Ka Mba Ve Kaan Ér Mba “Mbakristu” la Cii Ve Eren Kwagh u Kristu Yange Tese Yee?

MBAKRISTU kuma iyenge nena? Takerada u i yer ér Atlas of Global Christianity la kaa ér, ken inyom i 2010 la, iyenge i Mbakristu mba sha tar cii nôngo u kuman biliôn 2 man miliôn deri 3. Kpa takerada la shi tese ér Mbakristu mban mba ken mbaadua kposo kposo hemba 41,000, man hanma adua yô, ngu a atesen kua atindi a na. Er ukwaghaôndo mba “Mbakristu” ve te jar nahan yô, se kera lan er i hii ve ior mbagenev ve hingir u lun ken mtsum shin i dugh ve ishima a kwaghaôndo la ga. Alaghga vea pine ér: “Ka mba ve kaan ér mba mbakristu la cii ve lu Mbakristu mimi yee?

De se nenge sha ikyaa ne sha gbenda ugen. Or u nan mough ken tar u nan nan lu zan ken tar ugen yô, ka i gba u nana pase tar u nan dugh ker la hen dasenda mba kuran ikighir i tar u nan lu zan ker la. Shi ka i gba u nana tese ér mimi je nan ngu or u nan senge ér nan ngu la sha u tesen kwagh u a fa nan a mi la, er takerada u nan or ian i zan zende ken tar ugen nahan. Orkristu u mimi kpa gba u nana er kwagh a hemba di u kaan er nan na Kristu jighjigh la. Gba u nana lu a kwagh ugen u a fa nan sha mi yô. Kwagh shon ka nyi?

Yange i hii yaren tom a ishember i “Mbakristu” la shighe u Yesu kpe anyom kar er 10 nahan la. Or u timen sha akaa a mbayiase a ken Bibilo, u i yer un ér Luka la kaa ér: “Ka hen Antioki man i hii yilan mbahenen er Mbakristu ye.” (Aerenakaa 11:26) Umbur wer mba yange i yila ve ér Mbakristu la lu mbahenen mba Kristu. Takerada u i yer ér The New International Dictionary of New Testament Theology la pase nahan ér: “Inja i u dondon Kristu la yô, ka u or nan uma u nan cii sha ci na, a u pinen kwagh shio.” Nahan Orkristu u mimi yô, ka u nan dondon atesen man akaawan a Yesu, u yange ver Kwaghaôndo u Mbakristu la, a uma u nan cii man a u pinen kwagh shio.

A fatyô u zuan a ambaaior la ken atô u ior kpishi mba ve sengen ér mba Mbakristu nyian la kpa? Ka nyi Yesu iyolna yange kaa ér a fa mbadondon un sha mimi a mini? Se mba lôhôn we ser va time sha gbenda u Bibilo i ne mbamlumun sha mbampin mban la. Ken ngeren mba ve dondo ne, se lu timen sha akaa ataan a Yesu yange ôr ér mbadondon un vea eren, shi aa wase se u fan ve la. Se time se fa er Mbakristu mba sha derianyom u hiihii la yange ve er akaa la ken uma ve yô. Shi se nôngo se fa mba ve eren akaa shon ken atô u ior kpishi mba ve sengen ér mba Mbakristu nyian la.