“Ke Hoko Mai Hoʻo Pulé”—Lotu ʻOku Faʻa Leaʻaki ʻe he Laui Miliona
Kuó ke lotu ke hoko mai ʻa e Puleʻanga ʻo e ʻOtuá? Laka hake ʻi he laui senituli, ko e laui miliona kuo nau faʻa leaʻaki ʻa e kupuʻi lea “Ke hoko mai hoʻo pulé.” Ko e hā kuo nau toutou leaʻaki ai ení? Koeʻuhi naʻe tala ʻe Sīsū ki hono kau muimuí ke nau lotu ke hoko mai ʻa e Puleʻanga ʻo e ʻOtuá.
ʻI he kamatá, ko e kau muimui ʻo Sīsuú naʻe ʻikai ke nau mahinoʻi ʻa e meʻa kotoa naʻá ne leaʻaki ʻo fekauʻaki mo e Puleʻangá. ʻI he taimi ʻe taha naʻa nau ʻeke ange: “ʻEiki, te ke toe fakafoki mai ʻa e Puleʻangá ki ʻIsileli he taimí ni?” Mahalo pē naʻa nau ʻohovale ʻi he ʻikai ke ʻoange ʻe Sīsū kiate kinautolu ha tali papau. (Ngāue 1:6, 7) ʻOku ʻuhinga iá heʻikai lava ke tau ʻiloʻi pe ko e hā ʻa e Puleʻanga ʻo e ʻOtuá pea mo e taimi ʻe hoko mai aí? ʻIkai ʻaupito!
Ko e ʻīsiu ko eni ʻo e Taua Leʻo te ne tokoniʻi koe ke tali ʻa e ngaahi fehuʻi ko ení:
Ko e hā ʻoku tau fiemaʻu ai ʻa e Puleʻanga ʻo e ʻOtuá?
Ko hai ʻa e Tuʻi ʻo e Puleʻanga ʻo e ʻOtuá?
ʻE pule fakakū ʻa e Puleʻanga ʻo e ʻOtuá ki he māmaní?
Ko e hā ʻe fakahoko ʻe he Puleʻanga ʻo e ʻOtuá?
Ko e hā ke tau fili ai ke poupou ki he Puleʻanga ʻo e ʻOtuá he taimi ní?
Ko e hā ʻa e Puleʻanga ʻo e ʻOtuá?