KUMBI Yehova Ngwakuwusa wa zeru? Nthowa yimoza yakumukiya fumbu lenili nkhuŵanaŵaniya ulongozgi wo iyu wapereka. Kumbi ulongozgi wenuwu ngwakovya? Kumbi kuwugwiriskiya nchitu kupangisa umoyu widu kuti uje wamampha? Fumu ya zeru Solomoni, yingulemba nthanthi zinandi. Nthanthi zenizi, zikwasa vigaŵa vosi va umoyu widu. Ŵanaŵaniyani vakuwoniyapu ivi.

Kugomezga Chiuta. Kuja ndi chigomezgu ndi nthowa yimoza yakujaliya pa ubwezi wamampha ndi Yehova. Solomoni wangulemba kuti: “Gomekezga Ambuya [Yehova] ndi mtima wako wose, ndipo leka kugomezga pa chinjeru chaku wamweni. Munthowa zako zose zomeranga iwo ndipo iwo ŵakanyoroskanga nthowa zako.” (Nthanthi 3:​5, 6) Kugomezga Yehova mwakupenja ulongozgi waki ndipuso kumuvwiya kupangisa kuti umoyu widu uje wamampha. Kuchita venivi kukondwesa mtima waku Chiuta ndipu kutimupangisa kuti Yehova wamuki nkhani yo yikwambisika ndi murwani Waki, Satana.​—Nthanthi 27:11.

Kuchita vinthu mwazeru ndi anyidu. Ulongozgi waku Chiuta wo uperekeka kwa anthurumi, anthukazi akuyirwa ndi ŵana ngwapanyengu yaki mazuŵa nganu kuluska kali. “Kondwani ndi munthukazi wa unyamata winu.” Chiuta wapereka ulongozgi kwa munthurumi kuti wajengi wakugomezgeka ku muwolu waki. (Nthanthi 5:​18-20) Anthukazi akuyirwa asaniya ulongozgi wakuchiska m’buku la Nthanthi wakukamba za munthukazi yo wayanjika ndi murumu waki ndipuso ŵana. (Nthanthi chaputala 31) Ŵana asaniya ulongozgi wakuvwiya apapi ŵawu. (Nthanthi 6:20) Buku lenili, lilongo so kuti kuja ndi mabwezi nkhwakukhumbika ukongwa chifukwa kujipatuwa kungapangisa munthu kwamba kujiyanja. (Nthanthi 18:1) Mabwezi ngangatichitisa kuti tichiti vinthu vamampha pamwenga viheni, mwaviyo tikhumbika kusankha mabwezi mwazeru.​—Nthanthi 13:20; 17:17.

Tichitengi vinthu mwazeru. Buku la Nthanthi le ndi ulongozgi wamampha ukongwa wa mo tingatcheŵe pankhani ya kumwa moŵa mwa uroŵevu, kuja ndi maŵanaŵanu ngamampha ngo ngangatiwovya kuti liŵavu lidu lije la nthazi, tilimbanengi ndi vinthu viheni ndipuso kuti tilimbikiyengi kugwira nchitu. (Nthanthi 6:6; 14:30; 20:1) Litititcheŵesa kuti kugomezga ŵanthu kuluska ulongozgi waku Chiuta, kungachitisa kuti tikumani ndi masuzgu. (Nthanthi 14:12) Lititichiska so kuti tivikiliyengi mtima widu ku vinthu viheni ndipu lititikumbuska kuti ‘[mu mtima] ndimu mutuwa umoyu.’​—Nthanthi 4:23.

Ŵanthu mamiliyoni nganandi pacharu chosi chapasi awona kuti kulondo ulongozgi wenuwu kutovya kuti umoyu uje wamampha. Chifukwa cha venivi, ŵe ndi vifukwa vakuzomereze Yehova kuti ndiyu wakwenere Kuwusa.

​—Nkhani iyi yatuliya m’buku la Nthanthi.