CIBEELA 4
Kulimvwa Kuba Amulandu—“Kondisalazya Kucibi Cangu”
“Ncito njindakajana yakapa kuti mukwasyi wesu uvwube, pele alimwi yakandinjizya mumicito minji iitali kabotu. Ndakatalika kusekelela mazuba aakulyookezya, kutola lubazu muzintu zijatikizya twaambo twacisi, mane buya akuunka kuzikombelo. Tiindakacisungweede pe, ndakaleka kuyanzana a Bakamboni ba Jehova kwamyaka iili 40. Ciindi mbocakali kuyaabuya, akwalo kulimvwa kuti Jehova takonzyi kundilekelela kwakali kuyaabwiindila. Lyoonse ndakali kulimvwa kuba amulandu. Kayi ndakalikazyi kasimpe kanditananjila munzila iitali kabotu.”—Ba Martha.
KULIMVWA kuba amulandu kulakonzya kumulemena kapati muntu. Mwami Davida wakalemba kuti: “Milandu yangu yandivwulila atala aamutwe wangu; yandiminya kapati mbuli mukuli mulemu.” (Intembauzyo 38:4) Banakristo bamwi balaangidwe akaambo kakuusa kapati; bayeeya kuti Jehova takonzyi pe kubalekelela. (2 Bakorinto 2:7) Sena cili kabotu kuyeeya boobo? Nokuba kuti mwakacita cibi cipati, sena caamba kuti mwakabijilalyo cakuti Jehova takonzyi kumulekelela? Peepe, tabusyi mbocibede oobo pe!
‘Atubambe Twaambo Akati Kesu’
Jehova tabalekelezyi pe basizibi ibeempwa. Mubwini uyanda kubagwasya kuti bapiluke kulinguwe! Mucikozyanyo camwana mutaka, Jesu wakakozyanisya Jehova kumuzyali siluyando uujisi mwana iwakazwa aŋanda akuunka kuyoopona buumi bwabutaka. Mukuya kwaciindi, mwana ooyo wakaliyeeya akujokela kuli bausyi. “Kacili kulaale [mwana ooyo], bausyi bakamubona aboobo bakamufwida luzyalo, eelyo bakamubalikila, baakumukumbata akumumyonta.” (Luka 15:11-20) Sena andinywe mulombozya kupiluka kuli Jehova pele mulimvwa kuti ‘mucili kulaale’ anguwe? Mbubonya mbuli muzyali waambwa mucikozyanyo ca Jesu, Jehova ulamufwida luzyalo andinywe. Uliyandide kumutambula amaanza obilo.
Pele ino mbuti kuti mulimvwa kuti zibi zyanu nzipati naa kuti nzinji kapati cakuti Jehova takonzyi kumulekelela? Twamulomba kuti muyeeye bwiite bwa Jehova ibulembedwe kuli Isaya 1:18 bwakuti: “‘Amuboole lino tubambe twaambo akati kesu,’ mbwaamba Jehova. ‘Nokuba kuti zibi zyanu zilasalala pyu, zilatubisyigwa buu mbuli caanda.’” Masimpe, noziba zibi izilibonya mbuli kuti tazikonzyi kuzimaanizyigwa mbubonya mbuli cisani cituba icinyikidwe mumubala uusalala pyu mbocikatazya kutubisyigwa, tacaambi kuti Jehova takonzyi kumulekelela zibi eezyo.
Jehova tayandi kuti muzumanane kukatazyigwa amanjezyeezya aanu. Aboobo, ino mbuti mbomukonzya kulimvwa kwaanguluka akaambo kakulekelelwa aa Leza alimwi akuba amanjezyeezya aasalala? Amulange-lange ntaamu zyobilo nzyaakabweza Mwami Davida. Cakusaanguna, wakaamba kuti: “Ndilalyaambilila nsotoko zyangu kuli Jehova.” (Intembauzyo 32:5) Kamuyeeyede kuti Jehova wamutamba kale kuti mumusikile mumupailo akuti ‘mubambe twaambo’ anguwe. Amubuzumine bwiite oobo. Amulyaambilile zibi zyanu kuli Jehova, akumwaambila mbomulimvwa mumoyo. Akaambo kazintu izyakamucitikila, Davida wakali kukonzya kupaila calusyomo kuti: “Kondisalazya kucibi cangu. . . . Moyo uuside alimwi uutyompedwe, O Leza, tokaukaki pe.”—Intembauzyo 51:2, 17.
Cabili, Davida wakalutambula lugwasyo ndwaakamupa mwiiminizi wa Leza uusalidwe, nkokuti musinsimi Natani. (2 Samuele 12:13) Mazuba aano, Jehova watupa baalu bambungano ibayiisyidwe kugwasya basizibi ibeempwa kuti batalike alimwi kumvwana a Jehova. Mwaakubasikila baalu, bayoobelesya Magwalo akupaila mipailo camoyo woonse kutegwa batontozye moyo wanu, kucesya naa kumanizya mizeezo yakulipa mulandu njomujisi, akumugwasya kuti mupone kumuuya.—Jakobo 5:14-16.
Jehova uyanda kuti mulimvwe kwaanguluka akaambo kakuba amanjezyeezya aasalala
“Ulikkomene Ooyo Wajatilwa Mulandu Wakwe”
Masimpe, mulakonzya kulimvwa kuti nciyumu kapati kulyaambilila zibi zyanu kuli Jehova Leza alimwi akusikila baalu. Kuboneka kuti awalo Davida mbwaakali kulimvwa oobo. Kwaciindi cili mbocibede, ‘wakaluumwine buyo’ kujatikizya zibi zyakwe. (Intembauzyo 32:3) Pele kumbele wakazyikuzyiba mpindu ziliko mukulyaambilila zibi akululamika buumi bwakwe.
Mpindu mpati njaakajana Davida njakuti wakatalika kukkomana alimwi. Wakalemba kuti: “Ulikkomene ooyo wajatilwa mulandu wakwe, uulaacibi icalekelelwa.” (Intembauzyo 32:1, bupanduluzi buyungizyidwe) Alimwi wakapaila kuti: “O Jehova,kojalula milomo yangu, kutegwa mulomo wangu ukonzye kwaambilizya ntembauzyo zyako.” (Intembauzyo 51:15) Ciindi naakalimvwa kwaanguluka kumulandu wakwe akumulumba Leza akaambo kakuti wakamulekelela, Davida wakakulwaizyigwa kwaambila bamwi kujatikizya Jehova.
Jehova uyanda kuti andinywe mulimvwe kwaanguluka akaambo kakuba amanjezyeezya aasalala. Alimwi uyanda kuti mukonzye kwaambila bamwi kujatikizya nguwe amakanze aakwe, kakunyina kulimvwa kuba amulandu, pele kakutuba kumoyo alimwi kamukondedwe kapati. (Intembauzyo 65:1-4) Amuyeeye kuti umutamba kuti “zibi zyanu zimwaigwe, ikutegwa ziindi zyakukatalukwa zimusikile kuzwa kuli Jehova lwakwe.”—Milimo 3:19.
Eeco ncicakabacitikila ba Martha. Baamba kuti: “Mwanaangu wakazumanana kunditumina mamagazini aa Ngazi Yamulindizi alimwi a Sinsimuka! Asyoonto-syoonto ndakabukulusya cilongwe cangu a Jehova. Pele cintu icakandiyumina kapati nondakali kuyanda kujokela, nkulomba kulekelelwa zibi zyoonse nzindakacita. Nokuba boobo, ndakazyikumusikila Leza mumupailo akumulomba kuti andilekelele. Cilagambya kuti cakanditolela myaka iili 40 kuti ndipiluke kuli Jehova. Icakandicitikila cipa bumboni busalede bwakuti nokuba kuti kwainda myaka minji buti, muntu ulakonzya kupegwa coolwe acimbi cakumubelekela Leza akutalika kuyandwa alimwi anguwe.”
Andiza Inga Mwaakkomanina Ayaaya
NGAZI YAMULINDIZI—YAKWIIYA
Ino Kulekelela Kwa Jehova Kwaamba Nzi Kulindinywe?
AMUBE ACILONGWE A JEHOVA
Leza ‘Uulibambilide Kulekelela Zibi’
Ikuti naa Leza ujisi mizeezo iilondokede, mbuti mbwakonzya kulekelela alimwi akuluba?
MAVIDIYO
Mwana Mutaka
Cilausisya kuti bakubusi balakonzya kuyungwa kuzwa munzila ya Bunakristo. Amuzyibe ntenda nzyobajana bakubusi mazuba aano.
