Bibilo tese ér ashighe agen mbatyomov ka ve kura mbacivir Aôndo sha mimi sha u nôngon ér i er ishima i Aôndo. (Pasalmi 34:7) Ikyav i tesen yô:

• Shighe u Yehova va a mtim sha Sodom man Gomora, agar a wan afer la, mbatyomov wase orjighjigh Loti man tsombor na u duen.—Genese 19:1, 15-26.

• Ken Babilon u tsuaa la, i kende agumaior agen ken Mbaheberu atar ken atse a usu u yeghen, kpa Yehova ‘tindi ortyom Na, va yima mbayev Nav.’—Daniel 3:19-28.

• Orjighjigh Daniel yange tse shin ihungwa i ubegha sev mbu aven yô, kaa wener un war ka sha ci u “Aôndo . . .  tindi ortyom Na, va cir ubegha ijô.”—Daniel 6:16, 22.

Ashighe kpishi yange mbatyomov ve wa uwegh sha ityom i nongo u Kristu u sha ayange a tsuaa la sha shighe u i gbe hange hange u eren nahan yô, sha u kuren awashima u Yehova. Ikyav i tesen yô:

• Ortyom yange bugh ihinda i purusu, kaa a mbaapostoli mba i wuhe ve la ér ve za hemen u pasen kwagh ken tempel.—Aerenakaa 5:17-21.

• Ortyom yange kaa a orivangeli Filibu ér a za sha gbenda u u dugh ken Yerusalem u yem hen Gasa la, a za pase Oretiopia u yange za ken Yerusalem u za civir Aôndo la kwagh.—Aerenakaa 8:26-33.

• Shighe u va kuma Aôndo u mba ve lu Mbayuda ga la ve hingir Mbakristu yô, a tindi ortyom na va ande hen Korneliu u lu torutya u Roma la, ken mpase u sha mnenge, a kaa a na ér a tindi ior ve za yila apostoli Peteru a va hen ya na.—Aerenakaa 10:3-5.

•   Shighe u i wuhe apostoli Peteru ken purusu la, ortyom va ande hen a na, hemen un due a na ken purusu kera.—Aerenakaa 12:1-11.

Ikyav tese ér Aôndo ngu eren tom a mbatyomov u wasen ior nyian sha ivande er i ter ken Bibilo la nahan ga. Kpa, sha kwagh u shighe wase ne yô, Yesu yange kaa ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:14) Nahan u fa er mbatyomov ve lu hemen mbadondon Kristu ken tom u pasen kwagh ne kpa?

Takerada u Mpase tese je ér mbatyomov vea lu eren tom kpoghuloo nyian u wasen ior sha tar cii u henen fan kwagh u Yehova Aôndo kua awashima na sha uumace. Apostoli Yohane yange nger ér: “M nenge ortyom u Sha ugen lu purugh sha kwavaôndo lu a Icôronloho u Dedoo u yôôn hen mba ve tem shin tar cii, hen hanma ikyurior man hanma nongo man hanma zwa man hanma nongoior. Lu kaan sha zegeimo er: Cia nen Aôndo, na nen Un icivir gadia shighe Na u ôron ijir kuma ve, civir nen Un u A er Sha man tar man zegemnger man amboramnger kpaa la.” (Mpase 14:6, 7) Akaa a a er ior kpishi nyian la tese ér mbatyomov mba suen tom u pasen kwagh u Tartor u i lu eren tar sha won cii la. Sha kpôô yô, orisholibo môm tseegh kpa ka nan gema ishima nana hide hen Yehova yô, ‘mbatyomov mba Aôndo ve ember.’—Luka 15:10.

Ka nyi ia er shighe u a er tom u pasen kwagh a bee laa? Mbatyomov mba ve lu “akumautya a Sha” la vea kohol Yesu Kristu u a lu Tor u utor la sha u nôngon “ityav mbi iyange i vesen i Aôndo, Uhembanagee la,” ka ityav mbi Armagedon je la. (Mpase 16:14-16; 19:14-16) Mbatyomov mbaageev mban vea er tom u wuan kwagh sha icighan iyange i Ter Yesu “una tsaha . . . mba ve we Loho u Dedoo u Ter wase Yesu ikyo ga la.”—2 Mbatesalonika 1:7, 8.

Sha nahan yô, fa wer kwagh wou gba mbatyomov ishima kpishi je. Gba ve ishima tsung u wasen mba ve soo u civir Aôndo la, shi Yehova ngu a tindi ve kwa kimbir kimbir ér ve za taver mba ve civir un sha mimi mba ve lu shin tar la, shi ve kura ve kpaa. —Mbaheberu 1:14.

Nahan yô, hanmô wase nan ngu a kwagh u i gbe hange hange u nana tsua yô. Se tsua u ungwan loho u dedoo u i lu pasen tar sha won wuee la shi dondon u kpa? Mbashiada mba Yehova mba hen ijiir you vea wase u u zuan a iwasen i mbatyomov mba Aôndo mbaageev ve ne la.