Mwaapostolo Paulo wakapandulula Jehova * kuti ngu “Leza siluumbulizyo loonse, uutuumbulizya mumapenzi eesu oonse.” (2 Bakorinto 1:3, 4) Nkakaambo kaako Bbaibbele ncolitusyomezya kuti taakwe muntu uutakonzyi kugwasyigwa a Leza alimwi nolikomena buti penzi, Taateesu wakujulu ulakonzya kutuumbulizya.

Nokuba boobo, kuli ncotweelede kucita ikuti katuyanda luumbulizyo kuzwa kuli Leza. Ino dokota inga watugwasya buti ikuti naa tiitwapangana kuti tukaakubonane anguwe? Musinsimi Amosi wakabuzya kuti: “Sena bantu bobilo inga beenda antoomwe ikuti tiibapangana kuti baswaangane?” (Amosi 3:3) Aboobo, Magwalo atukulwaizya kuti: “Amuswene kuli Leza, eelyo awalo ulaswena kulindinywe.”—Jakobo 4:8.

Mbuti mbotukonzya kuba masimpe kuti Leza uyooswena kulindiswe? Cakusaanguna, akaambo kakuti ulatwaambila cakwiinduluka-induluka kuti uyanda kutugwasya. (Amubone  kabbokesi.) Cabili, akaambo kakuti tulijisi zikozyanyo zyabantu beni-beni mbaakaumbulizya Leza, bakaindi alimwi abamazuba aano.

Mbubwenya mbuli bamwi bayandaula lugwasyo kuzwa kuli Leza mazuba aano, Mwami Davida awalo wakali amapenzi. Cimwi ciindi wakalomba Jehova kuti: “Komvwa kukombelezya kwangu nendikukwiilila kuti undigwasye.” Sena Leza wakamwiingula? Inzya. Davida wakayungizya akwaamba kuti: “Wandigwasya, eelyo moyo wangu ulikondedwe.”—Intembauzyo 28:2, 7.

Leza wakabikka Jesu kuti abeleke mulimo uuyandika kapati mukupa luumbulizyo. Akati kamilimo Leza njaakamupa, umwi wakali wakuti ‘aange zilonda zyabaabo batyompedwe mumoyo’ alimwi ‘akuumbulizya baabo balila.’ (Isaya 61:1, 2) Mbubwenya mbokwakaambidwe kale, Jesu wakaliyandide kubagwasya aabo ‘bakakatede akulemenwa.’—Matayo 11:28-30.

Jesu wakabaumbulizya bantu kwiinda mukubapa lulayo lwabusongo, kubeendelezya cabubombe, alimwi buya akubaponya zimwi ziindi. Buzuba bumwi sicinsenda wakakombelezya Jesu kuti: “Ikuti koyanda, ulakonzya kundisalazya.” Akaambo kakuti wakamufwida  luzyalo, Jesu wakamwiingula kuti: “Ndilayanda! Kosalazyigwa.” (Marko 1:40, 41) Aboobo sicinsenda wakaponesyegwa.

Mazuba aano, Mwana wa Leza tako anyika kutegwa atuumbulizye cacigaminina. Pele Usyi, Jehova, “Leza siluumbulizyo loonse,” wazumanana kugwasya baabo bayandika lugwasyo. (2 Bakorinto 1:3) Amulange-lange nzila zyone nzyabelesya Leza kuumbulizya bantu.

• Ibbaibbele. “Zintu zyoonse izyakalembwa kaindi zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.”—Baroma 15:4.

• Muuya Uusalala wa Leza. Nokwakainda buyo ciindi cisyoonto kuzwa Jesu naakafwa, mbungano yoonse ya Banakristo yakaba muluumuno. Ino nkaambo nzi? “Yakali kweenda cakuyoowa Jehova amuluumbulizyo lwamuuya uusalala.” (Milimo 9:31) Muuya uusalala, inguzu zya Leza, ulaanguzu kapati. Leza ulakonzya kuubelesya kuumbulizya muntu uuli woonse mubukkale buli boonse.

• Mupailo. Bbaibbele litukulwaizya kuti: “Mutalibiliki acintu nociba comwe.” Pele litwaambila kuti: “Amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu.”—Bafilipi 4:6, 7.

• Banakristoma balakonzya kuba balongwe beni-beni mbotunga twasyoma kuti balakonzya kutuumbulizya muziindi zyamapenzi. Mwaapostolo Paulo wakapandulula balongwe bakwe kuti ‘mbambabo ibamuumbulizya kapati’ ciindi nali “mumause amumapenzi.”—Bakolose 4:11; 1 Batesalonika 3:7.

Pele mulakonzya kuyeeya kuti ino eeci cicitika buti. Atuzilange-lange zikozyanyo zyabantu bakayaanya mapenzi ibaambwa kumatalikilo. Mbubwenya mbuli mbabo, mulakonzya kubona kuti Leza ucicizuzikizya cisyomezyo cikkazika moyo cakuti: “Mbubonya mutumbu mbwaumbulizya mwanaakwe, andime ndiyoozumanana kumuumbulizya nywebo.”—Isaya 66:13.