Pa 24 January 2021, Buku la mu Bayibolu la Uthenga Wamampha wo Ukulembeka ndi Mateyu likutuzgika Muchineneru cha Manja cha ku Zimbabwe (ZSL). Mubali Taurai Mazarura, wa mu Komiti ya Nthambi ku Zimbabwe ndiyu wangutuzga Bayibolu lenili mu pulogilamu yo yinguchita kujambulika.

Apharazgi 401 wo ateŵete muchineneru cha manja cha ku Zimbabwe angukondwa ukongwa kulonde buku lenili. Yiwu mbakunozgeka kugwiriskiya ntchitu buku la Mateyu lenili asani asambira pakuŵija kweniso asani apharazga mu uteŵeti.

Mulili unguchitiska kuti ntchitu yakufwatuliya buku ili yije yakusuzga. Kanandi akufwatuliya alutanga mu vigaŵa vinyaki kuti akakumani ndi ŵanthu wo alongoro chineneru cha manja kuti asimikiziyi kuti asani vo afwatuliya vivwika umampha. Kweni chifukwa cha mulili wa COVID-19 venga vakusuzga kuti aluti mu vigaŵa vakupambanapambana kuchikumana masu ndi masu ndi ŵanthu ŵenaŵa. Mwaviyo, akufwatuliya angwamba kukambiskana ndi ŵanthu ŵenaŵa kuziya pa vidiyokoniferensi. Venivi vinguŵawovya kuti afwatuliyi buku lo ŵanthu wosi ambula kulongoro ku Zimbabwe, atilivwisa umampha.

Mubali John Hunguka wa mu Komiti ya Nthambi ku Zimbabwe wangukamba kuti: “Mo akutuzgiya buku la Mateyu, Akaboni aku Yehova akwambapu kufwatuliya Bayibolu losi Muchineneru cha Manja ku Zimbabwe. Ntchitu yeniyi yingato vyaka pafufupi 10 kuti yimali.”

Ntchitu yeniyi mbukaboni wakuti Yehova watanja ŵanthu wosi. Tikondwa ukongwa kuwona kuti Yehova watitumbika po titesesa kupharazga “uthenga wamampha . . . ku mtundu wewosi, fuku lelosi, chineneru chechosi ndipuso ku ŵanthu wosi.”—Chivumbuzi 14:6, mazu ngamumphata.