Kapau kuo fakalotomamahiʻi koe ʻe ha lotu pau ʻoku faingataʻa nai ke ke falala ki ha toe lotu. Ka ke fakapapauʻi ʻoku ʻi ai ha lotu ʻoku taau ke ke falala ki ai. ʻI heʻene ʻi māmaní, naʻe fakatahatahaʻi ai ʻe Sīsū ha kulupu ʻo e kau muimui faitōnungá pea akoʻi kinautolu ke nau moʻui ʻo fakatatau ki he ngaahi tuʻunga ʻa e ʻOtuá. Ko e kau muimui moʻoni ʻo Kalaisí—ʻa e faʻahinga faitōnunga ʻoku nau feinga mālohi ke moʻui ʻo fakatatau ki he ngaahi tuʻunga faka-Kalisitiané—ʻoku kei ʻi ai pē. ʻOku lava ke ke ʻilo kinautolu ʻi fē?

Ko ʻEsitele naʻe lave ki ai ʻi he kupu ki muʻá, ʻokú ne pehē: “Naʻá ku toki kamata pē ke ʻilo ʻa e Tohi Tapú ʻi he taimi naʻá ku ako ai mo e Kau Fakamoʻoni ʻa Sihová. Naʻe ʻikai ke fuʻu fuoloa kuo mahino kiate au ʻa e Sione 8:32, ʻa ia ʻoku pehē: ‘Te mou ʻilo ʻa e moʻoní, pea ko e moʻoní te ne fakatauʻatāinaʻi kimoutolu.’”

Ko Lei naʻe lave ki ai ki muʻá, ʻokú ne pehē: “ʻI hono ako ʻa e Tohi Tapú mo e Kau Fakamoʻoni ʻa Sihová naʻá ku ʻiloʻi ai ʻoku ʻikai ke tupu mei he ʻOtuá ʻa e faingataʻaʻia ʻa e faʻahinga ʻo e tangatá. Naʻá ku fakamālōʻia ʻi he ʻiloʻi lolotonga ʻoku ʻi ai ʻa e ʻuhinga lelei ʻa e ʻOtuá ʻi hono fakangofua ʻa e fulikivanú ʻi he taimi ní, ʻokú ne toe talaʻofa ke toʻo vavé ni atu ia.”

ʻOku hā mahino, ʻoku faingataʻa ke fai ʻa e meʻa ʻoku totonú lolotonga iá ko e tokolahi taha ʻo e kakaí ʻoku nau moʻui ʻi he tuʻunga fakaeʻulungaanga ololalo ʻo e māmaní. Ka ʻoku malava ia. ʻOku fiemaʻu ʻe he kakai tokolahi ha tokoni ke mahinoʻi mo ngāueʻaki ʻa e Tohi Tapú. Ko e ʻuhinga ia ʻoku fai ai ʻe he Kau Fakamoʻoni ʻa Sihová ʻa e ako Tohi Tapu taʻetotongi mo e laui miliona ʻi māmani lahi. ʻI he uike taki taha, ʻoku ako ai ʻe he tokolahi ʻa e meʻa ʻoku akoʻi moʻoni ʻe he Tohi Tapú. Ko hono olá ʻoku nau ʻunuʻunu ofi ai ki honau Tokotaha-Fakatupú pea tupulekina ai ʻa e moʻui fiefia ange. *

Ko e taimi hono hoko ʻo hoʻo fetaulaki mo e Kau Fakamoʻoni ʻa Sihová, ʻeke ange kiate kinautolu pe ko e hā e ʻuhinga ʻoku nau falala ai ki heʻenau lotú? Sivisiviʻi ʻa e meʻa ʻoku nau akoʻí mo honau lēkōtí. Peá ke fili leva pe ʻoku ʻi ai ha lotu ʻe lava ke ke falala ki ai.