Ôron Kwaghôron U Aôndo Vangertiôr
Ôron Kwaghôron U Aôndo Vangertiôr
“I iv ve a Icighan Jijingi, ve gba ôron kwaghôron u Aôndo vangertiôr.”—AER. 4:31.
1, 2. Gba u se nôngo se fa u pasen kwagh tsembelee sha ci nyi?
SHIGHE u mase shin ayange atar u Yesu una kpe la, a kaa a mbahenen nav ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” Cii man Yesu u i nder un shin ku la, kôndo yem sha yô, a wa mbadondon un tindi ér ‘ve za gema akuraior cii a hingir mbahenen, ve tesen ve u kuran akaa a un we ve kwagh sha mi la cii.’ Yange tôndo zwa a ve ér una luun a ve “ayange ayange zan zan mkurtar je.”—Mat. 24:14; 26:1, 2; 28:19, 20.
2 Er se lu Mbashiada mba Yehova yô, se mba eren tom u yange i hii u eren u ken derianyom u sha môm la kpoghuloo. Tom môm kpa kuma sha tom u waren uma, u pasen kwagh u Tartor shi geman ior hingir mbahenen la ga. Sha nahan yô, hingir hange hange u se hen u pasen kwagh tsembelee! Ken ngeren ne, se nenge er u den ser icighan jijingi a hemen se la una wase se u lamen vangertiôr shighe u se dugh kwaghpasen yô. Ngeren mba uhar mba ve dondo ne vea tese se er jijingi u Yehova una wase se u fan ityesen tsema tsema shi pasen kwagh nduuruu kpaa yô.
Gba u Se Lu a Vangertiôr
3. Gba u se lu a vangertiôr ken tom u pasen kwagh u Tartor sha ci nyi?
3 Tom u Aôndo a ne se u pasen kwagh u Tartor la ka tom u civirigh kpen kpen. Nahan kpa, ashighe agen ka u lu a mbamtaver. Shin er ior mbagenev ka ve kegh ato a loho u dedoo u Tartor u Aôndo nahan kpa, mbagenev kpishi ka ve tese ieren i ior mba sha ayange a Noa la. Yesu kaa ér: “Ve fa ga zan zan mngerem ma deemee va, va kuwa a ve cii.” (Mat. 24:38, 39) Mbagenev ka ve naha se tar shi ve hendan a vese kpaa. (2 Pet. 3:3) Alaghga mbautahav man mba ne ze makeranta imôngo shin mba hen ijiirtom kua mba hen tsombor wase je kpa, vea hendan a vese. U seer yô, se mba a mbamyen asev er ashe a cian man mciem ma ior vendan u keghen ato a vese nahan. Akaa agen kpishi kpa nga a aa na a taver se u lamen “vangertiôr” shi ôron mkaanem ma Aôndo “gbar gbar” yô. (Ef. 6:19, 20) Aluer se soo u zan hemen u ôron kwaghôron u Aôndo yô, gba u se lu a vangertiôr. Kanyi ia wase se ve se lu a vangertiôr shono?
4. (a) Kanyi i lu vangertiôrô? (b) Apostoli Paulu yange lu a vangertiôr u lamen a Mbatesalonika nena?
4 Inja i ishember i ken zwa Grika i í gem ér “vangertiôr” la yô, ka “u ôron kwagh gbar gbar shin u ôron kwagh paase paase gayô u ôron kwagh a ashe a cian shio.” Ishember shon ngi ôron kwagh u lun a “ishimataver shin u suur sha kwagh gayô u eren kwagh a mciem shio.” Kpa vangertiôr ka iliam i kpôghôô shin i sha icihi ga. (Kol. 4:6) Aluer se mba a vangertiôr je kpa, se soo ser se luun ken bem a ior cii. (Rom. 12:18) Heela tseegh ga, er se pasen loho u dedoo u Tartor u Aôndo yô, gba u se lu a vangertiôr, kpa shi se yaren tom a mi sha kwaghfan sha er se hii or iyongo a mfe shio shighe u se lu pasen kwagh ga yô. Sha mimi yô, cii man se lu a vangertiôr yô, gba u se nôngo se lu a aeren agen kpaa. Se mba zough a imba vangertiôr ne sha agee a ase shin sha u suur sha ayol a ase kpaa ga. Er i ‘er a [apostoli Paulu man akar a na] dang ken Filipi’ yô, yange ve “lu vangertiôr” u shi lamen a ior mba ken Tesalonika nena? Paulu nger ér: “Se lu vangertiôr ken Aôndo wase.” (Ôr 1 Mbatesalonika 2:2.) Yehova Aôndo una fatyô u been a mciem ken a vese shi nan se imba vangertiôr la.
5. Yehova yange na Peteru man Yohane kua mbahenen mbagenev vangertiôr nena?
5 Shighe u “mbavesen [mba hemen ior] man mbatamen vev man mbangeren vev” hendan kwagh a apostoli Peteru man apostoli Yohane yô, ve kaa ér: “Aluer a lu vough sha ishigh ki Aôndo u sé hemba wan ne ikyo a Aôndo yô, kaa nen ase! Gadia se yô, se fatyô u den u ôron kwagh u se ongo man se nenge ne ga.” A u ve eren msen hen Aôndo ér i de u tôvon ve a ican yô, ve kua mbananjighjigh a ve imôngo gema er msen ér: “Tere, nenge myange ve ne, yô, na ikpan You ne ve̱ ôr kwagh vangertiôr.” (Aer. 4:5, 19, 20, 29) Yehova yange ungwa msen ve la nena? (Ôr Aerenakaa 4:31.) Yehova yange wase ve sha ikyev i jijingi na ve lu a vangertiôr. Se kpa jijingi u Aôndo una fatyô u eren a vese nahan. Sha nahan yô, se er nan ve se ngohol jijingi u Aôndo shi una hemen se ken tom u pasen kwagha?
Er u Er Ve u Lu a Vangertiôr Yô
6, 7. Ka gbenda u nyi u hembe lun vough cii u se ngohol icighan jijingi u Aôndo? Tese akav.
6 Gbenda u hemban lun vough u se fatyô u ngohol icighan jijingi u Aôndo yô, ka u sônon ser a na se jijingi shon. Yesu yange kaa a mbaungwan a na ér: “Aluer ne mba ne lu mbaaferev je kpaa ne fa u nan ônov enev uiyua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?” (Luka 11:13) Sha mimi yô, gba u se eren msen hanma shighe se sônon ser i na se icighan jijingi. Aluer igbenda igen i pasen kwagh, er kwaghpasen u sha godobi shin u ian a due, gayô u pasen kwagh hen ijiir i í eren kpenga nahan cier se iyol yô, se fatyô u eren msen hen Yehova sônon jijingi na shi kaan a na ser a wase se, se lu a vangertiôr u i gbe u se lu a mi la.—1 Tes. 5:17.
7 Ka kwagh u Kwasekristu ugen u i yer un ér Rosa la er je la. * Iyange igen Rosa lu hen ijiirtom na yô, a nenge kwase ugen u ve tesen tica imôngo ken makeranta yô lu ôron ibaver i ken makeranta ugen i sha kwagh u mbayev mba i lu eren a ve dang dang yô. Ibaver ne za tica ne iyol yum je yô, a ngor imo a kaa a ér, “Er nan tar ne u lu vihin yum nahana?” Rosa yange de ér ian i pasen kwagh ne i kar un ga. Cii man a hii kwaghpasen yô, yange er nyi? Rosa kaa ér: “M er msen hen Yehova shi m sôn jijingi na mer a wasem.” Yange pase tica ne kwagh shi ver shighe u vea hide vea seer lamen sha itinekwagh la kpaa. Shi time ase sha kwagh u anyekwase ugen ken gar u New York City u kuman anyom ataan, iti na ér Milane. Milane kaa ér: “Cii man m za makeranta yô, hanma shighe mo man ngôm ka se vande eren msen hen Yehova.” Ka ve er msen ve sôn nyi? Ka ve er msen sha ci u Milane a lu a vangertiôr u pasen mtil na shi ôron kwagh u Aôndo na kpaa! Ngô u Milane kaa ér: “Kwagh ne wase Milane u pasen mtil na sha kwagh u ayange a mar man umemyol shi palegh u nyôron iyol na ken aeren ne shighe u i lu eren a la kpaa.” Akav ne tese ér msen una fatyô u wasen se u lun a vangertiôr.
8. Kanyi se fatyô u henen hen profeti Yeremia sha kwagh u lun a vangertiôrô?
8 Shi hen sha kwagh u yange wase profeti Yeremia lu a vangertiôr la kpaa. Shighe u Yehova ver un profeti u akuraior la, Yeremia kaa ér: “M fa u ôron kwagh dedoo ga, gadia mo m ngu wanye je.” (Yer. 1:4-6) Shighe kar yô, Yeremia hingir u pasen kwagh nduuruu man a uwergban shio, je yô, ior kpishi gema nengen un ér ka or u yôôn ikyaa i bo tseegh. (Yer. 38:4) Yange pase kwagh u ajiraôron a Yehova hemba anyom 65. Kwagh u pase vangertiôr man a mciem shio la na yô, i fa un hen Iserael i tser, nahan Yesu va ngur lamen vangertiôr, er Yeremia kpe anyom kar hemba 600 la yô, mbagenev na jighjigh ér ka Yeremia je a nder shin ku a lu pasen kwagh ye. (Mat. 16:13, 14) Shin er sha hiihii la uwer gba Yeremia nahan kpa, yange er nena ve hemba ashe a ciana? A kaa ér: “[Mkaanem ma Aôndo] hingir mo ken ishima er usu u hian, u i cir u ken akuhe am yô, m wa ishima je, m vôr.” (Yer. 20:9) Mkaanem ma Aôndo er tahav ken uma u Yeremia shi mgbegha un u lamen kpaa.
9. Mkaanem ma Aôndo ma a fatyô u benden a vese er yange ma bende a Yeremia nahan sha ci u nyi?
9 Apostoli Paulu yange kaa ken washika na u nger hen Mbaheberu la ér: “Mkaanem ma Aôndo ma uma je, ma tem gbilin ga, ma hemba esen a hanma sanker u esen akur ahar cii, ka ma nyôr zan zan ma pav uma a jijingi man shi uijuan a mshiam kpaa, ka ma kar mbamhen kua mbaawashima kpaa.” (Heb. 4:12) Loho shin mkaanem ma Aôndo ma a fatyô u benden a vese vough er yange ma bende a Yeremia nahan. Nahan kpa, umbur wer er lu ior i yar tom a ve u ngeren Bibilo nahan kpa, ka takerada u kwaghfan u uumace ga, sha ci u lu Aôndo mgbegha ior mbara nger i ye. Peteru u sha uhar 1:21 kaa ér: “Gadia mayange ma kwaghôron u profeti due sha awashima u or ga, kpa Icighan Jijingi mgbegha ior man ve ôr kwagh u Aôndo ye.” Aluer se tôô shighe se hen Bibilo zulee sha tseeneke wase yô, asema a ase aa iv a loho u icighan jijingi na i nger la. (Ôr 1 Mbakorinte 2:10.) Loho la ua fatyô u hingir ken a vese “er usu u hian” yô, nahan se kera kôrcio u den ser u lu ken a vese tseegh ga.
10, 11. (a) Aluer se soo ser se lamen vangertiôr yô, gba u se hen Bibilo nena? (b) A hemba kpa ter gbenda môm u ú soo wer u yar tom a mi sha er u seer fan u henen kwagh sha tseeneke wou yô.
10 Aluer se soo ser Bibilo yase i henen i sha tseeneke la i wase se tsembelee yô, gba u se hen i̱ sha gbenda u loho u Bibilo la ua kôr se ken ishima shi ua bende a or wase u ken atô la yô. Ikyav i tesen yô, yange i na profeti Esekiel ihurenruamabera ken mpase u sha mnenge ér a ya, man ihurenruamabera ne lu a loho u vesen u una pase hen ior mba ungwan kwagh ga yô. Yange lu u Esekiel una fa loho la tsema tsema shi una gema u ua hingir kwagh na kpaa. U eren nahan la una na tom u pasen loho la ua hemba doon, ua nyoho er iyough nahan.—Ôr Esekiel 2:8–3:4, 7-9.
11 Mlu wase kaha a u Esekiel la ga. Nyian ne, ior kpishi soo u ungwan kwagh u Bibilo i lu ôron ga. Aluer ka u se gba uwer u pasen mkaanem ma Aôndo ga yô, ka hange hange u se hen Ruamabera sha gbenda u se kav shi se na jighjigh a mi yô. Gba u se henen Bibilo hanma shighe cii, se henen i̱ tsere-tse-tsere ga. Doo u se lu a isharen i orpasalmi kpa lu a mi la. A wa icam ér: “Akaaôron a ken zwa wam man mhen wam u ken ishima, ve̱ lu kwagh u kuman We ishima, TERE, Vande wam man Orpaan wam.” (Ps. 19:14) Ka hange hange u se ker shighe se hen sha kwagh u se er la, sha er umimi mba ken Bibilo vea nyôr ken atô u asema a ase yô. Sha mimi yô, doo u se nôngo sha er gbenda u se henen kwagh sha tseeneke wase la ua hemba doon yô. *
12. Mbamkombo mba Mbakristu mba wasen se sha er icighan jijingi a hemen se sha ci u nyi?
12 Gbenda ugen u se zua a mtsera sha icighan jijingi u Yehova yô, ka u ‘taver ayol a ase asema shi lun a dooshima man aeren a dedoo. Man u bunden mbamkohol asev mba aduaav’ ga. (Heb. 10:24, 25) U zan mbamkombo mba Mbakristu hanma shighe shi keghen ato zulee shi eren sha kwagh u se hen la ka igbenda i dedoo i tesen ser jijingi u Aôndo ngu hemen se yô. Kera kpa ka jijingi u Aôndo a tesen se kwagh u i gbe u se er la sha ikyev i tiônnongo ye.—Ôr Mpase 3:6.
U Lun Vangertiôr Ve a Mbamtsera
13. Se fatyô u henen nyi sha tom u pasen kwagh u Mbakristu mba sha derianyom u hiihii er laa?
13 Icighan jijingi ka tahav mbu hemban sha won cii, shi una fatyô u nan uumace tahav mbu eren ishima i Yehova kpaa. Sha derianyom u hiihii la, i wase Mbakristu er zegetom u pasen kwagh. Yange ve yôô loho u dedoo “hen akaa a i gbe a sha won cii.” (Kol. 1:23) Er Mbakristu mban kpishi lu mba “fan takerada yum kpaa ga, [shi] ve lu ior mba lun sha kwarkyaa ga yô,” lu ma ihyemban utaha igen mgbegha ve u eren nahan je ka ashe tugh ga.—Aer. 4:13.
14. Kanyi ia wase se u “tseen ishima sha kwagh kpishi”?
14 Aluer se mba eren akaa sha gbenda u icighan jijingi una kôôm uuma asev yô, kwagh la una mgbegha se u pasen kwagh vangertiôr. Aluer se mba sônon jijingi u Aôndo shi se mba henen kwagh sha tseeneke wase shi gbidyen kwar sha mi shi se mba zan mbamkombo mba Mbakristu hanma shighe yô, kwagh ne una wase se u ‘lun mbatseen asema.’ (Rom. 12:11) Bibilo ôr kwagh u ‘Oryuda ugen u va ken Efese, iti na ér Apolo, i mar un ken Alekesanderia, u lu or u fan kwagh kpe kpe’ la, ér: “Er a tseen ishima sha kwagh kpishi yô, a gba ôron kwagh, tesen akaa sha kwagh u Yesu vighe vighe.” (Aer. 18:24, 25) Aluer se mba a ‘ishima i tseen kpishi’ yô, se fatyô u seer ôron kwagh vangertiôr shighe u se lu pasen kwagh sha uya-uya man shighe u ian i dugh la kpaa.—Rom. 12:11.
15. Se mba zough a mtsera sha u seer lamen vangertiôr nena?
15 Aluer se seer mban a vangertiôr ken kwaghpasen yô, kwagh la una bende a vese sha gbenda u dedoo kpen kpen. Aluer se nenge ser tom ne ka tom u hange hange shi se nenge a averen a á lu ker la yô, ishima ia hemba taver se u zan hemen a mi. Ka sea nenge er tom wase ne u lu umen atam nahan i saan se iyol kpishi. Shi mfe u se fe ser tom wase u pasen kwagh ne hemba ngun torough torough hegen cii ne kpa na yô, se hemba tseen ishima sha tom shon cii.
16. Aluer se kera mba a gbashima sha kwaghpasen ga yô, doo u se er nena?
16 Kpa aluer se kera mba a gbashima sha tom u pasen kwagh er ngise se lu a mi la ga di ye? Aluer ka nahan yô, doo u se gbidye kwar sha kwagh ne ayol a ase. Paulu nger wener: “Kar nen ayol a en sha u né fa aluer nea lu ken jighjigh u nan yô, time nen ken ayol a en.” (2 Kor. 13:5) Pine iyol you wer: ‘M tsee ishima kpishi her je he? M eren msen hen Yehova mer a nam jijingi na je kpa? M tesen ken mbamsen av mer m suur sha a na sha u a wasem me er ishima na kpa? M tesen ken asember a mbamsen av mer m ngu a iwuese sha tom u pasen kwagh u i ne se la kpa? Kwaghhenen wam u sha tseeneke la ngu zan nena? Ka m hen sha kwagh u m er shi m ongo la i kuma shighe nena? M ze mbamkombo mba tiônnongo nduuruu shi m we zwa sha akaaôron a ker la kpa?’ Aluer u time sha mbampin mban yô, vea wase ú u fan ajiir a u lu a mshi la shi sôron a kpaa.
Jijingi u Aôndo a Na u Vangertiôr
17, 18. (a) I er tom u pasen kwagh nyian za kighir nena? (b) Se pase ior loho u dedoo u Tartor u Aôndo “gbar gbar” nena?
17 Yesu u i nder un shin ku la yange kaa mbahenen nav ér: “Né va ngohol agee shighe u Icighan Jijingi Una va sha a ven yô, man né lu mbapasen kwagh Wam ken Yerusalem man ken Yudia cii kua Samaria kpaa, zan zan á ar ken ikighir i tar je.” (Aer. 1:8) Tom u yange i hii u sha ayange a tsuaa la mba eren u nyian sha gbenda u i gbe je i lu a vande eren u nahan ga yô. Mbashiada mba Yehova mba kuman er miliôn utaankaruhar nahan mba pasen loho u Tartor ken ityar i hemban 230, hanma inyom ka ve pase kwagh i kuma er ahwa biliôn môm man tiôn nahan. Ka kwagh u sagher iyol kpishi er se eren tom u i lu u mayange a kera kimbir eren u ga ne vea mbagenev yô!
18 Ka icighan jijingi u Aôndo a lu hemen tom u pasen kwagh tseren tar sha won cii nyian ye, di er lu sha derianyom u hiihii la nahan. Aluer se mba den ser jijingi a hemen se yô, se lu a ishima i lamen “gbar gbar” shighe u se dugh kwaghpasen yô. (Aer. 28:31) Sha nahan yô, se de nen jijingi a hemen se er se pasen loho u dedoo u Tartor u Aôndo yô!
[Ngeren mba shin kpe]
^ I gema ati a ve.
^ Aluer u soo u hemban zuan a mtsera ken Bibilo i ôron man kwaghhenen wou u sha tseeneke la yô, ôr takerada u Benefit From Theocratic Ministry School Education, ôr ityough ki ki lu a itinekwagh ér “Apply Yourself to Reading” man ki ki lu a itinekwagh ér “Study Is Rewarding” sha peeji 21-32 la.
Ú Hen Nyi?
• Gba u se lu a vangertiôr sha u pasen mkaanem ma Aôndo sha ci u nyi?
• Kanyi yange i wase mbahenen mba tsuaa mbara u lamen vangertiôrô?
• Se er nan ve se lu a vangertiôrô?
• U lun a vangertiôr la una wase se nena?
[Mbampin Mba Ngeren u Henen]
[Foto u sha peeji 7 la]
Mbamaren vea wase mbayev vev vea lu a vangertiôr nena?
[Ufoto u sha peeji 8 la]
Msen u tiônôô una wase ú u lun a vangertiôr shighe u ú lu pasen kwagh yô