NZYOBAAMBA BANTU BAMWI

Kuli makani aindene-indene ngobasyoma bantu kujatikizya julu alimwi ancolyakapangilwa. Mucikozyanyo:

• Bantu banji ibalyaamba kuti Mbanakristo balazumina ancolyaamba bbuku litegwa New Catholic Encyclopedia, lyalo ilyaamba julu kuti “ngomunzi wabaabo ibalelekedwe balo ibafwa kabacita ncayanda Mwami.”

• Ba Rabbi Bentzion Kravitz bakaamba kuti bukombi bwaci Juda bubikkila kapati maano kubuumi muntu mbwajisi lino kwiinda buumi buliko afwa. Pele baamba kuti “kujulu muuya ulakkomana kapati—kwalo kuli nkuyeeyela buyo alimwi akulimvwa kuswena kuli Leza kwiinda kaindi.” Nokuba boobo, ba Kravitz balazumina kuti “nokuba kuti bukombi bwaci Juda bulasyoma kuti kuli kuunka kujulu, bbuku ndyobabelesya litegwa Torah talyaambi kapati kujatikizya julu.”

• Ba Hindu aba Bbuda basyoma kuti julu lili muzibeela zinji zyamuuya. Baamba kuti mbusena muntu nkwaunka kwakaindi buyo kasyoonto, mpoonya kuzwa waawo ambweni ulazyalululwa anyika naa kuunka ku Nirvana naa kubusena bwaba Bbuda—iciimo icisumpukide kwiinda julu.

• Bamwi balakazya kufwumbwa makani aazwa mubukombi kujatikizya julu alimwi baamba kuti zyoonse izyaambwa nzyabufwubafwuba.

NCOLYAAMBA BBAIBBELE

Mu Bbaibbele, ibbala lyakuti “julu” lijisi bupanduluzi bunji. Mucikozyanyo:

• Lugwalo lwa Matalikilo 1:20 lwaamba kulengwa kwabayuni ‘bauluka atala aanyika mumulengalenga.’ Mukaambo aaka, ibbala lyakuti mulengalenga lyaamba julu.

• Lugwalo lwa Isaya 13:10 lwaamba “nyenyeezi zyakumajulu azibunga-bunga zyangawo”—kwalo nkotukonzya kwaamba kuti kujulu.

• Bbaibbele lilaamba kujatikizya ‘busena bwa Leza ooko nkwakkala kujulu’ alimwi lilaamba kuti kuli ‘bangelo kujulu.’ (1 Bami 8:30; Matayo 18:10) Amubone kuti bbala lyakuti “kujulu” talili lyakuyeeyela buyo pe, pele ndibbala lipandulula busena bwini bwakukkala. *

“Langa kuzwa kujulu ubone, langa kuzwa kubusena bwako busumpukide busalala alimwi bulemekwa.”—Isaya 63:15.

Bbaibbele taliyiisyi kuti nyika munzi wesu motukkala kwaciindi cisyoonto buyo kulindila lufwu, mpoonya akuyoopona kujulu twaakufwa. Bbaibbele lilaamba cakusalazya kuti tanaakali makanze aa Leza aakuti bantu kabafwa. Amulange-lange twaambo ootu:

• Leza wakaambila banabukwetene bakusaanguna kuti: “Amuzyalane muvwule, muzuzye nyika.” (Matalikilo 1:28) Nyika ngomunzi muntu mpaakeelede kukkala kukabe kutamani. Lufwu lwakali kuyoosikila mwaalumi amukaintu lilikke buyo kuti nibatakamumvwida Leza. Cuusisya ncakuti bakasala kutamumvwida.—Matalikilo 2:17; 3:6.

• Kutamvwida kwamuntu wakusaanguna kwakaleta lufwu kutali buyo kulinguwe amukaintu wakwe, pele akubantu boonse. (Baroma 5:12) Sena eeco cakapa kuti bantu babule bulangizi?

• Bbaibbele lyaamba kuti “kuli majulu mapya anyika mpya nzyotulindila swebo kweelana acisyomezyo cakwe.” * (2 Petro 3:13) Kwiinda mu Bwami bwakwe, Leza uyoobambulula nyika kuti ibe kweelana ambwaakali kuyanda, “alimwi lufwu talukabi limbi.” (Ciyubunuzyo 21: 3, 4) Sena eeci caamba buumi kujulu naa anyika? Kutegwa cintu caambwe kuti ‘tacikabi limbi,’ nkokuti ceelede kuti cakaliko kale. Pele lufwu talunabede kujulu. Aboobo, cilasalala kuti kapango aaka kaamba iciyoocitika anyika alo mbotwakabambilwa kukkala alimwi mpotulombozya kuba abayandwa besu. Bbaibbele alimwi liyubununa kuti bafwide bayoobuka kutegwa bakakkale antoomwe alimwi abayandwa babo.—Johane 5:28, 29.

Bantu banji bakkomana kuzyiba cini ncoliyiisya Bbaibbele kujatikizya kujulu. Mucikozyanyo, ba George ibakali bacikombelo ca Katolika bakaamba kuti: “Ndakajana kuti ncoliyiisya Bbaibbele kujatikizya kupona anyika kukabe kutamani cilaumbulizya. Cilamvwika kwiinda kuunka kujulu.” *

“Majulu nga Jehova, pele nyika wakaipa bana babantu.”—Intembauzyo 115:16.