Noong Hulyo 2019, isang Bible museum ang binuksan sa tanggapang pansangay ng mga Saksi ni Jehova sa Scandinavia, na nasa Holbæk, Denmark, mga 65 kilometro mula Copenhagen. Ang tema ng museum ay “The Bible and the Divine Name in Scandinavia.”

Makikita sa museum ang iba’t ibang luma at mahahalagang salin ng Bibliya sa wikang Danish, Faeroese, Greenlandic, Icelandic, Norwegian, Saami, at Swedish. Mahigit 50 Bibliya ang nakadispley.

Isa sa pinakamahalagang kopya na nakadispley ay ang 1541 Gustav Vasa Bible. Ang Bibliyang ito ang unang kumpletong Bibliya na naisalin sa isang wika sa Scandinavia. Ito rin ang naging batayan ng grammar at bokabularyo ng wikang Swedish at ang basehan ng iba pang salin ng Bibliya sa Swedish sa loob ng 300 taon.

Ang isa pang orihinal na kopya ng Bibliya na nakadispley ay ang 1550 Christian III Bible. Ito ang unang kumpletong salin ng Bibliya sa Danish. Ginamit din itong batayan ng wikang Danish at malaki ang naging epekto nito sa malaking bahagi ng Northern Europe.

Sinabi ni Erik Jørgensen, mula sa sangay ng Scandinavia: “Makikita sa Bible museum na ito na noon pa man, daan-daang taon na ang nakalipas, malaki na ang paggalang ng mga taga-Scandinavia sa Salita ng Diyos at sa maluwalhati niyang pangalan, Jehova.”