Ibbaibbele lilatalika kwiinda mukutwaambila makani aajatikizya kulengwa kwazintu, calo citupa kubona zintu zitaliboteli Jehova nzyaakalenga, kujulu alimwi aanyika. Ikuti kamuli bazyali, amumugwasye mwanaanu kubona mbozili zinji zintu izyakalengwa. Amumutondezye mwanaanu Leza mbwaakabalenga bantu munzila iindene abanyama kwiinda mukupa kuti tucikonzye kwaambaula, kuyeeya, kupanga zintu, kwiimba alimwi akupaila. Amumugwasye ikumulumba Jehova akaambo kanguzu nzyajisi, busongo bwakwe alimwi kwaambisya iluyando ndwajisi kuzilenge zyakwe zyoonse—kubikkilizya andiswe toonse.