen mbaganden, shi mbaaferev mba ve eren ipila la kpa, ka inja er mba tsahan ve ga nahan.

Ka mimi, i wa yangen ipila ken ityar igen. I kaa ér ken tar u Brazil yô, ken anyom pue a a sember karen ne, ipila pande kpishi hen geri u São Paulo u ior ve ngee her yum la. Nahan cii kpa, ipila man hanma ityô ifer cii ngi zan hemen hen geri la her. Hanma inyom yô, ka i wua iorov 10 ken atô u iorov 100,000. A er nan ve a bee a ipila elegh elegh sha tara?

Saa upilambaiorov vea gema mbamhen kua aeren a ve ve ipila ia bee sha tar elegh elegh ye. Kwagh u una wase mbaeren ipila u geman yô, saa vea de imanger man hua kua ieren i wan ayol a ve ikyo tseegh la, vea de dooshima una ya tor ken a ve, shi vea naan ior icivir shi kwagh u ior una gba ve ishima.

Ka nyi nahan ia na ve or a gema imba la yum nahana? Hen sha kwagh u Bibilo i tese ne:

• “Ka dooshima u Aôndo ne, ka u se̱ kuran atindi a Na.”—1 Yohane 5:3.

• “Mcie u cian TER yô, ka u vendan kwaghbo je.” *—Anzaakaa 8:13.

Ka nyi ka i na ve upilambaiorov je kpa ve de ipila vindi vindii? Aôndo ngu a doo ve ishima sha mimi, shi ve cian u eren kwagh u vihin un. Kwagh eren nahan mimii?

Nenge ikyav hen gumor ugen, mba yer un ér Alex. * Yange nôngo num a ior ngee, nahan i kôr un i wuhe ken purusu ken tar u Brazill, tsa ker anyom 19. Yange hen Bibilo vea Mbashiada mba Yehova, nahan ken inyom i 2000 la gema hingir Orshiada u Yehova. Mimi je a de ipila i yange eren laa? Een. Heela tseegh ga, Alex ka a vaa afanyô kpishi sha akaabo a yange eren la. A kaa ér: “Hegen Yehova doom ishima, sha ci u a wasem m hingir u nengen mer mimi je a dem kwaghbo. Er Yehova a doom ishima shi m nenge mer ngu wasen mo yô, kwagh la wasem u undun igbenda yam i tse la.

Orgen u un kpa a lu ken tar u Brazil yô, mba yer un ér César. Yange numun gbenda shi cirin ior ishigh inya. Er kwagh ne kuma anyom 15 nahan. Lu nyi i na ve de inja na nee? Yange i kôr un i wuhe ken purusu, nahan Mbashiada mba Yehova za pase un kwagh ker, maa un kpa hen Bibilo. César kaa ér: “Lu hiin je m zua a kwagh u injaa ken uma wam ne. Yange m fa mer gba u Aôndo una doom ishima. Shi m hen u cian un, inja na yô, m cia mer me hide me eren akaabo yô, a doo Yehova a mo ga. Yange m soo mer a nenge er erdoo na la a gbem kwagh kpishi yô. Dooshima la kua mcieaôndo wam la na yô, m gema.”

Kwagh u iorov mba uhar mban tese se nyi? A tese ér Bibilo ngi a tahav kpishi mbu geman gbenda u ior ve henen kwagh la, nahan geman uuma vev. (Mbaefese 4:23) Alex u se vande teren kwagh na sha heen ne shi kaa ér: “Kwagh u yange m hen ken Bibilo la lum inja er ka mngerem ma wang, ma i lu kiren mbamhen av mba bov mbara a mi sha u wanger mo nahan. Akaa ne cii yange m fa mer a tsa kpa me de u eren a ken uma wam ga.” Mimi je, ka sea iv asema a ase a loho u Bibilo u u lu wang la yô, loho la u zenda shin u kire mbamhen mba bov kera. Mkaanem ma Aôndo ma a tahav mbu kiren se lun wang. (Mbaefese 5:26) Kwagh u ka a due ken kwagh ne yô, mbaaferev kua mbawan ayol a ve ikyo tseegh ka ve undu igbenda ve i tse la, ve hingir u eren kwagh a ior kundu kundu man ken bem. (Mbaromanu 12:18) Ka vea dondon akaawan a Bibilo yô, ve zua a bem ken uuma vev.—Yesaia 48:18.

Mbashiada mba Yehova mba hemban miliôn anigheni ken ityar 240 zua a gbenda u vesen u been a ipila kera. Ior-il man ior-nyian, mbanyarev man atsanaior, kua mbafantakerada man mbazan makeranta ga cii hen u lun vea Aôndo kôôsôô shi cian un. Shi ve hen u doon ayol a ve shi lun ken tsombor ve u sha tar cii la bem bem. (1 Peteru 4:8) Mlu ve ne ngu tesen ér mimi je ipila ngi va been sha tar elegh elegh.

Bibilo tôndo zwa ér ica a gba ga tsô Aôndo una bee a ipila sha tar. Aôndo ngu va timin tar u u we ipila nyian yum ne “sha iyange i ijirigh man mtim u mba ve vende Aôndo la.” (2 Peteru 3:5-7) Upilambaiorov vea kera lu u eren ior ican ga. A er nan ve se fa ser mimi je Aôndo una va er kwagh u been a ipila sha tar elegh eleghe?

Bibilo kaa ér, “or u ipila i doo nan la yô, [Aôndo] kôr nan ihyom.” (Pasalmi 11:5) Shi Aôndo u a gbe akaa cii la soo bem shi kwagh u mimi doo un. (Pasalmi 33:5; 37:28) Ka nahan ve i lu u una de upilambaiorov ér ve lu uma gbem sha won ga ye.

Mimi je, tar u he u bem una lu ker la ngu van. (Pasalmi 37:11; 72:14) Er nan u seer timen fan kwagh u u er ve u kuma u va lun sha tar shighe u ipila ia bee sha u kera la ga?