I te kavea ai ko ni Molimau a Ieova, ki matou e taumafai malohi ke mulimuli atu ki te faka Kelihiano, te na akoako ma fakatino e Iesu ma ona hoko. Ko ni fakamatalaga pukupuku ienei e fakatatau ki o matou talitonuga fakavae.

1. Atua. Ki matou e tapuaki ki te Atua moni e fokotahi, Te Hilihili Kehe, Te Na Faia Mea Uma, ma ko tona igoa ko Ieova. (Salamo 83:18; Faaaliga 4:​11) Ko te Atua o Aperaamo, Mose, ma Iesu.​—Esoto 3:6; 32:11; Ioane 20:17.

2. Tuhi Paia. Ki matou e talitonu ko te Tuhi Paia ko te Afioga a te Atua e fakaoko atu ai tana fekau ki tagata. (Ioane 17:17; 2 Timoteo 3:​16) E fakavae o matou talitonuga ki na tuhi uma e 66, e aofia ai te “Feagaiga Tuai” ma te “Feagaiga Fou”. Na takua e te Polōfesa ko Jason D.BeDuhn, ko Molimau a Ieova e fakavae “o latou talitonuga uma ki te Tuhi Paia ma e hukehuke muamua lelei kiei ka ko heki faia ni fakaikuga.” *

   E fakataua e ki matou te Tuhi Paia katoa, kae e ki matou iloa foki ko na tahi vaega o te Tuhi Paia e tautala i he gagana fakatuha ma e he tatau ke fakauiga hako, kupu ki te kupu.​—Faaaliga 1:1.

3. Iesu. Ki matou e mulimuli ki na akoakoga ma na fakatakitakiga lelei a Iesu. E ki matou fakamamalua ia Iesu ko te matou Fakaola ma ko ia foki ko te Ataliki o te Atua. (Mataio 20:28; Galuega 5:​31) Tona uiga la ko ki matou ni Kelihiano. (Galuega 11:26) E ui i tena, kua ki matou akoakoa mai te Tuhi Paia ko Iesu e hē ko te Atua Hilihili ma e heai he fakavae fakate-Tuhi Paia mo te talitonuga fakatatau ki te Tolutasi. ​—Ioane 14:28.

4. Te Malo o te Atua. Ko he mālō moni lava tenei i te lagi, e hē he fakalagona i na loto o na Kelihiano. Ka hui tulaga e ia na mālō fakatetagata ma fakataunuku te fuafuaaga a te Atua mo te lalolagi. (Tanielu 2:​44; Mataio 6:​9, 10) Kua lata oi ia fakataunukua na gaoioiga ienei, aua e tuha ai ma na valoaga a te Tuhi Paia ki tatou kua ola “i aso e gata ai.”​—2 Timoteo 3:​1-5; Mataio 24:​3-​14.

   Ko Iesu ko te Tupu o te Malo o te Atua i te lagi ma na kamata tana pulega i te 1914.​—Faaaliga 11:15.

5. Fakaolataga. Ko te fakahao mai i te agahala ma te oti e mafai ona ko te taulaga togiola a Iesu. (Mataio 20:28; Galuega 4:​12) Ke aogā tena taulaga togiola mo ki tatou, e manakomia ke fakatuatua ki a Iesu, hui na auala e ola ai ma papatiho. (Mataio 28:19, 20; Ioane 3:​16; Galuega 3:​19, 20) Ko na gaoioiga a te tagata e fakailoa ai e ola tona fakatuatua. (Iakopo 2:​24, 26) Kae e ui i tena, ko te fakaolataga e hē he mea na galue koe ki ei​—kae na maua mai ona ko te “agalelei faifua o le Atua”. ​—Kalatia 2:​16, 21.

6. Lagi. Ko Ieova te Atua, Iesu Keriso, ma te kau agelu fakamaoni e nonofo i te lagi. * (Salamo 103:19-​21; Galuega 7:​55) E na ko he fuainumela laititi o tagata​—144,000​—ka toe fakatutū ki te ola i te lagi ke pule fakatahi ma Iesu i te Mālō .​—Tanielu 7:​27; 2 Timoteo 2:​12; Faaaliga 5:​9, 10; 14:​1, 3.

7. Lalolagi. Na fai e te Atua te lalolagi ke kavea ma nofoaga tumau o te tagata. (Salamo 104:5; 115:16; Failauga 1:4) Ka fakamanuia e te Atua ki latou e uhiuhitaki, e ala i te ola malolo lelei katoatoa ma te ola e fakavavau i te lalolagi Palataiho.​—Salamo 37:11, 34.

8. Mea leaga ma mafatiaga. Na kamata na mea ienei i te taimi na fouvale ai he tahi o agelu a te Atua. (Ioane 8:​44) Ko te agelu tenei na fakaigoa ki a “Satani” pe ko te “Tiapolo” i te taimi na fouvale ai. Na ia fakatohinā te ulugali muamua ke kaukau fakatahi ma ia, ma ko te mafuaaga ia kua puapuaga ai ki tatou uma e tupuga mai ia te ki laua. (Kenese 3:​1-6; Roma 5:​12) Ke fofō te luki a Satani, kua fakataga ai e te Atua na mea leaga ma na mafatiaga ke tutupu, kae e hē ia fakatagā ke fakaauau e fakavavau

9. Oti. Ko na tino kua feoti e hē ki latou iloa he mea. (Salamo 146:4; Failauga 9:​5, 10) E hē fakapuapuagatia ki latou i he afi.

   Ka toe fakatutū mai e te Atua te faitau piliona o ki latou kua feoti e ala i te toetū. (Galuega 24:15) Kae e ui tena, ko ki latou e hē fofou ke akoako ia ala o te Atua i te taimi e toe fakatutū mai ai e fakaumatia e fakavavau ma e hē toe iei he latou fakamoemoe e toe fakatutū mai ai.​—Faaaliga 20:14, 15.

10. Kaiga. Ki matou e mulimuli ki te fakatulagaga a te Atua mo na faipoipoga mai te kamataga, i te tukufakatahi o te tamaloa e fokotahi ma te fafine e fokotahi, fakatahi ai ma te fakavae e mafai ke tatala ai he faipoipoga, kafai e fai e he tahi o ki laua he amioga hē mamā. (Mataio 19:​4-9) E ki matou mautinoa ko te atamai e maua i te Tuhi Paia e mafai ke fehoahoani ki kaiga ke taulau manuia ai.​—Efeso 5:22–​6:1.

11. Te matou tapuakiga. Ki matou e hē tapuaki ki he koluhe pe ni e tahi fakatuha. (Teuteronome 4:​15-​19; 1 Ioane 5:​21) Ko na vala tauā ienei o te matou tapuakiga:

    • Tatalo ki te Atua.​—Filipi 4:6.

    • Faitau ma hukehuke te Tuhi Paia.​—Salamo 1:​1-3.

    • Mafaufau loloto ki na mea kua akoako mai i te Tuhi Paia.​—Salamo 77:12.

    • Kau fakatahi ki na hauniga ke tatalo, hukehuke te Tuhi Paia, pepehe, fakailoa atu to matou fakatuatua, ma fakamalohi o matou uho Molimau vena ma ietahi tino.​—Kolose 3:​16; Eperu 10:23-​25.

    • Talaki te “tala lelei o le mālō.”​—Mataio 24:14.

    • Fehoahoani ki a te ki latou e manakomia te fehoahoani.​—Iakopo 2:​14-​17.

    • Fau ma fakalelei na Maota mo Hauniga, ma na tahi maota e fakaaogā mo te agai ki mua o te matou galuega aoga fakate-Tuhi Paia i te lalolagi katoa.​—Salamo 127:1.

    • Fehoahoani i na galuega laveaki i taimi o na fakalavelave.​—Galuega 11:27-​30.

12. Te matou fakalapotopotoga. Ki matou e maopoopo i ni fakapotopotoga e kikila e ni toeaina. E ui i tena, ko na toeaina e hē he vahega o ni faifeau ma e hē maua ni o latou totogi. (Mataio 10:8; 23:8) E heai ni a matou sefulua’i ma e hē aoā foki ni tupe ia matou hauniga. (2 Korinito 9:7) Ko a matou galuega uma e lagolago i na tupe e tauofo atu.

    Ko te Vaega Pule, ko he tamā vaega o ni Kelihiano matutua fakate-agaga e galulue i te ofisa ulu ma e ki latou haunia mai na takiala mo Molimau a Ieova i te lalolagi katoa.​—Mataio 24:45.

13. Te matou kautahi. Ki matou e kautahi i te lalolagi katoa io matou talitonuga. (1 Korinito 1:​10) Ki matou e galue mamafa ke fakalelei na fevaevaeakiga ona ko ni tulaga, aganuku, itukaiga vena foki te fakailoga tagata. (Galuega 10:34, 35; Iakopo 2:4) E hē taofia e te matou kautahi na filifiliga i ni mea e patino lava ki te tagata lava ia. E fai e Molimau tautokatahi ana lava filifiliga e tuha ai ma tona lotofuatiaifo kua koleni e te Tuhi Paia​—Roma 14:​1-4; Eperu 5:​14.

14. Amioga. Ki matou e taumafai malohi ke fakaali ia matou gaoioiga uma te alofa hē manatu fakapito. (Ioane 13:34, 35) E kalofia e ki matou na gaoioiga e hē fiafia ki ei te Atua, e aofia ai te fakaaoga hehē o te toto e ala i na tuigatoto. (Galuega 15:28, 29; Kalatia 5:​19-​21) E tauhia e ki matou te filemu ma e heai he matou vaega i na faigātaua. (Mataio 5:9; Isaia 2:4) Ki matou e fakaaloalo ki na faigāmalo i na koga uma e nonofo ai ki matou, ma uhitaki ki a latou tulafono pe kafai e hē fakamalohi mai kimatou ke hē uhiuhitaki ki na tulafono a te Atua.​—Mataio 22:21; Galuega 5:​29.

15. O matou vā ma iētahi tino. Na poloaki ia Iesu: “Ia e alofa atu i lou tuaoi e pei o oe lava iā te oe.” Na toe leamai foki ko Kelihiano e “lē o ni tagata o le lalolagi.” (Mataio 22:39; Ioane 17:16) Tona uiga, ki matou e taumafai ke “faia mea lelei i tagata uma”, i te taimi e tahi e heai he matou vaega i na matakupu fakapolotiki, ma e hē aafia foki i na tahi tapuakiga. (Kalatia 6:​10; 2 Korinito 6:​14) E ui i tena, e ki matou fakaaloalogia na filifiliga a iētahi tino fakatatau ki na matakupu ienei.​—Roma 14:12.

Kafai e fia ke iloa atili fakatatau ki talitonuga o Molimau a Ieova, e mafai ke faitau ni ietahi fakamatalaga e fakatautau ki a te ki matou i te matou tuatuhi initaneti, fakahekotaki he tahi oa matou ofisa, fakatahi atu ki a matou hauniga i he Maota o Hauniga tafapili atu ki a te koe pe talanoa atu foki ki he Molimau i te koga e iei koe.