Janet wangukamba kuti: “Pati pajumpha nyengu yimanavi ada ŵati atayika, mulumu wangu wangundikambiya kuti wasaniya munthukazi munyaki. Pati pajumpha nyengu yimanavi, wangupanganya malaya ngaki ngosi ndipu wangundileka ndi ŵana ŵaŵi.” Janet wangusaniya ntchitu, kweni ndalama zo walondiyanga zakwananga cha kuti wamalizi kupereka ngongoli ya nyumba yo angugula. Penga so masuzgu nganyaki ngo wakumananga nangu. Iyu wangukamba kuti: “Ndisuzgika maŵanaŵanu ukongwa chifukwa cha udindu wo ndenawu sonu wakuphwere ndija ŵana. Kweniso nditijimba mulandu kuti nditondeka kuŵaphwere umampha ŵana ŵangu. Ndipu ndiŵanaŵaniya mo ŵanthu atindiwone ndipuso mo awone ŵana ŵangu. Ndiwona nge kuti ŵanthu aŵanaŵana kuti ini ndini ndikuchitiska kuti nthengwa yimali.”

Rombu ndilu lawovya Janet kuti waleki kusuzgika ukongwa maŵanaŵanu kweniso kuti waje pa ubwezi wakukho ndi Chiuta. “Ndisuzgika ukongwa maŵanaŵanu ndi usiku asani ndikhumba kugona. Kuromba ndi kuŵerenga Bayibolu ndiku kutindiwovya kuti ndigoni. Nditanja ukongwa lemba la Ŵafilipi 4:6, 7 lo likamba kuti: ‘Mungafipanga mtima cha ndi kanthu kekosi kweni pa chechosi, mu rombu ndipuso kuninizika pamoza ndi kuwonga, vakupempha vinu viziŵiki kwaku Chiuta. Ndipu chimangu cho chiluska kuŵanaŵana kwekosi chivikiliyengi mitima yinu ndi maŵanaŵanu nginu.’ Kuromba nyengu zosi ndi usiku kwandiwovya kuti Yehova wandipaski chimangu.”

Mazu ngo Yesu wangukamba ngakukwaskana ndi rombu pa Upharazgi wa pa Phiri ngamiyanga kusuzgika maŵanaŵanu kwa mtundu wewosi. Iyu wangukamba kuti: “Awuskemwi aziŵa vo mukhumba, imwi mwechendapemphi.” (Mateyu 6:8) Tikhumbika nadi kuromba chifukwa ndiyu nthowa yimoza yo ‘tingandelere kufupi ndi Chiuta’ kuti nayu wandere kufupi ndi isi.”​—Yakobe 4:8.

Kukamba uneneska, rombu lititiwovya so munthowa zinandi. Yehova yo watuvwa marombu ngidu watovya ŵanthu wo atimupenja ndi chigomezgu chakuti  waŵawovyengi. (Sumu 65:2) Ndichu chifukwa chaki Yesu wangusambiza akumulondo kuti arombengi nyengu zosi ndipu angavukanga cha. (Luka 18:1) Tingalekanga cha kupempha Yehova kuti watiwovyi ndi kutilongozga kweni titenere kuja ndi chigomezgu kuti watipasengi vo tikhumba. Tingakayikanga cha kuti Chiuta we ndi nthazi ndipu wakhumbisiska kutiwovya. “Kuromba nyengu zosi” kungalongo kuti te ndi chigomezgu chakukho.​—1 Ŵatesalonika 5:17.

Kumbi chigomezgu nchinthu wuli? Kuja ndi chigomezgu kung’anamuwa so “kumuziŵa” umampha Chiuta. (Yohane 17:3) Tingachita ivi asani tisambira vo Chiuta wakhumba vo vikulembeka m’Bayibolu. Tiziŵa kuti iyu wawona weyosi ndipu wakhumba kutiwovya. Kuja ndi chigomezgu chakukho kung’anamuwa vinandi kuluska kuziŵa waka vakukwaskana ndi Chiuta. Kung’anamuwa so kuja pa ubwezi wakukho ndi Chiuta. Ubwezi waviyo ungamala liŵi cha nge mo viŵiya ndi ŵanthu wo atanjana. Chivwanu chidu chikuwa ukongwa asani tisambira vakukwaskana ndi iyu, tichita vinthu vo vitimukondwesa ndipuso asani tiwona mo iyu watitiwovye. (2 Ŵakorinte 10:15; Yohane 8:29) Ivi ndivu vinguwovya Janet kuti waleki kusuzgika ukongwa maŵanaŵanu.

Janet wangukamba kuti: “Kuwona mo Yehova watindiwovye nyengu zosi kwandiwovya kuti ndije ndi chivwanu chakukho. Kanandi ŵanthu atichitiyanga vinthu vambula urunji vo ndawonanga kuti venga vakusuzga kukunthiyapu. Kweni chifukwa chakuti ndarombanga, Yehova wandiwovyanga kuti ndikunthiyengepu chinanga kuti pakundija ndatingi ndifiskengi cha. Asani nditimuwonga ndikumbuka vinthu vinandi vo wandichitiya. Ndipu nyengu zosi watindiwovya pa nyengu yakwenere. Ndipuso wandipaska mabwezi ngachikhristu ngo ngatindiyanja ukongwa. Nyengu zosi ngatindiwovya ndipu nchakuwoniyapu chamampha ku ŵana ŵangu.” a

“Sonu ndivwisa chifukwa cho Yehova wakambiya mazu ngo nge pa Malaki 2:16 ngakuti, ‘nditinkha kupatana.’ ‘Nchinthu chakupweteka ukongwa asani munthu wakupata kwambula chifukwa chakuvwika. Pajumpha vyaka vinandi kutuliya po murumu wangu wakundipatiya, kweni nyengu zinyaki ndichita phukwa ndipu nditijiwona kuti nde wambula kwenere. Asani ndayamba kuŵanaŵaniya ukongwa venivi, ndiyesesa kuti ndichiti chinthu chinyaki kuti ndiwovyi anyaki. Venivi vitindiwovya so ndamweni.” Kulondo ulongozgi wa m’Bayibolu kwandiwovya ukongwa kuti ndileki kujipatuwa. b—Nthanthi 18:1.

Janet wangukamba kuti: “Ndipembuzgika ukongwa kuziŵa kuti Chiuta ndi ‘wuskewu wa aranda ndipuso wavikiliya vyoko.’ Iyu watisiyengi cha nge mo mulumu wangu wakuchitiya.” (Sumu 68:5) Janet waziŵa kuti Chiuta wayesa cha ŵanthu ndi “vinthu viheni.” Kweni watitipasa zeru ndipuso nthazi zakuluska zo tenazu kuti tikunthiyepu masuzgu ngo ngatitisuzga maŵanaŵanu.—Yakobe 1:5, 13; 2 Ŵakorinte 4:7.

Kweni tingachita wuli asani tifipa mtima chifukwa chakuti umoyu widu wepangozi?