“Kandicili kupulaimali, basicikoloma tiibakali kundiyanda. Kusekondali, ndakacinca nsamino yangu alimwi ambondakali kulilemeka, pele kutali munzila iili kabotu. Ndakali kuyandisisya kuba aabalongwe cakuti ndakazumina kuyungwa ambabo kutegwa kabandiyanda.”—Oobu mbwaakaamba Jennifer, uujisi myaka yakuzyalwa iili 16. *

Sena mulayungwa abeenzinyoko? Ikuti kacili boobo, cibalo eeci cilamugwasya kulizunda penzi eelyo.

Kuyungwa kulakonzya kupa bantu bali kabotu kucita zyintu zibyaabi.

“Kuyanzana kubyaabi kunyonganya zilengwa zibotu.”—1 Bakolinto 15:33.

“Zimwi ziindi tulakonzya kucita cintu ncotuzyi kuti cililubide akaambo buyo kakuyanda kukkomanisya bantu!”—Oobu mbwaakaamba Dana.

Talili lyoonse notuyungwa abeenzuma.

“Ndayanda kucita cibotu, icibi cili andime.”—Baloma 7:21.

“Kanji-kanji ndime ndipa kuti beenzuma kabandiyunga, nkaambo ndilalitondezya kuti zyintu zyoonse nzyobaamba zilandikkomanisya.”—Oobu mbwaakaamba Diana.

Kukaka kuyungwa ncintu ceelede kumukkomanisya kapati.

“Amuzumanane kuba amanjezyeezya mabotu.”—1 Petulo 3:16.

“Aciindi cimwi cakali kundiyumina kukaka kuyungwa, pele lino tandiyoowi kwiindana abantu bamwi alimwi tandicinci pe. Kunyina cintu cikkomanisya kapati kwiinda koona kojisi manjezyeezya mabotu.”—Oobu mbwaakaamba Carla.

Kuti naa mwayungwa kucita cintu citaluzi, amusole kubelesya nzila eezyi zitobela:

Amuyeeye zyintu zibi zikonzya kucitika. Amulibuzye kuti, ‘Mbuti kuti ndakuzumina kuyungwa ooko, mpoonya ndajatwa? Ino bazyali bangu bayakundibona buti? Ino mebo inga ndalimvwa buti?’—Mpoijanika njiisyo eeyi mu Bbaibbele: Bagalatiya 6:7.

“Bazyali bangu balandibuzya mibuzyo mbuli yakuti, ‘Ikuti naa wazumina kuyungwa, ncinzi cikonzya kukucitikila?’ Balandigwasya kubona mbuli kuyungwa mbokukonzya kunyonganya bukkale bwangu bwakumbele.”—Oobu mbwaakaamba Olivia.

Amuzizyibe kabotu zyintu nzyomusyoma. Amulibuzye kuti, ‘Nkaambo nzi ncondiyeeya kuti nzila eeyi tailuzi, ambweni kulindime buyo naa akuli bamwi?’—Mpoijanika njiisyo eeyi mu Bbaibbele: Bahebulayo 5:14.

“Nondakacili mwana, ndakali kwaamba buyo kuti peepe, naa kupa buyo bwiinguzi bufwaafwi, pele lino ndilacikonzya kupa bupanduluzi buli kabotu ibutondezya kaambo ncondikonzya kuzumina kucita cintu cimwi naa kukaka. Ndilizizyi kabotu-kabotu zyintu nzyondisyoma kujatikizya cibi alimwi acibotu. Aboobo, bwiinguzi buzwa kulindime kundigama, kutali kumuntu uumbi uuli oonse pe.”—Oobu mbwaakaamba Anita.

Amuyeeye mbomuyanda kuzyibwa abantu. Amulibuzye kuti, ‘Ino ndiyanda kuba muntu uuli buti?’ Mpoonya amuyeeye kuyungwa nkomujana lino akulibuzya kuti, ‘Ino muntu ooyo ngondiyanda kuba naacita buti mubukkale oobu?’—Mpoijanika njiisyo eeyi mu Bbaibbele: 2 Bakolinto 13:5.

“Ndilabukkomanina bube mbondijisi, aboobo kunyina makani ambobakonzya kundiyeeyela bamwi. Alimwi buya, bantu banji balandiyanda mbubwenya mbondibede.”—Oobu mbwaakaamba Alicia.

Amuyeeye bukkale bwanu bwakumbele. Ikuti naa muli basicikolo, mwaakumanizya, aabo beenzinyoko mbomuyanda kukkomanisya lino, tamunooponi limwi lyoonse pe.

“Ndakali kulanga acifwoto cakucikolo, pele basicikoloma bamwi ndakaaluba mazyina aabo. Pele nondakali aambabo kucikolo, mizeezo yabo ndakali kwiibona kuti ilayandika kwiinda zyintu nzyondisyoma. Eelo kaka oobo bwakali bufwuba-fwuba!”—Oobu mbwaakaamba Dawn, lino uujisi myaka yakuzyalwa iili 22.

Amulibambile. Ibbaibbele lyaamba kuti: ‘Amuzyibe mbomweelede kumwiingula muntu umwi aumwi.’—Bakolose 4:6.

“Bazyali bangu balandigwasya mebo amusyoonto wangu kulanga-langa bukkale bwiindene-indene bukonzya kucitika, mpoonya twamana tulabwiinduluka ambabo bukkale oobo kutegwa caakutucitikila ncobeni, tukacikonzye kuzwidilila.”—Oobu mbwaakaamba Christine.