Mukwasyi Alimwi Akusala Balongwe Bali Kabotu
Bantu banji cilabakatazya kuzumanana kuba acilongwe cibotu abanamukwasyi alimwi abalongwe. Atulange-lange njiisyo zimwi zyamu Bbaibbele izikonzya kumugwasya kuzumanana kuba acilongwe cibotu abamwi.
MUTANOOLIYANDI
NJIISYO YAMU BBAIBBELE: “Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Bafilipi 2:4.
NCOCAAMBA: Tulakonzya kuzumanana kuba acilongwe cibotu abamwi ikuti twabikkila maano kuzintu nzyotukonzya kubacitila, ikutali kubikkila buyo maano kuzintu nzyobakonzya kutucitila. Ikuti kamuliyanda, mulakonzya kunyonganya cilongwe ncomujisi abamwi. Mucikozyanyo, muntu uuliyanda mucikwati ulakonzya kuleka kusyomeka kumuntu ngwakwetene limwi. Kuyungizya waawo, kunyina muntu uunga wayanda kuba amulongwe uuyandisya kulidunda kujatikizya zintu nzyajisi naa nzyazyi. Bbuku limwi lyamazuba aano lyaamba kuti, “bantu ibabikkila buyo maano kuzintu nzyobayanda balo muciindi cakubikkila maano kuli nzyobayandika bamwi banoojisi mapenzi manji.”
NCOMUKONZYA KUCITA:
-
Amubagwasye bamwi. Balongwe ibali kabotu balasyomana alimwi lyoonse inga balilibambilide kugwasyanya. Buvwuntauzi bumwi bwakatondezya kuti bantu ibagwasya bamwi tabavwuli kuba apenzi lyakutyompwa kapati alimwi inga balimvwa kuba ampindu.
-
Amutondezye lweetelelo. Lweetelelo lupandululwa kuti nkucikonzya kumvwa mbwalimvwide muntu mumoyo wanu. Ikuti kamutondezya lweetelelo, inga tiimwabelesya majwi aalunya, nkokuti majwi aalibonya mbuli kuti ngakusesya buyo pele aakonzya kumucisa umwi.
Ikuti kamutondezya lweetelelo, nkokuti mulakonzya kuba bantu ibababikkila maano bamwi. Aboobo, lweetelelo lulakonzya kumugwasya kutasalulula bamwi alimwi akuba aabalongwe ibazwa muzilengwa naa mubukkale bwiindene-indene.
-
Amwaabe ciindi canu. Ikuti kamujana ciindi cinji cakuba antoomwe abamwi, nkokuti mulakonzya kubazyiba kabotu. Ikuti kamuyanda kujana mulongwe uuli kabotu, mweelede kubandika zintu nzyalibilika alimwi anzyabikkila maano kapati. Aboobo kamuswiililisya ciindi nabandika. Amutondezye kuti mulazibikkila maano zintu nzyalibilika mweenzinyoko. Buvwuntauzi ibwakacitwa caino-ino bwakatondezya kuti “kuba amibandi mibotu kulakonzya kupa kuti bantu bakkomane kapati.”
AMUSALE BALONGWE CABUSONGO
NJIISYO YAMU BBAIBBELE: “Kumvwana abantu babyaabi kupa kuti muntu aleke kulilemeka kabotu.”—1 Bakorinto 15:33, bupanduluzi buyungizyidwe.
NCOCAAMBA: Bantu mbomuyanzana limwi balakonzya kumupa kuba bantu bali kabotu naa ibatali kabotu. Basyaazibwene mumakani aambobalilemeka bantu baamba kuti balongwe mbajisi muntu balakonzya kumujatikizya kapati muntu ooyo mumbazu zyoonse zyabuumi bwakwe. Mucikozyanyo baamba kuti, ikuti kamuyanzana abantu bafweba naa ibayanda kulekana, andinywe mulalangilwa kutalika kufweba naa kuyanda kulekana.
NCOMUKONZYA KUCITA: Amujane balongwe ibatondezya bube mbomukkomanina alimwi ibalilemeka kabotu balo mbomuyanda kwiiya. Mucikozyanyo, amuyanzane abantu bajisi bupampu, bulemu, baabi alimwi ibajisi cilengwa cakusamausya beenzu.
NJIISYO ZIMBI ZYAMU BBAIBBELE
Amweebelele mavidiyo aamba zyamu Bbaibbele aakabambilwa kugwasya banabukwetene, bakubusi alimwi abana kuba abuumi bwamumukwasyi bukkomanisya
MUTANIKWAAMBI ZINTU ZIKONZYA KUBACISA BAMWI.
“Majwi aambwa cakutayeeya alayasa mbuli panga.”—TUSIMPI 12:18.
AMUBE BAABI.
“Mwaabi uyoozwidilila.”—TUSIMPI 11:25.
AMUCITILE BAMWI ZINTU MBUBONYA MBOMUYANDA KUTI BAMUCITILE.
“Zintu zyoonse nzyomuyanda kuti bantu bamucitile, anywebo nzyomweelede kubacitila.”—MATAYO 7:12.
Andiza Inga Mwaakkomanina Ayaaya
SINSIMUKA!
Ino Mulongwe Mubotu Muntu Uuli Buti?
Bantu banji balimvwa kuti kuba abalongwe bali kabotu kulayandika kapati. Ino mbuti mbomukonzya kuba balongwe bali kabotu? Cibalo eeci cilalanga-langa njiisyo zyone zyamu Bbaibbele izigwasya.
