Ibigin ang mga Tao, Hindi ang Salapi at mga Pag-aari
Sekreto 1
Ibigin ang mga Tao, Hindi ang Salapi at mga Pag-aari
ANG ITINUTURO NG BIBLIYA: “Ang pag-ibig sa salapi ay ugat ng lahat ng uri ng nakapipinsalang mga bagay.”—1 Timoteo 6:10.
ANG HAMON: Naiimpluwensiyahan tayo ng mga advertisement na huwag makontento sa tinataglay natin. Nauudyukan tayo ng mga ito na magpakasubsob sa trabaho para mabili ang pinakabago at pinakamagandang mga gamit. Mapang-akit ang pera, at maaaring madali tayong umibig dito. Pero nagbababala ang Bibliya na ang umiibig sa kayamanan ay hinding-hindi magiging kontento. “Ang maibigin sa pilak ay hindi masisiyahan sa pilak, ni ang sinumang maibigin sa yaman ay masisiyahan sa kita,” ang sabi ni Haring Solomon.—Eclesiastes 5:10.
ANG PUWEDE MONG GAWIN: Tularan si Jesus, at ibigin ang mga tao nang higit sa mga bagay. Handang ibigay ni Jesus ang lahat ng tinataglay niya—maging ang kaniyang buhay—dahil sa pag-ibig sa mga tao. (Juan 15:13) Sinabi niya: “May higit na kaligayahan sa pagbibigay kaysa sa pagtanggap.” (Gawa 20:35) Kung uugaliin nating magbigay sa iba ng ating panahon at pag-aari, gayundin ang gagawin nila sa atin. “Ugaliin ang pagbibigay,” ang sabi ni Jesus, “at ang mga tao ay magbibigay sa inyo.” (Lucas 6:38) Ang mga taong nagsisikap magkamal ng salapi at mga pag-aari ay nagdudulot lamang ng kirot at pasakit sa kanilang sarili. (1 Timoteo 6:9, 10) Sa kabilang dako, magiging tunay kang kontento kung iibigin mo ang iba at iibigin ka rin nila.
Puwede mo bang pasimplehin ang iyong buhay? Maaari mo bang bawasan ang mga pag-aari mo o ang mga bagay na gusto mong bilhin? Sa paggawa nito, magkakaroon ka ng higit na panahon at lakas para sa mas mahahalagang bagay—ang pagtulong sa mga tao at paglilingkod sa Diyos na nagbigay ng lahat ng tinataglay mo.—Mateo 6:24; Gawa 17:28.
[Larawan sa pahina 4]
“Ugaliin ang pagbibigay, at ang mga tao ay magbibigay sa inyo”