Mbuti Mbondikonzya Kuba Kamboni wa Jehova?
Ntaamu ziyandika kutobelwa kutegwa muntu abe Kamboni wa Jehova wakazyaamba Jesu alimwi zilajanika mulugwalo lwa Matayo 28:19, 20. Cibalo eeci cilatondezya muntu ncayelede kucita kutegwa abe sikwiiya wa Kristo, calo icibikkilizya akwaamba, naa kupa bumboni kujatikizya Jehova.
Ntaamu yakusaanguna: Amwiiye ncoliyiisya Bbaibbele. Jesu wakalailila basikumutobela kuti bagwasye bantu kuba ‘basikwiiya akubayiisya.’ (Matayo 28:19, 20) Mu Bbaibbele, kwaambisya nzyaakayiisya Jesu Kristo, muli makani ngomuyandika kuzyiba kutegwa mube abuumi bukkomanisya alimwi bulaampindu. (2 Timoteyo 3:16, 17) Inga twakkomana kumugwasya kwiiya ncoliyiisya Bbaibbele kwiinda mububambe bwaciiyo ca Bbaibbele citabbadelwi.—Matayo 10:7, 8; 1 Batesalonika 2:13.
Ntaamu yabili: Amuzibelesye nzyomwiiya. Jesu wakaamba kuti aabo baiya beelede ‘kutobela zintu zyoonse nzyaakalailila.’ (Matayo 28:20) Eeci caamba kuti tamweelede kwiiya Bbaibbele kutegwa mube buyo aluzyibo, pele ciyandika kuti mucince mumizeezo alimwi amubukkale bwanu. (Milimo 10:42; Baefeso 4:22-29; Bahebrayo 10:24, 25) Aabo batobela malailile aa Jesu balalisalila kumutobela kwiinda mukulyaaba kuli Jehova Leza.—Matayo 16:24.
Ntaamu yatatu: Amubbapatizyigwe. (Matayo 28:19) Mu Bbaibbele, kubbapatizyigwakweezyanisyigwa aakuzikkwa. (Amweezyanisye Baroma 6:2-4.) Ncitondezyo cakufwa kubukkale bwakaindi mpoonya akutalika bupya. Aboobo, kubbapatizyigwa kwanu ncitondezyo kubuleya kuti mwakazitobela ntaamu zyobilo zyakusaanguna nzyaakaamba Jesu alimwi akuti mulomba Leza kuti amupe manjezyeezya aasalala.—Bahebrayo 9:14; 1 Petro 3:21.
Ino inga mwazyiba buti kuti muleelela kubbapatizyigwa?
Amubandike abaalu bamumbungano. Bayoobandika andinywe kutegwa basinizye kuti mulazimvwisya zijatikizyidwe, mulazibelesya nzyomwiiya, alimwi akuti mwalyaaba kuli Leza cakuliyandila.—Milimo 20:28; 1 Petro 5:1-3.
Sena ntaamu eezyi zilabeleka kubana ba Bakamboni?
Inzya. Tulakomezya bana besu “mululayo lwa Jehova,” mbubwenya Bbaibbele mbolyaamba. (Baefeso 6:4) Nokuba boobo, mbobayaabukomena, beelede kulisalila kwiiya, kuzumina, alimwi akubelesya ncoliyiisya Bbaibbele kabataneelela kubbapatizyigwa. (Baroma 12:2) Mukuya kwaciindi, umwi aumwi weelede kulisalila kujatikizya bukombi.—Baroma 14:12; Bagalatiya 6:5.