Баш перишде Микайыл ким?

МУКАДДЕС ЯЗГЫЛАРДА баш перишде Микайылың ады санлыҗа гезек душ гелсе-де, хер гезек улы вакаларда агзаляр. Даниел пыгамбериң китабында онуң залым перишделер билен сөвешйәни, Яхуданың хатында Шейтан билен җеделлешйәни, Ылхам китабында болса Иблисдир җынлар билен сөвешйәни айдыляр. Микайыл Ехованың хөкүмдарлыгының тарапыны тутуп, онуң душманлары билен сөвешип өз адына мынасып херекет эдйәр. Онуң ады «Худай ялы ким бар?» диймекдир. Эйсем, Микайыл кимкә?

Көп адамларың бирнәче ады бар. Меселем, Якуп ата Ысрайыл дийип, Петрус ресул болса Симун дийип таналярды (Барлык 49:1, 2; Матта 10:2). Шонуң ялы Микайыл хем Иса Месихиң ере гелмезинден өң ве диреленден соң тутулян ады. Гел, бу хакда Мукаддес Язгылардан билели.

 Баш перишде. Мукаддес Язгыларда Микайыла «баш перишде» дийилйәр (Яхуда 9). Язгыларда «баш перишде» диен сөзи бирлик санда айдыляр, ол хич хачан көплүк санда уланылмаяр. 1 Селаниклилер 4:16-да дирелен Реб Иса Месих барада: «Реббиң Өзи эмирли гыгырыш билен, баш перишдәниң сеси билен... гөкден инер» дийилйәр. Гөршүмиз ялы, баш перишдәниң сеси билен Иса пыгамбер гыгыряр. Диймек, баш перишде Микайыл — Иса пыгамбер.

Гошун серкердеси. Мукаддес Язгыларда шейле дийилйәр: «Микайыл ве онуң перишделери аждарха билен урушдылар. Аждарха-да өз перишделери билен гайтавул берди» (Ылхам 12:7). Диймек, Микайыл вепалы перишделериң Серкердеси. Ылхам китабында Иса Месих хем вепалы перишделериң Баштутаны хөкмүнде суратландырыляр (Ылхам 19:14—16). «Реб Иса» ве онуң «гүйчли перишделери» барада Павлус ресулам языпды (2 Селаниклилер 1:7; Матта 16:27; 24:31; 1 Петрус 3:22). Мукаддес Язгылардан Микайылың хем-де Иса Месихиң перишделериниң бардыгыны билйәрис (Матта 13:41). Худайың Сөзүнде дүрли серкердели вепалы перишделериң ики гошуны барада айдылмаяр. Диймек, Микайыл — гөкдәки шөхратлы Иса Месих *.

[Чыкгыт]