Бизиң гурамамызда ерине етирилйән рухы ишлер үчин төлег төленилмейәр. I асырдакы месихчилер йыгнагында болшы ялы, шу гүнлер хем «Худайың йыгнагыны бакмак үчин» теҗрибели доганлар гөзегчи хөкмүнде белленилйәр (Ресулларың ишлери 20:28). Бу рухы тайдан етишен яшулы доганлар йыгнага «меҗбурлык билен дәл-де, мейлетинлик билен» ве «биабрайчылыклы газанч үчин дәл, ислег билен» гөзегчилик эдйәрлер (1 Петрус 5:1—3). Яшулы доганлар йыгнакда нәхили ишлери ерине етирйәрлер?

Яшулулар йыгнагың аладасыны эдйәрлер. Яшулулар йыгнак агзаларына Мукаддес Язгыларың эсасында гөркезме берйәрлер ве олары рухы тайдан гораярлар. Олар бу җогапкәрли иши Ехованың табшырандыгына дүшүнип, Онуң халкына агалык этмейәрлер. Гайтам, оларың абаданчылыгына ве шатлыгына хемаят эдйәрлер (2 Коринтослылар 1:24). Чопаның өз сүрүсиндәки хер бир гойнуң аладасыны эдиши ялы, яшулулар хем йыгнак агзаларының хер бирини говы танамак үчин җан эдйәрлер (Сүлейманың тымсаллары 27:23).

Яшулулар бизе Худайың ислегини ерине етирмеги өвредйәрлер. Олар бизиң иманымызы беркитмек үчин хер хепде йыгнак душушыкларының гечирилмегиниң аладасыны эдйәрлер (Ресулларың ишлери 15:32). Шейле-де яшулы доганлар вагыз ишине ёлбашчылык эдйәрлер. Олар бизиң билен гуллугың әхли гөрнүшлерине гатнашып, өкделик билен вагыз этмеги өвредйәрлер.

Яшулулар бизи рухландырярлар. Яшулулар хер бир йыгнак агзаларының рухы тайдан аладасыны эдйәрлер. Олар бизи голдамак ве Мукаддес Язгыларың эсасында теселли бермек үчин өйүмизе гелйәрлер я-да йыгнак душушыкларының гечирилйән ерлеринде бизиң билен гүррүңдеш болярлар (Якуп 5:14, 15).

Яшулулар йыгнагың ишлеринден башга-да, машгала агзаларының аладасыны этмек үчин зәхмет чекйәрлер ве машгаладакы борчларыны ерине етирмек үчин вагт сарп эдйәрлер. Бу зәхметсөер доганлар бизиң хорматымыза мынасыпдырлар (1 Селаниклилер 5:12, 13).

• Яшулулар йыгнакда нәхили борчлары ерине етирйәрлер?

• Яшулулар нәдип бизиң хер биримизиң аладамызы эдйәрлер?