ʻI he mate ʻa Saulá, naʻe tuʻi ʻa Tēvita. Naʻá ne taʻu 30. Hili ʻene hoko ʻi ha ngaahi taʻu ko e tuʻí, naʻá ne sio hifo ai mei he funga fale ʻo hono palasí ki ha fefine talavou. Naʻe ʻeke ʻe Tēvita ʻo ne ʻilo ko hono hingoá ko Pati-sepa pea naʻá ne mali mo ha sōtia ko ʻŪlaia. Naʻe ʻomai ʻe Tēvita ʻa Pati-sepa ki hono palasí. Naʻá na mohe, peá ne hoko ai ʻo feitama. Naʻe feinga ʻa Tēvita ke fufū ʻa e meʻa naʻá ne faí. Naʻá ne tala ki he pule ʻi heʻene kau taú ke ʻai ke ʻotu muʻa ʻa ʻŪlaia ʻi he taú pea ke nau holomui meiate ia. Hili ʻa e mate ʻa ʻŪlaia ʻi he taú, naʻe mali leva ʻa Tēvita mo Pati-sepa.

Ka naʻe sio mai ʻa Sihova ki he ngaahi meʻa kovi kotoa naʻe hokó. Ko e hā naʻá ne faí? Naʻá ne fekauʻi atu ʻa e palōfita ko Nētané kia Tēvita. Naʻe pehē ange ʻe Nētane: ‘Naʻe ʻi ai ha tangata koloaʻia naʻe tokolahi ʻene fanga sipí, pea mo ha tangata masiva naʻe ʻi ai ʻene kiʻi lami pē ʻe taha ʻa ia naʻá ne ʻofa lahi ai. Naʻe ʻave ʻe he tangata koloaʻiá ʻa e kiʻi lami pē ʻe taha ʻa e tangata masivá.’ Naʻe ʻita lahi ai ʻa Tēvita peá ne pehē: ‘ʻOku totonu ke mate ʻa e tangata koloaʻia ko iá!’ Naʻe tala ange leva ʻe Nētane kia Tēvita: ‘Ko koe ʻa e tangata koloaʻia ko iá!’ Naʻe loto-mamahi lahi ai ʻa Tēvita, peá ne fakahā kia Nētane: ‘Kuó u faiangahala kia Sihova.’ Ko e angahalá ni naʻe ʻomi ai ʻa e faingataʻa kia Tēvita mo hono fāmilí. Naʻe tauteaʻi ʻe Sihova ʻa Tēvita ka naʻá ne tuku pē ke ne moʻui koeʻuhí he naʻá ne faitotonu mo anga-fakatōkilalo.

Naʻe loto ʻa Tēvita ke ne langa ha temipale maʻa Sihova, ka naʻe fili ʻe Sihova ʻa e foha ʻo Tēvita ko Solomoné ke ne langa ʻa e temipalé. Naʻe  kamata teuteu ʻe Tēvita ʻa e ngaahi meʻá ke maau kia Solomone peá ne pehē: ‘Kuo pau ke fakaʻofoʻofa ʻa e temipale ʻo Sihová. ʻOku kei siʻi ʻa Solomone, ka te u tokoniʻi ia ʻaki hono teuteu ke maau ʻa e ngaahi meʻá.’ Naʻe meʻaʻofaʻaki ʻe Tēvita ʻene paʻanga lahi ki he ngāue langá. Naʻá ne kumi mai ha kau ngāue pōtoʻi. Naʻá ne tānaki ʻa e koula mo e siliva, pea ʻomi ʻa e papa sita mei Tāia mo Saitoni. ʻI he ofi ke ne maté, naʻe ʻoange ʻe Tēvita kia Solomone ʻa e palani ki hono langa ʻo e temipalé. Naʻá ne pehē: ‘Naʻe ʻai ʻe Sihova ke u hiki ʻa e ngaahi meʻá ni maʻau. ʻE tokoniʻi koe ʻe Sihova. ʻOua ʻe ilifia. Ke ke mālohi pea fai ʻa e ngāué.’