Pa 4 April 2021, ku Nigeria kunguchitika unganu wapade wo unguchitika kuziya pa intaneti. Pa unganu uwu, Mubali Kenneth Cook, wa mu Wupu Wakulongozga, wangutuzga Bayibolu la Charu Chifya la Malemba Ngakupaturika lakunozgeka so muchineneru cha Chiigibo. Abali ndi azichi mumipingu yakujumpha 1,140 wo alongoro chineneru ichi ku Nigeria, mbakukondwa ukongwa kulonde Bayibolu lakunozgeka so lenili, chifukwa pajumpha vyaka 14 kutuliya po angulonde Bayibolu la Charu Chifya lakwamba mu chineneru cha Chiigibo.

Bayibolu lenili liwovyengi abali ndi azichi akujumpha 50,000 wo awungana mu mipingu kweniso magulu ngo ngalongoro Chiigibo. Liŵengi so chidya chamampha ukongwa mu uteŵeti pakupharazgiya ŵanthu pafufupi 40 miliyoni wo alongoro chineneru ichi.

Yumoza waku wo angugwiraku ntchitu yakufwatuliya Bayibolu ili, wangukamba kuti: “Mazu nganandi ngamumphata ngo nge mu Bayibolu la Charu Chifya lakunozgeka so, ngaŵawovyengi ukongwa ŵanthu wo aŵerenga Chiigibo. Mazu ngamumphata ngenanga ngakonkhoska waka vo mazu nga Chiheberi pamwenga Chigiriki ngang’anamuwa cha. Kweni, mwe mazu nganandi nga Chiigibo ngo ngayananaku ndi ngo munthu waŵerenga, ndipu mumalu nganyaki mwe so mazu ngo ngangawovya munthu yo waŵereŵeta Chiigibo chakupambanaku kuvwisa umampha nkhani yo waŵerenga.”

Mubali Archibong Ebiti, wa mu Komiti ya Nthambi ku Nigeria wangukamba kuti: “Abali ankhondi ndi mzichi yumoza ndiwu angugwira ntchitu yakufwatuliya Bayibolu ili kwa vyaka vinayi. Chinanga kuti penga masuzgu nganyaki ngo angukumana nangu chifukwa cha mulili, kweni titimuwonga ukongwa Yehova chifukwa chakupereka mzimu waki kwaku wosi wo angugwiraku ntchitu yeniyi.”

Tigomezga kuti Akaboni wosi wo alongoro Chiigibo pacharu chosi, akondwengi kuŵerenga mazu ngambula kusuzga ngo nge mu Bayibolu lakunozgeka so lenili. Asuzgikengi so cha kusambiza ndi kukonkhoske ŵanthu “nthowa yaku Chiuta.”—Machitidu 18:26.