Kav Jighjigh Ve U nan

Á Hendan a Mciem man Akperan a Tan

PETERU kôr naha u tsoo lu tuur shin mnger sha utaha, yemen ken ime shin er lu nengen tsembelee ga nahan kpaa. A nenge a aniwanger lu duen vegher u sha ityoughkitaregh la u tesen ér sev hii u aven. Er naha tso shighe gôgônan yô, igbila kpen un cica cii, hii ken ijime due sha akende. Ahumbe a a lu toron kpishi, purugh a ice na i sha ityou la lu kpianger a Zegemnger u Galilia sha utaha je. Agôndo a zegemnger ne lu moughon tan sha ishigh ki tso na u kôron ishu a mi la, tsendan un aber a mnger a ndôhôr keghelee iyol zan zan a heen iyol gbôdu gbôdu. Kpa a za hemen u nahan tso ne her sha u una per zegemnger ne yô.

Peteru man akar a na vande undun Yesu tswen hen ijiir igen, hen kpe u zegemnger ne. Sha iyange la, ve nenge er Yesu koso ikpelaior udubu imôngo sha ikpenbredi man ishu kpuaa tseegh yô. Doo ior kpishi nahan ve lu keren u kôron Yesu nan un tor, kpa un soo u nyôron iyol ken pati u eren ga. Shi a kange ishima u wasen mbadondon un, sha er ve kpa vea palegh imba isharen ne yô. Yesu osough hen ikpelaior la kera, tsô a torough a mbahenen nav ér ve nyôr shin tso ve per zegemnger yande la, kpa un yô, gema kôndo yem sha uwo tswen sha u za eren msen.—Marku 6:35-45; Yohane 6:14, 15.

Shighe u mbahenen nyôr shin tso la uwer lu sha ityou jighjigh. Ve naha tso ne zan zan uwer kpeese lu yemen kure kure u za miren vegher u shin ityôtar la. Nahan kpa, ve lu a za ica ga. Er ihyuran i ahumbe man agôndoamnger taver yum yô, u lamen ayol a ve kpa lu kwagh u ican. A shi nan kpa, Peteru lu shin tso la ving, lu henen akaa ken ishima.

Sha kpôô yô, akaa lu kpishi a una hen sha mi yô! A dondo Yesu u Nasareti ijime hemba anyom ahar jimin. A hen akaa kpishi hen Yesu, kpa akaa lu her kpishi a una hen yô. Er kegh iyol u hendan a mbaagbe mba akperan a tan man mciem wa un la yô, a ver se ikyav i dedoo i se dondo yô. De se nenge er hii ve i lu nahan yô.

“Se Zua a Mesiya Ve”!

Mayange Peteru una hungur iyange i hii zuan a Yesu u Nasareti la ga. Anmgbian na Anderia vande van un a loho u doon ér: “Se zua a Mesiya ve.” Mkaanem man gema uma u Peteru. Uma na kera lu er yange vande lun la ga.—Yohane 1:41.

Peteru lu ken gar u Kapernahum. I maa gar ne hen kpe u ber ugen, i yilan ber shon ér Zegemnger u Galilia. Un man Anderia ve eren kpenga u kôron ishu vea ônov mba Sebedeu, Yakobu man Yohane. Lu kwase u Peteru tseegh lu vea na ga, ngô na kem man anmgbian na Anderia kpa lu a na hen ya. Yange gba u una eren kpenga na u kôron ishu la sha gbashima man sha agee na cii, shi una ker igbenda igen i ia na kpenga shon ua za ikyura kpaa, sha er una kôr cio u nengen sha ugbayol mba tsombor na ne tsembelee yô. Sha mimi yô, nomsombaiorov mban yange vea yaren ikyôr tugh kaka, vea haan ukper vev shin mnger hen atô u utso uhar, vea kpelan nyityô ishu i ve ker cii vea haan sha tar. Shi yange vea eren tom kpoghuloo shighe u sev mbu av, nahan i gbe u vea sange ishu i ve ker la vea za tee shi vea cinge ukper vev shi vea kile ve wang kpaa la.

Bibilo kaa a vese ér Anderia lu orhenen u Yohane u eren Batisema. Mimi je, loho u Yohane ú Anderia ôr anmgbian na Peteru la, doo un je gande. Iyange igen yô Anderia nenge Yohane hôn uwegh sha Yesu u Nasareti maa kaa ér: “Nenge, Waniyôngo u Aôndo Ngura!” Ave ave je maa Anderia hingir ordondon u Yesu shi torough un iyol u za u ôron Peteru loho u dedoo ér: Mesiya va ve! (Yohane 1:35-40) Shighe u uumace hemba ato  ken Eden anyom 4,000 ken ijime la, Yehova Aôndo tôndo zwa ér una tindi icuwan or u nana va ve a ishimaverenkeghen i mimi yô. (Genese 3:15) Anderia nenge a Mesiya, Oryiman ne iyolna! Peteru kpa kar a kar sha u una za nenge a Yesu yô.

Cii man iyange ne yô, i yilan Peteru ér Shimon shin Shimion. Kpa Yesu kenger un maa kaa ér: “We u ngu Shimon, wan u Yona, á masen yilan we er Kefa (inja na yô ér Peteru).” (Yohane 1:42) Inja i iti i “Kefa” la yô ér, “iwen” shin “vande.” Ikyav tese ér, mkaanem ma Yesu man ma lu kwaghôron u profeti. Yange tsenga fan ér Peteru una hingir er vande nahan, inja na yô, una hingir orhenen na u tilen dông sha kwagh shi geman kposo ga. Peteru nenge iyolna ér un ngu vande la kpa? Taver u kaan tsô. Mbaôron ityakerada i ivangeli mbagenev nyian nenge a akaa kpuaa tseegh a tesen ér Peteru lu er vande nahan. Ior mbagenev kaa ér ka inja er Peteru lu or u kôrough ishima shin eren kwagh vaanaa shin tilen dông sha kwagh ga nahan.

Peteru lu a mbamshi nav. Yesu kpa lan ve ga. Kpa lu kwagh u doon Yesu keren u nengen a mi ken ior hanma shighe cii, er Ter na Yehova nahan ye. Yesu yange nenge a anza a dedoo kpishi ken Peteru, nahan nôngo sha u una wase un a sôr anza shon a hemba doon cii yô. Nyian kpa, Yehova man Wan na mba veren ishima sha aeren ase a dedoo la. Alaghga a taver se u nan jighjigh ser kwagh u injaa ngu ken a vese u vea nenge a mi yô. Nahan kpa, doo u se lumun a mnenge u ve nengen se la shi se na ayol a ase sha u ve tsaase se shi ve maa se sha gbenda u vough er Peteru nahan.—1 Yohane 3:19, 20.

“De Cie Ga”

A shi nan kpa, Peteru zende vea Yesu kpuaa shighe u Yesu hii tom na u zenden pasen kwaghaôndo la. Nahan alaghga yange nenge er Yesu er ivande na i hiihii, i gema mngerem hingir wain hen iniongo i ivesegh i ken Kana la. U hemban cii yô, yange ungwa loho u Yesu u doon, u nan ior ishimaverenkeghen sha kwagh u Tartor u Aôndo la. Shin er ungwa shi nenge a akaa a kpilighyol nahan kpa, a undu Yesu a hide a yem u za eren kpenga na u kôron ishu la. Kpa iwer ngi kar yô, Peteru shi zua a Yesu, kwa ne yô Yesu lôhô un ér a dondo sha a na a ishima na i môm, a de kera hir ijime ga.

Hen kwa u Yesu hide va hen Peteru ne, ikyôr sember vihin un hen tugh mbu karen mbura. Peteru man akar a na a kôron ishu la zer haan ukper vev shin zegemnger tugh kaka, kpa ve kôr kwagh ga. Mimi je, Peteru yange yar tom a mfe man tse-we na ken tom u kôron ishu la cii sha u haan ukper nav hen ajiir a yange hen ér ishu ngi kpishi yô, kpa zua a kwagh ga. Sha mimi yô, er mbakôronishu mbagenev kpa tômon nahan, alaghga ashighe agen Peteru yange a tôm ér una fetyô yô, ma un nyer shin angbiôr a mnger jighilii man un za ker ishu ape i kohol cii i za yer la, gayô una tôm a tôm ishu tseegh kpa, maa i kar i iv ken ukper nav poo. Kpa sha mimi yô, mbamhen mban nahan lu mba seer un a seer ishimavihin di tsô. Tom u kôron ishu ne lu Peteru kwagh u iniumbe ga, gadia lu u una kôr ishu keng ve una nenge sha ior nav ye. Ken masejime yô, a due sha tar aveve. Shin er a kôr kwagh ga nahan kpa, gba u una nzua ukper mbara keng. Tsô ngur nzuan ve yô, Yesu maa va due hen a na.

Ikpelaior kase Yesu ningir tser, lu ungwan kwaghôron na zulee. Er ikpelaior imbishi un hen atô ve yô, Yesu nyôr shin tso u Peteru, kaa a na ér a kpela tso la sha tar a yem a mi ken zegemnger kpuaa. Tem shin tso yô, a gba tesen ikpelaior, ve ungwa ikyenge na wang. Peteru kegh ato zulee, er mbagenev mba ve lu hen kpezegemnger la nahan. Mayange due un ishima u ungwan kwaghôron u Yesu sha kwagh u Tartor u Aôndo, u ú lu itinekwagh i vesen i pasen ior kwagh a mi la ga. Ian i Peteru lu a mi i wasen Kristu u samber a loho u ishimaverenkeghen sha tar cii la, lu ian i civirigh kpen  kpen! Kpa, una fatyô u eren nahan je he? Kanyi vea yaan a eren tom nee? Adooga tsô Peteru hide umbur tugh mbu yange tsa keren ishu kaka kpa kôr kwagh ga la.—Luka 5:1-3.

Yesu kur kwaghôron na yô, a kaa a Peteru ér: “Kporom hen ijiir i i ze yô, za kende ukper enev sha u kôron ishu.” Peteru ta akperan ken ishima sha kwagh ne kpishi. Tsô a kaa ér: “Tere, se tsa keren kaka sha ican, kpa se zua a ma kwagh ga; kpa sha imo You yô, me haa ukper.” Sha kpôô yô, yange Peteru soo u hiden shi haan ukper mban shin mnger ga, hemban je yô hen shighe ne, gadia lu shighe u ishu yan kwagh la ga. Nahan cii kpa, Peteru er kwagh u Yesu kaa ér a er la. Alaghga tsô yange weregh akar a na a ve kôron ishu imôngo mba ve lu shin tso ugenegh la ér ve va kohol un vea haa ukper vev shin mnger.—Luka 5:4, 5.

Peteru ngur urugh ukper mbara duen a mi shin mnger yô, ve yuhwa gande un. Bee un er ka mnyamciem nahan, kpa a urugh ve sha agee na cii, maa ica i gbe ga yô, a nenge a ikpela ishu lu tsuen ken ukper mbara! Fese nahan a er nomsombaiorov mba lu shin tsô ugenegh la uwegh ér ve va wase un. Tsô mba ngur wasen un yô, ve mase kaven ér ishu la gande tso môm. Ve iv ishu shin utso mba uhar mbara poo, kpa ishu la ngee gande, tsô utso mbara gba nôngon u urun. Kwagh ne kpiligh Peteru iyol je gande u ôron. Yange vande nengen a tahav mbu Kristu, kpa hen shighe ne kwagh u Kristu er la bende a na kua tsombor na jighilii! Yesu lu a tahav je, ishu kpa a er i í nyôr ken ukper! Mciem gba Peteru iyol. A sen a gure inya a kaa ér: “Due hen mo kera, Tere, gadia mo m ngu or u isholibo je.” A er nan ve una kuma u yan ijende a Un u lu yaren tom a tahav mbu Aôndo sha imba igbenda la nahana?—Luka 5:6-9.

Yesu kende kaa na ér: “De cie ga, hii nyian je zan zan ken hemen kpaa ú mase kôron ior.” (Luka 5:10, 11) Shighe ne lu shighe u cian shin tan akperan ga. Akperan a Peteru lu a mi sha kwagh u ishu-kôron la lu shami ga; ityôkyaa lu i ma lu a mciem sha kwagh u mbamshi nav man mbamyina nav kpaa ga. Yesu lu a zegetom u pasen ior kwagh, man lu u tom ne ua bende a mlu u uumace u ken hemen la. Lu eren Aôndo u “[den] kwaghbo wuee” la tom. (Yesaia 55:7) Yehova una nengen sha ugbayol vev, mba sha iyol man mba ken jijingi la cii.—Mateu 6:33.

Fese je Peteru dondo sha Yesu, er Yakobu man Yohane nahan. “Mba dugh a utso sha tar yô, ve undu akaa cii, ve dondo sha a Na.” (Luka 5:11) Peteru na jighjigh ken Yesu kua Un u tindi Yesu la. Lu kwagh u injaa u hemban cii je yange tsua u eren ye. Mbakristu mba ainge mba ve de mciem shi ve de akperan a tan, ve lu eren Aôndo tom la kpa, mba tesen ér ve mba a jighjigh u nan. U suur sha Yehova sha imba gbenda ne la ka gbilinkwagh mayange ga.—Pasalmi 22:4, 5.

 “Kanyi U Te Akperana?”

Peteru yange zua a Yesu, anyom nga kar er ahar nahan yô, a naha tso tugh a kar ken ahumbe a Zegemnger u Galilia u se ter kwagh sha mi sha mhii u ngeren ne la. Se fatyô u fan akaa a yange va un ken ishima shi lu henen sha mi hen shighe la ga. Akaa lu kpishi a una hen sha mi yô! Yesu bee ngôkem na angev. A tese ior sha uwo. Ityesen i Yesu man ityom na i ageegh la tese kwa kimbir kimbir ér ngu Mesiya, un u Yehova a Tsough la. Iwer ngi kar yô, mbamshi mba Peteru lu a mi, inja er ieren na i ngôôr lun a mciem shi tan akperan sha kwagh ga la, pande ken a na kpishi je. Shi Yesu tsua un ér a lu môm ken mbaapostoli mba 12 mbara je kpaa! Nahan kpa, Peteru lu a de mciem kua akperan cica cii ga, man lu u ica a gba ga tsô, una kav er i gbe u una de mciem man akperan a tan vindi vindi yô.

Ka kom er ahwa atar a utu nahan yô, Peteru cia iyol gighir, de tso u nahan, sôr tema sha jighjigh. A nenge a kwagh lu zenden sha agôndoamnger! Kwagh shon lu iwanger i uwer lu muenem sha aber a agôndoamnger lu tsendan sha la ye shinii? Ei, kwagh la tile sha jighjigh yum, shi lu daase kpaa ga yum. Kwagh la lu or! Lu or jim jim je, man nan lu zenden sha kwavmnger! Er or la lu kporom ikyua a ve yô, lu inja er ngu van una va kar a ve kôôsôô nahan. Mbahenen gbidye akarkase iyol, ve lu henen ér ve nenge a ma ormbakuv. Or la maa kende kaa ér: “Taver nen ishima, ka Mo, de kera cie nen ga.” Or la lu Yesu!—Mateu 14:25-28.

Peteru gema kaa a Yesu ér: “Tere, a lu We yô, kaam, m̱ va her a We sha kwavmnger.” Kwagh u kende gaegh ôr ne tese ishimataver. Er saan Peteru iyol a ivande ne yum yô, Peteru soo u seer tesen jighjigh na u nan. Yange soo u eren kwagh u Yesu kpa lu eren la. Yesu kende kaa a na ér a zende a va her a na. Peteru unde sha kur tsoo maa hungwa shin zegemnger u lu kpianger la. Hen er yange a lu Peteru ken ishima shighe u tile sha kwavmnger ve ma lu gbondomoo, ma mire a na ga la sha wono! Yange a kpiligh un iyol a kondo, er lu zenden zan hen ape Yesu lu la. Nahan kpa, ica gba ga tsô maa mhen ugen kende ken a na.—Mateu 14:29.

Yange gba u Peteru ma lu kenger sha Yesu jighilii. Lu tahav mbu Yehova, Yesu yar tom a mi ve Peteru fatyô u tilen sha kwavmnger ye. Shi Yesu lu eren kwagh ne sha ci u jighjigh u Peteru na un la. Kpa ishima va dan Peteru. I kaa a vese ér: “Kpa nengen ahumbe nga taver yô, a cia.” Peteru yange gema ashe nenge agôndoamnger lu tan sha tso sha agee shi ahumbe lu tsendan aberamnger taveraa, nahan a gbidye ikyarkyase iyol. Alaghga tsô yange hen ér una mire shin zegemnger la, una ma mngerem una kpe shimi. Er mciem gba ngeen ken a na yô, jighjigh na u nan kpa gba panden. Or u ngise i na un iti ér Vande sha ci u ishimataver na sha kwagh la, hii u miren er iwen nahan sha ci u jighjigh na u nan u lun a akperan la. Peteru lu or u ôônwe tsembelee, kpa a har sha tse-we na hen shighe la ga. Tsô a genger imo a kaa ér: “Tere, yimam!” Yesu maa naregh uwegh kôr un, due a na sha. Nahan er ve lu sha kwavmnger her la je, Yesu wa Peteru kwagh u injaa ér: “We u u lu a anjighjigh u nan kpeghee ne, ka nyi u te akperana?”—Mateu 14:30, 31.

Mpin u Yesu pine ér “ka nyi u te akperana?” la ka u sha inja vough. Akperan ka bokwagh u numben a mi ga. Aluer se ta akperan yô, aa vihi jighjigh u nan wase shi aa na se hii u miren ken jijingi tegh tegh. Gba u se nôngo kwagh kpoghuloo! Se nôngo nena? Se er kwagh ne sha u veren ishima sha kwagh u a lu u injaa la. Aluer se mba henen sha kwagh u tan se mciem iyol man kwagh u nan se iyolkpen man u danen ishima yase hen Yehova man Wan na kera yô, akperan ase aa lu hemban taver seer a seer. Aluer mba suur sha Yehova man Wan na shi se ver ishima sha kwagh u ve vande eren shi ve lu eren zan a mi ave man u vea va er sha ci u mba ve soo kwagh ve la yô, se fatyô u dughun akperan a tan a vihin jighjigh u nan wase la ken a vese kera.

Peteru dondon Yesu mba nyer shin tso yô, ijeverahumbe maa mem. Zegemnger u Galilia cii hingir ving. Tsô Peteru man mbahenen mbagenev kaa ér: “Mimi je U ngu Wan u Aôndo.” (Mateu 14:33) Sha kpôô yô, yange saan Peteru iyol shighe u sev av ve hen zegemnger la je zua ga. Nahan a kange ishima ér mayange una kera ta akperan sha mcie sha kwagh u Yehova man Yesu ga. Sha mimi yô, yange gba u una nôngo kwagh kpoghuloo cii ve una mase hingir Orkristu u lun er vande nahan, u Yesu tsenga fan ér una lu la ye. Kpa yange kange ishima ér una za hemen u nôngon kwagh shi taver seer a seer. U ngu a imba gbashima ne kpa? Aluer u ngu a mi yô, u kav er i doo u dondon jighjigh u nan u Peteru la yô.

[Foto u sha peeji 30, 31 la]

Yesu yange nenge a anza a doon kpishi ken orkôronishu u hiden a iyol ijime ne

[Foto u sha peeji 31 la]

“Mo m ngu or u isholibo je”