Yesu wangusambiza ŵanthu kuti ajengi mwachimangu ndi anyawu. Kweni nyengu yinyaki wangukambiya akutumika ŵaki kuti: “Mungaŵanaŵananga cha kuti ndikuziya kuzipereka chimangu pacharu chapasi, ndikuza kuzipereka chimangu cha kweni lipanga. Chifukwa ndikuziya kuzipatuska ŵanthu; kuzipatuska munthu ndi awisi, mwana munthukazi ndi anyina kweniso mkumwana ndi apongozi ŵaki.” (Mate. 10:34, 35) Kumbi Yesu wang’anamuwanganji penapa?

Yesu wakhumbanga cha kuti ŵanthu a banja limoza agaŵikani kweni wanguziŵa kuti vo wasambizanga vazamuchitiska kuti mabanja nganyaki ngapatukani. Mwaviyo, ŵanthu wo akhumbanga kuja akusambira aku Khristu kweniso kubatizika, akhumbikanga kuziŵa kuti nyengu zinyaki ŵanthu a mu banja lawu azamukondwa cha ndi vo yiwu asankha. Asani asuskika ndi munthu yo akutorana nayu yo ndi Kaboni cha pamwenga ŵanthu anyaki a mu banja lawu, vingaŵa vakusuzga kuti alutirizgi kuja akugomezgeka ku vo Khristu wasambizanga.

Bayibolu lichiska Akhristu kuti ‘ajengi mwachimangu ndi ŵanthu wosi.’ (Aro. 12:18) Kweni vo Yesu wasambizanga vingaŵa nge “lipanga” mu mabanja nganyaki. Venivi vichitika asani munthu munyaki wazomera vo Yesu wasambizanga penipo anyaki asuska. Asani venivi vachitika, ŵanthu a mu banja wo asuska, aja “arwani” a munthu yo wasambira uneneska.​—Mate. 10:36.

Akusambira aku Khristu wo ŵe mu banja lo ndakupambana visopa, nyengu zinyaki akhumbika kusankha kukondwesa Yehova kweniso Yesu pamwenga ŵanthu a mu banja lawu. Abali ŵawu wo mbakaboni cha, nyengu zinyaki angaŵachichizga kuti achiteku maholidi ngavisopa. Asani venivi vachitika, kumbi yiwu akondwesengi yani? Yesu wangukamba kuti: “Weyosi yo watanja ukongwa awisi pamwenga anyina kuluska ini, ngwakwenere ini cha.” (Mate. 10:37) Kweni Yesu wang’anamuwanga cha kuti ŵanthu wo akhumba kuja akusambira ŵaki atenere kuŵayanja kamanavi apapi ŵawu kuti aje akwenere iyu. Mumalu mwaki waŵasambizanga mo angasankhiya vinthu vakukhumbika ukongwa pa umoyu wawu. Asani ŵanthu a mu banja lidu wo mbakaboni cha asuska vo tichita pakusopa Yehova, isi tilutirizga kuŵayanja kweni tiziŵa kuti chanju chidu pa ku Chiuta ndichu chakukhumbika ukongwa.

Kukamba uneneska kususkika ndi ŵanthu a mu banja lidu kungaŵa kwakupweteka ukongwa. Kweni akusambira aku Yesu atenere kukumbuka mazu ngaki ngakuti: “Weyosi yo wakana kupinga chimiti chaki chakutombozgekiyapu ndipuso wakana kundilondo, ngwakwenere ini cha.” (Mate. 10:38) Mu mazu nganyaki tingakamba kuti, Akhristu awona kuti kususkika ndi ŵanthu a mu banja lawu, ntchigaŵa cha masuzgu ngo akusambira aku Khristu mbakunozgeka kukunthiyapu. Kweni yiwu agomezga kuti chifukwa cha mijalidu yawu yamampha, ŵanthu a mu banja lawu azamusintha maŵanaŵanu ngawu ndipu azamukhumba kusambira uthenga wa mu Bayibolu.​—1 Petu. 3:1, 2.