“Ino Mubwini, Nguni Muzike Musyomesi Uucenjede?”

“Ino mubwini, nguni muzike musyomesi uucenjede ooyo Simalelo wakwe ngwaakasala kulanganya babelesi bamuŋanda yakwe.”—MT. 24:45.

INO INGA MWAINGULA BUTI?

Ino muzike musyomesi uucenjede nguni?

Ino babelesi bamuŋanda mbaani, alimwi ndilili Jesu naakasala muzike musyomesi kuti kabalanganya?

Ino ndilili Kristo nayakusala muzike musyomesi kuti kalanganya lubono lwakwe loonse, alimwi lubono oolo lubikkilizya nzi?

1, 2. Ino Jesu ubelesya nzila nzi kutusanina mazuba aano, alimwi nkaambo nzi ncokuyandika kwiizyiba nzila eeyi?

MUCIZYI umwi waakaamba boobu mulugwalo lwakulumba ndwaakalembela bakwesu babelekela kumaofesi eesu mapati, wakati: “Bakwesu, tandikonzyi kubala ziindi nomwabikka mumaanza aangu zibalo zijisi makani ngondiyanda alimwi aciindi nondaayanda kapati.” Sena kuli nomwakalimvwide boobo? Tobanabunji mbotulimvwa oobo. Pele, sena ceelede kutugambya? Peepe.

² Cakulya cakumuuya ncotutambula aciindi ceelede ncitondezyo cakuti Jesu, Mutwe wambungano, ulazuzikizya cisyomezyo cakwe cakutusanina. Ino nguni ngwabelesya kucita boobo? Ciindi naakali kupa citondezyo cakubako kwakwe, Jesu wakaamba kuti uyakubelesya “muzike musyomesi uucenjede” kupa ‘cakulya aciindi ceelede’ kubabelesi bamuŋanda yakwe. * (Amubale Matayo 24:45-47.) Muzike musyomesi ooyo njenzila Jesu njabelesya kusanina basikumutobela bakasimpe mazuba aano aamamanino. Cilayandika kapati kumuzyiba muzike musyomesi ooyu. Buumi bwesu bwakumuuya alimwi acilongwe cesu a Leza ciyeeme anzila eeyi.—Mt. 4:4; Joh. 17:3.

3. Ino mabbuku eesu ali kwaamba nzi kujatikizya cikozyanyo camuzike musyomesi?

³ Aboobo, mbuti mbotweelede kuciteelela cikozyanyo ca Jesu cijatikizya muzike musyomesi? Musyule, mumabbuku eesu twali kubala kuti: Mu Pentekoste 33 C.E., Jesu wakasala muzike musyomesi kuti kalanganya babelesi bamuŋanda yakwe. Kuzwa ciindi eeco muzike wali kwiiminina Banakristo bananike boonse bali anyika kabali kakamu. Babelesi bamuŋanda bali kwiiminina bananike mbabonya pele umwi aumwi kali alikke. Mu 1919, Jesu wakasala muzike musyomesi “kulanganya lubono lwakwe loonse”—zyintu zyoonse zili anyika zibelesyegwa kusumpula mulimo wakukambauka Bwami. Nokuba boobo, kwiinda mukwiiya cakusitikila, kuzinzibala  kuyeeya alimwi akwaapailila makani aaya kwatondezya kuti mbotwali kwaateelela majwi aa Jesu kujatikizya muzike musyomesi uucenjede kuyandika kucinca. (Tus. 4:18) Atucilange-lange cikozyanyo alimwi akubona mbocitujatikizya kufwumbwa naa tujisi bulangizi bwakujulu naa bwaanyika.

INO NDILILI CIKOZYANYO NOCIYAKUZUZIKIZYIGWA?

4-6. Nkaambo nzi ncotukonzya kwaamba kuti kuzuzikizyigwa kwacikozyanyo ca Jesu camuzike musyomesi kwakatalika mu 1914?

⁴ Cibalo icaamba cikozyanyo camuzike musyomesi citondezya kuti kuzuzikizyigwa kwacikozyanyo eeci tiikwakatalika mu Pentekoste 33 C.E., pele kwakatalika mumazuba aano aamamanino. Atubone Magwalo mbwaatugwasya kumvwisya makani aaya.

⁵ Cikozyanyo camuzike musyomesi ncibeela cabusinsimi bujatikizya ‘citondezyo cakubako kwakwe acamamanino aabweende bwazyintu.’ (Mt. 24:3) Cibeela cakusaanguna cabusinsimi ibulembedwe mulugwalo lwa Matayo 24:4-22, cilazuzikizyigwa ziindi zyobilo—ciindi cakusaanguna, myaka kutalikila mu 33 C.E. kusikila mu 70 C.E., ciindi cabili, alimwi munzila mpati kapati muciindi cesu. Sena eeci caamba kuti majwi aa Jesu kujatikizya muzike musyomesi aalo alazuzikizyigwa munzila zyobilo? Peepe.

⁶ Kutalikila amajwi aalembedwe mulugwalo lwa Matayo 24:29, Jesu wakabikkila kapati maano kuzyintu izyakali kuyakucitika muciindi cesu. (Amubale Matayo 24:30, 42, 44.) Kaamba kujatikizya iziyakucitika ciindi camapenzi mapati, wakaamba kuti bantu “bayoobona Mwana wamuntu kaboola mumakumbi aakujulu.” Mpoonya, naakali kwaamba kujatikizya baabo bakali kuyakupona mumazuba aamamanino, wakakulwaizya kupakamana, wakaamba kuti: “Tamuzyi buzuba Mwami wanu nayooboola,” alimwi wakati: “Aciindi ncomutayeeyeli, Mwana wamuntu ulaboola.” * Kweelana amajwi aaya—naakali kwaamba kujatikizya zyintu izyakali kuyakucitika mumazuba aamamanino—nceciindi Jesu naakaamba cikozyanyo camuzike musyomesi. Aboobo, tulakonzya kwaamba kuti majwi aakwe aajatikizya muzike musyomesi akatalika kuzuzikizyigwa naakatalika mazuba aamamanino mu 1914. Kwaateelela munzila eeyi makani aaya kulamvwika. Ino nkaambo nzi?

7. Mubuzyo nzi uuyandika iwakabuzyigwa ciindi cakutebula nocakatalika, alimwi nkaambo nzi?

⁷ Amuyeeye kujatikizya mubuzyo wakuti: “Ino mubwini, nguni muzike musyomesi uucenjede?” Mumwaanda wamyaka wakusaanguna, kwakanyina kaambo kakubuzyila mubuzyo uuli boobu. Mbubwenya mbotwabona mucibalo cainda, baapostolo bakali kucita maleele alimwi akupa zipego zyamaleele kusinizya kuti Leza wakali aambabo. (Mil. 5:12) Aboobo, kwakanyina kaambo kakuyanda kuzyiba baabo Kristo mbaakasala kuti kabasololela. Pele mu 1914, zyintu zyakacinca. Ciindi cakutebula cakatalika mumwaka nguwenya ooyu. Ciindi cakwaandaanya nsaku kumaila cakalisikide. (Mt. 13:36-43) Ciindi cakutebula nocakatalika, mubuzyo uuyandika kapati wakabuzyigwa: Akaambo kakuti kwakali Banakristo banji ibakali kulitaminina kuba basikutobela Jesu beni-beni, mbuti maila—Banakristo bananike—mbwaakali kuyakuzyibwa? Cikozyanyo camuzike musyomesi cakapa bwiinguzi. Basikutobela Kristo bananike bakali kuyakuba mbabo nkaambo bakali kusaninwa kabotu kumuuya.

INO MUZIKE MUSYOMESI UUCENJEDE NGUNI?

8. Nkaambo nzi ncoceelela kuti Banakristo bananike mbebapanga muzike musyomesi?

⁸ Banakristo bananike ibacili anyika mbebapanga muzike musyomesi. Aaba bali boobu baitwa kuti “ibapaizi bami” alimwi bapegwa mulimo ‘wakwaambilizya koonse-koonse ibube bubotu bwayooyo wakabaita kuzwa mumudima akubanjizya mumumuni wakwe uutaliboteli.’ (1 Pe. 2:9) Cileelela kuti “ibapaizi bami” aaba mbabatola lubazu mukuyiisya  basyominyina kasimpe.—Malk. 2:7; Ciy. 12:17.

9. Sena Banakristo bananike boonse bapanga muzike musyomesi? Amupandulule.

⁹ Sena bananike boonse anyika bapanga muzike musyomesi? Peepe. Bwini mbwakuti tabali bananike boonse batola lubazu mukubamba cakulya cakumuuya cabasyominyina munyika yoonse. Masimpe kuti bamwi bananike mbakutausi naa mbaalu mumbungano. Balayiisya kuŋanda aŋanda alimwi amumbungano mobabede, alimwi cakusyomeka balabutobela busolozi buzwa kumaofesi mapati. Pele tabajisi lubazu mukubamba cakulya cakumuuya cabunyina bwanyika yoonse. Alimwi akati kabananike kuli bacizyi balicesya, balo batakonzyi kuba bamayi mumubungano.—1 Ko. 11:3; 14:34.

10. Ino muzike musyomesi uucenjede nguni?

¹⁰ Aboobo, ino muzike musyomesi uucenjede nguni? Kweelana abubambe bwa Jesu bwakusanina bantu banji kwiinda mukubelesya bantu basyoonto, muzike ulapangwa akabunga kasyoonto kabakwesu bananikidwe amuuya balo batola lubazu mukubamba alimwi akumwaya cakulya cakumuuya muciindi cakubako kwa Kristo. Muciindi coonse camazuba aamamanino, bakwesu bananike ibapanga muzike musyomesi bali kubelekela antoomwe kumaofesi mapati. Mumyaka misyoonto yainda, muzike ooyo wali Kabunga Keendelezya ka Bakamboni ba Jehova. Nokuba boobo, amubone kuti mucikozyanyo cakwe, Jesu wakaamba kuti kwakali kuyakuba “muzike” omwe buyo. Aboobo, kusala nkobacita ba Kabunga Keendelezya bakucitila antoomwe.

INO BABELESI BAMUŊANDA MBAANI?

11, 12. (a) Ino muzike musyomesi uucenjede wakasalwa ziindi zyobilo izili? (b) Ino ndilili Jesu naakasala muzike musyomesi kulanganya babelesi bamuŋanda yakwe, alimwi mbaani mbaakasala?

¹¹ Cilayandika kuzyiba kuti mucikozyanyo ca Jesu, muzike musyomesi uucenjede wakasalwa ziindi zyobilo ziindene. Ciindi cakusaanguna wakasalwa kulanganya babelesi bamuŋanda; ciindi cabili kulanganya lubono lwasimalelaakwe. Aboobo, akaambo kakuti cikozyanyo eeci cilazuzikizyigwa muciindi camamanino, nkokuti kusalwa koonse kobilo kweelede kuboola ciindi cakubako kwa Jesu kali mwami kacitalikide kale mu 1914.

¹² Ino ndilili Jesu naakasala muzike musyomesi kulanganya babelesi bamuŋanda yakwe? Kutegwa twiingule mubuzyo ooyu tweelede kupiluka kumwaka wa 1914—ciindi butebuzi nobwakatalika. Mbubwenya mbotwaiya kale, aciindi eeci tubunga tunji twakali kulitaminina kuba Banakristo. Muukabunga  kali Jesu mwaakali kuyakusala muzike musyomesi? Mubuzyo ooyo wakaingulwa ciindi Jesu aba Usyi nobakaboola kulingula tempele, bubambe bwakumuuya bwakukomba, kuzwa mu 1914 kusikila kumatalikilo aa 1919. * (Malk. 3:1) Bakakkomana akabunga kasyoonto ka Basikwiiya Bbaibbele ibakatondezya kuti moyo wabo wakali a Jehova alimwi a Jwi lyakwe. Masimpe kuti bakali kuyandika kusalazya, pele bakalicesya muciindi cisyoonto cakusunkwa akusalazya. (Malk. 3:2-4) Basikwiiya Bbaibbele aabo basyomeka bakali mbuli maila, Banakristo beni-beni. Mu 1919, muciindi cakubukulusyigwa munzila yakumuuya, Jesu wakasala bakwesu bananike beelela akati kabo kuba muzike musyomesi uucenjede akubaambila kulanganya babelesi bamuŋanda yakwe.

13. Mbaani babikkilizyidwe mubabelesi bamuŋanda, alimwi nkaambo nzi?

¹³ Aboobo, ino babelesi bamuŋanda mbaani? Mbabaabo basaninwa. Kumatalikilo aamazuba aamamanino, babelesi bamuŋanda boonse bakali bananike. Mukuya kwaciindi, babelesi bamuŋanda bakazikubikkilizya abankamu mpati yambelele zimbi. Lino bambelele zimbi mbabanji ‘mutanga lyomwe’ lili ansi abweendelezi bwa Kristo. (Joh. 10:16) Tubunga toonse tobilo tulagwasyigwa acakulya cikozyenye cakumuuya cibambwa akumwaigwa amuzike musyomesi. Mbuti kujatikizya baabo bamu Kabunga Keendelezya bapanga muzike musyomesi uucenjede mazuba aano? Bakwesu aaba abalo bayandika kusaninwa kumuuya. Aboobo, cakulicesya balizyi kuti umwi aumwi alikke mubelesi wamuŋanda mbubwenya mbuli basikutobela Jesu beni-beni boonse.

14. (a) Mulimo nzi muzike musyomesi ngwapedwe, alimwi ino mulimo ooyu ubikkilizya nzi? (b) Ino nkucenjezya nzi Jesu nkwaakacenjezya muzike musyomesi uucenjede? (Amubone kabbokesi kakuti: “Ikuti Muzike Mubi Ooyo . . . ”)

¹⁴ Jesu wakapa muzike musyomesi uucenjede mukuli mulemu. Kaindi, muzike naa mubanzi uusyomwa wakali sikulanganya ŋanda. (Lk. 12:42) Aboobo, muzike musyomesi uucenjede wakapegwa mukuli wakulanganya ŋanda yoonse yalusyomo. Mukuli ooyu ulabikkilizya akulanganya lubono, mulimo wakukambauka, mapulogilamu aamiswaangano yabbazu ayacooko, alimwi akusimba mabbuku aakubelesya mumulimo wamumuunda, muciiyo cesu tobeni alimwi akumiswaangano yambungano. Babelesi bamuŋanda basyoma mububambe boonse bwakumuuya bubambwa akakamu kamuzike.

 NDILILI MUZIKE NAYAKUSALWA KULANGANYA LUBONO LWA SIMALELAAKWE?

15, 16. Ino ndilili Jesu nayakusala muzike musyomesi kulanganya lubono lwakwe loonse?

¹⁵ Ino ndilili Jesu nayakusala muzike musyomesi kuti kalanganya “lubono lwakwe loonse”? Jesu wakaamba kuti: “Ulikkomene muzike ooyo ikuti Simalelo wakwe aakusika akamujane ulacita oobo! Ncobeni ndimwaambila kuti, Uyoomusala kulanganya lubono lwakwe loonse.” (Mt. 24:46, 47) Amubone kuti Jesu uyakumusala ciindi cabili aakusika akujana kuti muzike “ulacita oobo,” nkokuti kubamba cakulya cakumuuya cakusyomeka. Aboobo, kwakali kuyakwiinda ciindi akati kakusalwa ooku kobilo. Kutegwa tumvwisye kuti mbuti alimwi ndilili Jesu nayakusala muzike kulanganya lubono lwakwe, tweelede kuzyiba zyintu zyobilo: ciindi nayakusika alimwi akuti lubono lwakwe lubikkilizya nzi.

¹⁶ Ino Jesu uyakusika lili? Bwiinguzi bulajanika kwiinda mukulanga-langa cibalo caamba cikozyanyo. Amuyeeye kuti tupango twamusyule notwaamba Jesu kuti ‘ulaboola,’ bbala eeli lyaamba ciindi Jesu nayakuboola kwaambilizya akuleta lubeta kumamanino aabweende bwazyintu. * (Mt. 24:30, 42, 44) Aboobo, “kusika” naa “kuboola” kwa Jesu ikwaambidwe mucikozyanyo camuzike musyomesi kuyakucitika muciindi camapenzi mapati.

17. Ino lubono lwa Jesu lubikkilizya nzi?

¹⁷ Ino ‘lubono lwa Jesu loonse’ lubikkilizya nzi? Kabelesya bbala lyakuti “loonse,” Jesu taakwe naakali kwaamba lubono lwakwe lwamunyika buyo. Masimpe ngakuti, Jesu ulipedwe nguzu zinji kujulu. Wakaamba kuti: “Ndapegwa nguzu zyoonse kujulu alimwi aanyika.” (Mt. 28:18; Ef. 1:20-23) Lino lubono lwakwe lulabikkilizya a Bwami bwabu Mesiya, bwalo ibwakaba bwakwe kutalikila mu 1914, alimwi mu Bwami oobu uyakulela  antoomwe abasikumutobela bananike.—Ciy. 11:15.

18. Nkaambo nzi Jesu ncayakukkomana kusala muzike musyomesi kulanganya lubono lwakwe loonse?

¹⁸ Kweelana amakani ngotwabandika, ncinzi ncotukonzya kwaamba? Ciindi Jesu aakuboola kubeteka ciindi camapenzi mapati, uyakujana muzike musyomesi cakusyomeka kaabila babelesi bamuŋanda cakulya cakumuuya aciindi ceelede. Mpoonya uyoobasala ciindi cabili—kulanganya lubono lwakwe loonse. Aabo bapanga muzike musyomesi bayakusalwa baakutambula bulumbu bwabo bwakupona kujulu, bayakuba basikulelanyina a Kristo.

19. Sena muzike musyomesi uyakupegwa bulumbu bupati kujulu kwiinda bananike boonse? Amupandulule.

 ¹⁹ Sena muzike musyomesi uyakupegwa bulumbu bupati kujulu kwiinda bananike boonse? Peepe. Bulumbu mbokasyomezyegwa kabunga kasyoonto aciindi cimwi bulakonzya kwaabanwa abamwi. Mucikozyanyo, amubone Jesu ncaakaambila baapostolo bakwe bali 11 basyomeka masiku katanafwa. (Amubale Luka 22:28-30.) Jesu wakasyomezya kabunga kasyoonto aaka kabaalumi kuti bulumbu bupati bwakali kubalindila akaambo kakusyomeka kwabo. Bakali kuyakutola lubazu mukulela anguwe mubweendelezi bwabwami. Pele nokwakainda myaka, wakatondezya kuti boonse bali 144,000 bakali kuyakukkala azyuuno zyabwami alimwi akutola lubazu mukulela. (Ciy. 1:1; 3:21) Mbubwenya buyo, mulugwalo lwa Matayo 24:47, Jesu wakasyomezya kabunga kasyoonto aakaya kabaalumi—bakwesu bananike bapanga muzike musyomesi—kuti bayakusalwa kulanganya lubono lwakwe loonse. Mubwini, boonse bali 144,000 bayakutola lubazu mukulela anguwe kujulu.—Ciy. 20:4, 6.

20. Nkaambo nzi Jesu ncaakasala muzike musyomesi, alimwi ino mukanzide kucita nzi?

²⁰ Kwiinda mumuzike musyomesi uucenjede, Jesu utobela bubambe mbwaakatalisya mumwaanda mwamyaka wakusaanguna—kusanina bantu banji kwiinda mukubelesya bantu basyoonto. Jesu wakasala muzike musyomesi kutegwa basikumutobela beni-beni—kufwumbwa naa mbananike naa mbambelele zimbi—bazumanane kutambula cakulya cakumuuya aciindi ceelede ciindi coonse camazuba aamamanino. Aboobo, atuzumanane kutondezya kulumba kwesu kwiinda mukugwasyilizya bakwesu bananike bapanga muzike musyomesi uucenjede cakusyomeka.—Heb. 13:7, 17.

MAJWI AAKUMAMANINO: (Ayelede kubalwa mbubwenya mbuli majwi aamunsi kweelana amincali.)

[Bupanduluzi buyungizidwe]

[Mibuzyo yaciiyo]

[Kabbokesi kali apeeji 22]

Sena Mwatumvwisya Twaambo Ootu?

“Muzike musyomesi uucenjede”: Nkabunga kasyoonto kabakwesu bananike, ibajatikizyidwe mumulimo wakubamba alimwi akumwaya cakulya cakumuuya ciindi cakubako kwa Kristo. Mazuba aano bakwesu bananike aaba mbabapanga Kabunga Keendelezya

“Babelesi bamuŋanda yakwe”: Boonse basaninwa, kufwumbwa naa mbananike naa mbambelele zimbi

‘Bakasalwa kulanganya babelesi bamuŋanda yakwe’: Mu 1919, Jesu wakasala bakwesu beelela bananike kuba muzike musyomesi uucenjede

“Uyoomusala kulanganya lubono lwakwe loonse”: Aabo bapanga kabunga kamuzike bayakusalwa baakutambula bulumbu bwakupona kujulu. Antoomwe aba 144,000 boonse, bayakutola lubazu mubulelo bwa Kristo bwakujulu

[Cifwanikiso icili apeeji 22, 23]

Kufwumbwa naa bulangizi bwesu mbwakujulu naa anyika, toonse tuli babelesi bamuŋanda alimwi tuyandika cakulya cakumuuya aciindi ceelede

[Kabbokesi kali apeeji 24]

“Ikuti Muzike Mubi Ooyo . . . ”

Jesu wakapa mukuli mulemu kapati kumuzike musyomesi uucenjede—mulimo wakulanganya babelesi bamuŋanda alimwi akupa cakulya cakumuuya aciindi ceelede. Jesu wakalizyi kuti aabo bapedwe mukuli mupati, nzinji zilangilwa kulimbabo. (Lk. 12:48) Nkakaambo kaako wakamanizya cikozyanyo cakwe kujatikizya muzike musyomesi uucenjede amajwi aakucenjezya.

Jesu wakacenjezya kujatikizya muzike mubi iwakali kuyeeya kuti simalelo wamuka alimwi wakatalika kuuma bazikenyina. Jesu wakaamba kuti ciindi simalelo aakusika, uyakusubula muzike mubi ooyu “acisubulo cipati.”—Amubale Matayo 24:48-51.

Sena Jesu wakali kwaambila limwi kuti kuyakuba ciinga camuzike mubi mumazuba aamamanino? Peepe. Nokuba boobo, bantu bamwi balatondezya muuya mbuli wamuzike mubi ngwaakapandulula Jesu. Bantu bali boobo tulakonzya kubaamba kuti mbaasiluleyo, kufwumbwa naa bakali bananike naa bakali ‘bankamu mpati.’ (Ciy. 7:9) Pele ibali boobo tabapangi ciinga camuzike mubi pe. Jesu taakwe naakaamba kuti wakali kuyakusala muzike mubi. Majwi aakwe aawa ngakucenjezya muzike musyomesi uucenjede.

Amubone kuti Jesu wakatalisya kucenjezya kwakwe amajwi aakuti, “ikuti.” Majwi aaya atondezya kuti ncaakali kwaamba Jesu ambweni tiicakali kuyakucitika. Munzila imwi Jesu wakali kwaamba kuti: ‘Ikuti muzike musyomesi uucenjede ooyu wapenzya bazikenyina munzila eeyi, oobu mbombubo mbwayakucita simalelo aakusika.’ (Amubone alimwi Luka 12:45.) Nokuba boobo, kakamu kamuzike musyomesi uucenjede kazumanana kulangila alimwi akupa cakulya cakumuuya.

Ibakwesu bananike balo antoomwe ibapanga muzike musyomesi balizyi kuti bayakulyaambilila kuli Simalelo akaambo kambobalanganya babelesi bamuŋanda yakwe. Aboobo, makanze aabakwesu aaba bananike ngakuzuzikizya mulimo wabo cakusyomeka kutegwa Simalelaabo aakusika akabaambile kuti ‘mwacita kabotu.’

[Caption on page 25]

Ba 144,000 boonse bayakutola lubazu a Jesu mubulelo bwakujulu

(Amubone  muncali 19)