“Ko e totongi ki he angahalá ko e mate, ka ko e meʻaʻofa ʻoku foaki ʻe he ʻOtuá ko e moʻui taʻengata ʻia Kalaisi Sīsū ko hotau ʻEikí.”​—Loma 6:23, Liliu Tohi Tapu Māmani Foʻoú.

 “Koe totogi oe agahala koe mate; ka koe moui taegata koe foaki ofa ia ae Otua ia Jisu Kalaisi ko ho tau Eiki.”​—Loma 6:23, Paaki Motuʻa.

 ʻI he ngaahi lea ko ení, ʻoku fakamatalaʻi ai ʻe he ʻapositolo ko Paulá ʻoku mate ʻa e faʻahinga ʻo e tangatá koeʻuhí ko ʻenau angahalaʻiá. Kae kehe, ʻoku ʻoange ʻe he ʻOtuá ki heʻene kau lotu faitōnungá ʻa e ʻamanaki fakaofo​—ko e meʻaʻofa ʻo e moʻui taʻengatá.

 “Ko e totongi ki he angahalá ko e mate.” Ko e kakaí kotoa ʻoku fanauʻi taʻehaohaoa kinautolu pea ʻoku nau maʻu ʻa e hehema ki he faiangahalá. a (Saame 51:5; Tangata Malanga 7:20) Koeʻuhí ʻoku fanauʻi kinautolu ʻi ha tuʻunga angahalaʻia, ko e faʻahinga ʻo e tangatá ʻoku nau tupu ʻo motuʻa pea mate.​—Loma 5:12.

 Ke fakatātaaʻi ʻa e poini ko ení, ʻoku fakahoa ʻe Paula ʻa e angahalá ki ha pule ngāue ʻokú ne totongi ʻa e vāhenga ʻa e kau ngāué. Hangē pē ko e ʻamanekina ʻe he tokotaha ngāué ha totongi ki heʻene ngāué, ko e faʻahinga foki ʻo e tangatá ʻe lava ke nau ʻamanekina te nau mate koeʻuhí ko honau tuʻunga taʻehaohaoá.

 Kae kehe, ʻoku toe fakamatalaʻi foki ʻe Paula ko e tokotaha “kuo maté kuo ʻatā ia mei heʻene angahalá.” (Loma 6:7) ʻI he mate ha taha, ʻoku fakatauʻatāinaʻi ia pe tukuange ia, mei ha angahala pē naʻá ne fakahoko. Ko e ʻuhinga ia ʻoku ʻikai totonu ai ke fakakaukau ko e kau maté ʻoku hokohoko atu ke nau faingataʻaʻia ʻi ha toe feituʻu koeʻuhí ko ʻenau ngaahi fehālaaki ʻi he kuohilí. Ko hono moʻoní, ʻoku fakahaaʻi mahino ʻe he Tohi Tapú ko e maté ʻoku ʻikai lava ke nau fakakaukau, ngāue pe ongoʻi ha meʻa.​—Tangata Malanga 9:5.

 “Ka ko e meʻaʻofa ʻoku foaki ʻe he ʻOtuá ko e moʻui taʻengata.” ʻI hono kehe mei he “totongi” ki he angahalá, ko e ʻOtuá ʻokú ne tokonaki mai ʻa e meʻaʻofa ʻo e moʻui taʻengatá. Ko e muʻaki lea ki he “meʻaʻofa” ʻe lava foki ke liliu ko e “meʻaʻofa maʻataʻatā” pe “meʻaʻofa anga-ʻofa.” ʻOku ʻuhinga ia ki ha meʻa ʻoku foaki ka ʻoku ʻikai tuha mo e tokotaha ko iá. ʻOku ʻikai ha tangata angahalaʻia ʻoku tuha ke ne maʻu ʻa e fakamoʻuí mo e moʻui taʻengatá. (Saame 49:7, 8) Kae kehe, ʻoku foaki taʻetotongi ʻe he ʻOtuá ia ʻa e meʻaʻofa taʻehanotatau ko e moʻui taʻengatá ki he faʻahinga ʻoku nau ngāueʻi ʻa e tui kia Sīsuú.​—Sione 3:16; Loma 5:15, 18.

 Naʻe hiki ʻe Paula ʻa e tohi ko ení ki he kau Kalisitiane ʻi Lomá ʻi he 56 T.S. nai. Ko e niʻihi ʻo e kau Kalisitiane ʻi he taimi ko iá naʻe hangē naʻa nau maʻu ha ngaahi fakakaukau hala fekauʻaki mo e meesi ʻa e ʻOtuá. ʻI hono tākiekina ʻe he ngaahi filōsofia faka-Kalisí, naʻa nau fakaʻuhinga nai ko e lahi ange ʻenau faiangahalá, ko e lahi ange ia ʻenau maʻu ʻaonga mei he fakamolemole ʻa e ʻOtuá. (Loma 6:1) Ko e niʻihi naʻa nau taukaveʻi nai heʻikai ke tauteaʻi kinautolu ki heʻenau ngaahi halá koeʻuhí naʻe ʻikai ke nau kei ʻi he malumalu ʻo e Lao ʻa Mōsesé. (Loma 6:15) ʻI heʻene tohí, naʻe fakamamafaʻi ʻe Paula ko e kau Kalisitiané ʻoku ʻikai lava ke nau maʻu ʻaonga mei he meesi ʻa e ʻOtuá kapau ʻoku nau fakaʻatā ʻa e angahalá ke ne tākiekina ʻenau moʻuí.​—Loma 6:12-14, 16.

 Ko e ngaahi lea ʻa Paulá ʻokú ne fakapapauʻi ki he kau lotu ʻa e ʻOtuá ʻi he ʻahó ni neongo ʻoku fanauʻi angahalaʻia kinautolu, ʻoku nau kei maʻu pē ha ʻamanaki. Kapau te nau talangofua ki he ngaahi tuʻunga fakaeʻulungaanga ʻa e ʻOtuá pea ʻikai tō ʻi heʻenau ngaahi holi fehālaakí, ʻoku talaʻofa ʻe he ʻOtuá te ne ʻoange kiate kinautolu ʻa e moʻui taʻengatá.​—Loma 6:22.

 Sio ʻi he vitiō nounou ko ení ke maʻu ha vakai fakalūkufua ki he tohi ʻa Lomá.