Lwakusaanguna kuBakkorinte 11:1-34
11 Amutobelezye ndime mbukunga andime nditobelezya Kkristu.
2 Ndiyanda kumulumba nkaambo mulandiyeeya muzintu zyoonse alubo mulijisilidi kuzintu nzindakamuyiisya.
3 Pesi ndiyanda kuti muzibe kuti, mutwe wamwaalumi woonse nguKkristu, mutwe wamwanakazi mwaalumi, mpawo mutwe waKkristu nguLeza.
4 Kufumbwa mwaalumi uukomba naakuti uupolofita kalivumbide kumutwe, wuubula mutwe wakwe.
5 Pesi kufumbwa mwanakazi uukomba naakuti uupolofita katalivumbide kumutwe, wuubula mutwe wakwe, nkaambo ulikozyenie amwanakazi uukulwidwe mumutwe.
6 Nkaambo kuti mwanakazi katalivumbi kumutwe, weelede kugela masusu aakwe. Pesi kuti kugelwa naakuti kukululwa kakupa kuti mwanakazi abe aabweeme, weelede kulivumba kumutwe.
7 Nkaambo mwaalumi teelede kulivumba kumutwe pe mbukunga nchikozyano chaLeza abulemu bwakwe, pesi mwanakazi mbulemu bwamwaalumi.
8 Nkaambo mwaalumi taakazwa kumwanakazi pe, pesi mwanakazi wakazwa kumwaalumi.
9 Mukuyungizya, mwaalumi taakalengelwa mwanakazi pe, pesi mwanakazi wakalengelwa mwaalumi.
10 Akaambo kamakani aaya, mwanakazi nchayelede kuba aachitondeezyo chakulibombya kumutwe wakwe akaambo kangilozi.
11 Nikuba oobo, muMwaami, mwanakazi takonzyi pe kubawo kuti mwaalumi katawo alubo mwaalumi takonzyi pe kubawo kuti mwanakazi katawo.
12 Nkaambo, mbukunga mwanakazi uzwa kumwaalumi anguwe mwaalumi ulabawo kwiinda mumwanakazi, pesi zintu zyoonse zizwa kuli Leza.
13 Amulisalile amulikke kumakani aaya: Zilachita na kuti mwanakazi akombe kuli Leza katalivumbide pe kumutwe?
14 Kweendelana ambubalengedwe bantu, tamuzi na kuti masusu malamfu apa kuti mwaalumi atabi aabulemu,
15 pesi kuti mwanakazi kali aamasusu malamfu mbulemu kulinguwe? Nkaambo wakapegwa masusu kwiinda kuti apegwe chivumbyo.
16 Nikuba oobo, kuti umwi muntu kayanda kukazya makani aaya, kayanda kweeta chimwi chiyanza, tatukwaacho pe niziba mbungano zyaLeza tazikwaacho pe.
17 Pesi nindimupa malayilile aaya tandilikumulumbayizya pe nkaambo kubunganaamwi nkumuchita takulikumugwasya pe, pesi kulikumupambanisya.
18 Nkaambo chakusaanguna, ndilikumvwa kuti nimubunganaamwi mumbungano, kuli kwaanzaana aakati kanu, alubo makani aaya ndilakonzya kwaasyoma.
19 Nkaambo kwaamba choonzyo, kuzooba tubunga aakati kanu, kuchitila kuti aabo bayandwa aaLeza baboneke.
20 Chiindi nimubunganaamwi aandawu iimwi, nga tamulikubunganina kulya Chilalilo chaMwaami choonzyo.
21 Nkaambo chiindi nimuchilya, umwi awumwi nga walya kale chilalilo chakwe, zyakuti umwi nga ulaanzala pesi umwi nga ulikoledwe.
22 Tamukwe maanda aakulida na amaanda aakunywida? Naakuti nkamboonzi nimunyansya mbungano yaLeza akupa kuti aabo batakwe chintu babe aabweeme? Ndimubuzye kutyeni? Ndimulumbayizye na? Kumakani aaya, tandikoomulumbayizya pe.
23 Nkaambo nzindakatambula kuMwaami nzizyo nzindakamuyiisya, kuti mubusiku Mwaami Jesu mbwaakali kuyanda kuuzigwa, wakabweza chinkwa,
24 walumba, wachikwamuna mpawo wakati: “Eechi chiiminina mubili wangu uutazoopegwe akaambo kandinywe. Amukkale kamuchita oobu kamundiyeeya.”
25 Alubo nibakamaninsya kulya chilalilo, wakachita zikozyenie akunkomeki, kati: “Nkomeki eeyi yiiminina chizuminano chipya chibawo kwiinda muganzi lyangu litazootilwe akaambo kandinywe. Amukkale kamuchita oobu kufumbwa chiindi nimuyinywa kamundiyeeya.”
26 Nkaambo kufumbwa chiindi nimulya chinkwa eechi akunywa nkomeki eeyi, nga mulikwaambilizya lufu lwaMwaami kusikila azoosike.
27 Nkinkaako, kufumbwa muntu uulya chinkwa akunywa nkomeki yaMwaami kateeleli, ulaba aamulandu atala amubili aganzi lyaMwaami.
28 Muntu asaangune kulilanga-langa akubona kuti uleelela na, mpawo natazoolye chinkwa akunywa nkomeki.
29 Nkaambo muntu uulya akunywa katamvwisisisyi mubili, ulyeetela lubeta chiindi nalya akunywa.
30 Biingi aakati kanu nchibatakwe manguzu alubo nchibalikuchiswa, alubo biingi balikoona mulufu.*
31 Pesi kuti twalilanga-langa akuziba mbutubede, tatukoobetekwa pe.
32 Nikuba oobo, chiindi nitubetekwa, nga tulikulayigwa aaJehova* kuchitila kuti tutapegwi mulandu aamwi anyika.
33 Nkinkaako bakombima, chiindi nimubunganaamwi kuti muzoolye chakulya eechi, amulindane.
34 Kuti umwi kali aanzala, alye kachili kung’anda, kuchitila kuti nimwabunganaamwi mutabunganini lubeta. Pesi amwi makani aasyaala, ndizoowabambulula nindasika nkukooko.
