Fa o lebile go tswa kwa borwabophirima, o lebile kwa bokone jwa Lekadiba la Sekgwa sa Sterling (Blue Lake). Kago e e gonyetseng eo e tlile go nna phaposi e e ka fa tlase ga karolo D ya lefelo le batho ba nnang mo go lone. Gaufi le lekadiba, go dirwa konkereite ya karolo C ya lefelo le batho ba nnang mo go lone.

Badiri ba kopanya ntlwana ya go tlhapela. Ntlwana eo e akaretsa diforeimi, lobota, diphaepe tsa metsi le tsa motlakase, sefetlhamowa le bata ya go tlhapela. Ntlwana eo e tla felelediwa fa e setse e tsentswe mo kagong.

Badiri ba ba tsenyang diphaepe ba berekela mo phaposing e e kwa tlase. Ka nako ya porojeke eno, badiri ba ka nna 500 ba tla e dirisetsa go jela mo go yone e bile dikarolo tse dingwe tsa yone di tla dirisediwa go nna batho ba le 300. Fa porojeke e ya bokhutlong, kamore eno ya go jela e tla ntshiwa mme e bo e baakanngwa gore e nne lefelo le go baakanyediwang dikoloi mo go lone.

Badiri ba tshela mmu o o tla dirisediwang go lema mo borulelong. Dimela tse di lemilweng mo godimo ga borulelo, di thusa gore motlakase o se ka wa dirisiwa thata, di thibela metsi a pula gore a se ka a elela ka bontsi e bile di tlhotlha dikhemikale tse di kotsi tse di mo metsing a pula.

Kago eno e tla bo e dirilwe ka dikago di le tharo tse di nang le boatlhamo jwa disekweremetara di le 42 000. Fano re bona badiri ba konteraka e e hirilweng ba tsenya ditshipi tse di tla tlhomamisang gore lobota loo lo tiile thata.

Badiri ba dirisa molelo wa gase ya propane go tsenya borulelo jwa sekontere. Ba dirisa didirisiwa tse di ba thusang gore ba se ka ba wa.

Diphaepe mmogo le didirisiwa tsa lefapha la HVAC di a tsenngwa. Go na le basadi ba le bantsi ba ba berekang mo porojekeng eno ya kwa Warwick.

Kago eno e e dirisediwang go baya le go betla dilo e ne ya rekiwa ka February 2014 gore e dirisiwe ka nako ya porojeke. E boatlhamo jwa disekweremetara di le 20 000. Dilo tse ditshweu tse o di bonang moo ke matlwana a go tlhapela a a emetseng go isiwa kwa lefelong la kago.

Seno ke se o se bonang fa o eme gaufi le kago ka fa bokonebotlhaba. Go tlile go nna baithaopi ba kwa ntlokgolong ba ka nna 200. Bontsi jwa dikamore di bogolo jwa disekweremetara tse di fa gare ga 30 le 55 mme di na le ntlwana ya boapeelo e nnye, ntlwana ya go tlhapela le balekhone e nnye.

Ba baakanyetsa go aga. Go ela kwa godimo ka fa molemeng, sedirisiwa sa go sila se sila maje a a tla dirisiwang fa go agiwa. Fa porojeke eno e ela kwa bokhutlong, go tla bo go ntshitswe mmu o montsi tota mo setsheng sa Warwick. Letsatsi le letsatsi go tswa diteraka tsa matlakala di ka nna 23.

Go a lemiwa mo borulelong.

Fa o se lebile go tswa kwa godimo, o lebile o le mo godimo ga dikago tsa ofisi go ela kwa borwabophirima. Fa o lebile kwa tlase go ela ka fa molemeng o tla bona Lefelo le Baeng ba Phakang mo go lone mme ga jaana letsatsi le letsatsi le tlala ka dikoloi tse baithaopi ba tlileng ka tsone. Basupi bangwe ba kgweetsa diura di ka nna 12 go ya kwa kagong gore ba kgone go ithaopela go bereka malatsi a le mararo kgotsa a le mane.

Ba tloga ba fetsa go aga mo kamoreng eno ya bojelo. Go tla dirisiwa disekirini (ga di ise di tsenngwe) le dipikara tse di akgilweng mo siling go gokaganya badiri le ofisi ya lekala ya kwa United States ka nako ya temana ya letsatsi le ya dithulaganyo tse dingwe tsa semoya.

Ba tshela konkereite mo boalong jwa ntlha. Ka fa mojeng, modiri o dirisa motšhine go tlhomamisa gore ga go na mowa mo konkereiteng le gore e tiile thata.

Mesele e e tlileng go tsenya diphaepe tse di tsamaisang motlakase e siametse go ka tswalwa.

Tiro ya go tshela konkereite mo boalong jwa ntlha e gaufi le go wediwa. Go tla go fitlha ga jaana, ke yone konkereite e kgolo e e ileng ya tshelwa kwa porojekeng ya Warwick. Konkereite eno e ne e tlhakantswe kwa lefelong le le mo setsheng seo, ga dirisiwa dilori di le robedi le diphaepe tsa konkereite di le pedi mme ga tsaya diura di le tlhano le halofo go e tshela. Kago e e mo gare eo ke ya disetepisi tse batho ba tla di dirisang.

Go agiwa lobota la kwa borulelong le le sireletsang motho gore a se ka a wela kwa tlase. Ka fa moragonyana, ba ntse ba tshwaragane le go aga phaposi e e kwa tlase ya karolo A ya lefelo le batho ba nnang mo go lone.

Ntlwana ya go tlhapela e e ileng ya kopanngwa e folosediwa mo boalong jwa boraro. Kwa porojekeng ya Warwick go dirisiwa thata dilo tse di setseng di kopantswe go tswa kwa feketiring ka gonne ba sa batle gore setsha se tlale ka dilo tse di tla kgoreletsang porojeke.

Badiri ba konteraka ba tsenya lobota la konkereite e e tla thusang go boloka motlakase. Konkereite e pentilwe, ka jalo, ga e tlhoke go baakanngwa nako le nako. Porojeke e tla wediwa ka nako ka gonne konkereite eo ga e tseye nako e telele go e tsenya.

Fa o se lebile go tswa kwa khoneng e e ka fa borwabophirima. Fa o leba fa pele ga gago, o tla lemoga gore go ntse go baakanyediwa go aga karolo D ya lefelo le batho ba nnang mo go lone mme mo morago ga yone karolo C e tloga e wediwa.